Meri Sada Samajik Kuritiyon Ke Viruddh Ek Awaz Meri SadaAbout BlogEk WadaPoemKavitaGazalSherGeet Saturday, December 17, 2011 Ek Adhuri Parantu Sachchi Prem Kahani ‘Meri Sada’ aaj k pariwesh ki ‘Ek Adhuri Parantu Sachchi Prem Kahani’ hai jahan ek taraf adami chand par pahunch gaya hai par aaj bhi kuchh log apne gharon se niklna nahi chahte. Yah kahani hai meri , ‘Anjaani aur Anil’ ki. Hum Jo kabhi wada kiye the ek dusre ka sath nibhane ka aur ek sath Samajik Kuritiyon (Honour killing, Jati Pratha, Dahej Pratha,Bali Pratha aadi) se ladne ka. Mai use Anjaani kahkar bulata hu aur isse jyada uska vyaktigat parichay nahi de sakta kyonki mai nahi chahta ki uska ye balidan vifal ho jo usne apne Mata-Pita k liye kiya hai. Par mai chahta hu ki jis dard me hum dono ji rahe hai, us dard ko hamare parents k sath-sath wo sare log mahsus karen jo jhuthi Shan aur Maryada ke khatir hum bachcho ko Gamo k sagar me jhok dete hai.Yah ek Ehsaas hai apne parents ko karane ki, unke bachche unse kitna pyar karte hai.Yadi hum bachche apne parents ki Ijjat aur Maryada ka khyal karte hai to unhe bhi hamari khushiyon k liye Samaj k samne aana chahiye. Jab hamara Dharm, Bhagwan aur Kanoon hume apna Jivansathi chunane aur Ghar basane ka adhikar dete hain to aap log kyo apni jhuthi Maryada aur Shaan k liye hum bachcho ki Khushiyan Chhinte hain aur hume alag karke Jivan bhar ki saja dete hai. Iska matlab ya to dharm, Bhagwan aur Kanoon galat hai ya hamari jhuthi Shaan aur Maryada…….. Anjaani sirf ek nam nahi, ye Pyar, Sanskar, Parishram, Samajhdari, budhimata, Jimmedari aur sabse badi bat Tyag ki jiti jagti murat hai. Jise mai apne khyalo me bachpan se basaye huye bada huaa aur kabhi socha nahi tha ki Sapne bhi yu sach huwa karte hai. Par usse milne k bad pata chala ki yadi apki chahat sachchi ho to aasman se Tare tutkar Jamin par gir jaya karte hai. Aur Usse bichhne k bad pata chala, Jabtak hamara Samaj na chahe tab tak Khuda lakh koshish karle do dil kabhi ek nahi ho sakte. Anjaani apne char bahno me sabse chhoti aur do bhaiyo se badi hai. Uska bachpan chanchalata aur shararton se bhara huaa tha. Use Jindgi ko apne style me jine ki jid thi. Ladko ki tarah chhote-chhote bal rakhna, boys dresses pahnana aur cycle riding uske saukh hua karte the. Kul mila julakar wo jindgi ko apne arthon pe jiti thi. Parntu jyo-jyo wo badi hoti gayi tyo-tyo use apne ghar ki jimmedariyo ka ehsaas hota gaya aur uska bachpan kab Jawani me tabdil ho gya use bhi khabar nahi huyi. Jald hi tino badi bahano ki Shaadiyan ho gayi aur wo kuchh badi ho gayi. Fir kya tha apni padhai k sath-sath ghar ki sari jimmeddari apne upar le li. Jhadu pochha se lekar chulha chaki tak ghar k sare kam khud karne lagi. Yahan tak ki ghar k sabhi vyktiyon k kapde ye swanm saf karne lagi. Aur rato ko jag-jag kar sut kata karne lagi taki Mata-Pita ko economic rup se kuchh madad mil jaye. Uske is nature ko dekhkar ghar k sabhi log usse pyar karne lage. Chahe usse koi chhota ho ya bada, wo sabaki dulari ho gayi. Wo jivan me kuchh aage badhana chahti thi is liye Papaji ne uski padhai jari rakhi ye sochakar ki yadi padh likh legi to koi achchha sa ladka dekhkar uski bhi hath pile kar denge. Papaji ko fakra tha ki unke pas beti k rup me ek yogya beta hai. Samay k sath-sath wo college jane lagi aur ek din achanak uski mulakat mujhse hui. Mai apne char bhaiyon aur ek bahan me tisre number ka hu. Bhaiya aur Didi ki shaadi kab ka ho gayi hai. Par mai ab tak shhadi nahi kiya kyonki mai apne pairo par khada hona chahta tha. Nahi to gharwalo ka bus chalta to mai abhi do bachcho ka bap hota. Mere ghar k hi nahi balki mere gaon k sabhi log mujhe bahut mante the kyonki mai bachpan se kuchh auro se hatkar tha. Faltu kisi k sath samay vyatit nahi karta bus apne kam se kam rakhta tha. Mere upar ghar ki koi jimmedari nahi thi bus khana, pina, padhna aur kuchh nahi. Par mai aksar ekant me baithkar chintan aur manan kiya karta tha samaj, samajik kriyakalapo aur inse upje samasyaon pe. Mere is nature ko lekar mere gharwale hameshaa chintit rahe the. Kyonki unhe lagta tha ki mai kahin Sanyasi na ban jau. Aaj k jamane me yadi kisi ka ladka Sanyasi ya Sadhu ban gaya to isse badi dub marne wali bat nahi ho sakti. Par yadi Chor ya Daku Ban gaya to ek bap ko fakra hota hai aur sina tankar Samaj me chalta hai. Ye hai hamara samajik pariwesh jisko na aap inkar kar sakte hai aur na hi mai. Mai iski parwah kiye bina chahta tha ki in Samajik Kuritiyon aur andhvishwashon k khilaf ek abhiyan chhedu. Jo Bhartiy Samaj ko andar hi andar Dimak ki bhati chat karta ja raha hai. Par iske liye mujhe apne pairon par khada hona tha kyonki parents k kandhon pe baithkar bachpan ka safar to tay kiya ja sakta par jawani ka safar apne pairon par hi karana hota hai. Aur ye bat us samay aur jaruri ho jati jab aap us system k khilaf ladne ja rahen ho jiska aap swanm abhinn ang ho. Warna apke pairon se kab Jamin khinch li jayengi apko pata tak nahi chalega. Wo din bhi aa gaya jab mai apna MBA Course complete karke, 5 June,2010 ko Additional Program officer (MGNREGA) k pad par niyukt huwa. Fir mano mere sapno ko pankh lag gaya. Idhar mai apna abhiyan shuru karne k liye planning karne laga udhar ghar wale chahate the ki meri Shaadi ho jayen. Par main unhe spasht kah diya ki mai usi ladki se shhadi karunga jo meri soch ki ho. Harek insaan ek sundar aur sushil Jivansathi ka khwab dekhta hai. Mai bhi usse achhuta nahi raha. Par mai humesha sochta tha ki meri Jivansathi samajhdar aur budhiman ho jo ek achchhi bibi ke sath-sath ek achchhi bahu aur ek achchhi maa ho sake. Wo har decision me mera sath de. Rishte aate gayen par meri soch kisi se nahi mili. Fir mujhe achanak un dino ka khayal aaya jab mera colleges me jakar Guest lecture dene ka saukh huwa karta tha. Chuki mujhe padhana achchha lagta tha isliye Mai un dino apni padhai k sath-sath apna saukh bhi pura karta tha. Aaj bhi wo din yad aata hai jab mai MBA first semester ka student tha. Ek Inter College k 11th class me Personality Development pe guest lecture de raha tha. Us dauran ek ladki jo sabse pichhe baithi sawal pe sawal kiye ja rahi thi. Uske sawal puchhne ka dhang aur uski jigyasa usko us class me sabse alag kar rahi thi. Ye mere sath pahli bar nahi huwa ki koi student mujhse sawal puchh raha ho par ye aisa pahli bar tha ki mai kisi ek ladki se bahut jyada prabhawit tha. Uske teacheron se puchhane par pata chala ki wo bahut hi intelligent aur samajhdar ladki hai. Us din mujhe bahut achchha laga kyonki usse milne k bad mujhe pata chala ki aaj bhi kuchh log aise hai jo auron se hatkar sochte hai. Par afsos is bat ka tha ki us class me andhera aur us ladki k sabse pichhe ki seat par hone k karan us ek ghante k lecture k dauran uska chehra dekh nahi paya. Fir kya tha mai apne ghar aa gaya. Us din puri rat us ladki k sawal mere kano me gujte rahe aur mujhe rat bhar nind nahi aayi. Is baat ko bite lagbhag teen saal ho chale the par aaj bhi wo ladki mere dil k kisi kone me chhupi hui thi. Jo achanak khyal bankar mere mastishk me ubhari. Shaadi ka khyal aate hi mujhe yah ehsaas huwa ki ye wahi ladki hai jo bachpan se mere khyalo me thi. Par samasya ye thi ki uske bare me mai jyada kuchh nahi janta tha isliye uski taraf dhyan na dekar khud ko office k kam me laga liya. Jab wo eleven me thi tab mera ek dost uske college me teacher huwa karta tha. Ek din mai apne dost k kshetra me tha, baton hi baton me mai us ladki ka jikra kiya to pata chala ki wo kahi aas-pas me hi rahti hai. Fir mai usse milne k liye apne dost se ichchha jatayi. Agle hi pal mai aur dost uske ghar pe the. Wo mujhe dekhkar pahchan gayi aur hamara swagat ki. Mai usko pahali bar dekh raha tha jitani wo dimag se Tej thi utni hi swabhaw aur vicharo se Saral. Usse baton k dauran pata chala ki wo ab B.Sc 2nd year ki student hai isse adhik kuchh aur nahi sun paya kyonki us aadhe ghante ki mulakat k dauran mai sirf usko dekhte hi rah gaya. Aisa lag raha tha mano mera barshon ka intjaar khatm ho raha ho. Kismat ne hume dusari bar milaya tha. Maine wahan se niklte samay apna contact number yah kah kar de diya taki bhawishya me kabhi kisi salah ki jarurat ho to hume yad karen. Mai aaye din sochata rahta ki kash aaj uska phone aa jaye. Usse mulakat k lagbhag do mahine se adhik ho chale the aur meri aash bhi khatm ho chali thi achanak ek din 26th oct, 2010 ko jab mai apne office me tha uska phone aaya. Mere puchhne par kaun bol raha hai, udhar se sawal aaya pahchaniye kaun? Chuki meri kisi ladki se jaan pahchan thi nahi so mai use pahchan gaya. Wo bahut surprize thi ki akhir mai use pahchan kaise gaya. Maine use bataya ki meri life me koi ladki hai hi nahi jo humse puchhe ki pahchaniye kaun? Us din mai usse bate karke bahut khus tha aur shayad wo bhi. Samanya parichay k bad hum dono ne apni bate is aashay k sath band kee ki bhawishaya me hum bate karte rahenge. Fir do dino k bad uska phone aaya. Mai use kisi andhere me nahi rakhna chahta tha atah mai apne dil ki bat spasht uske samne rakh di ki mai usse shhadi karna chahta hun. Shayad use bhi mere jaise kisi Jiwansathi ki talash thi. Lekin wo janm se Kshatriya thi aur mai Vashya. Bhale hi Dharm, Bhagwan aur Kanooon do dilo k milne ka ijjajt dete ho. Par aaj bhi is rudhwadi Samaj k najar me ye ek gunah hai. Ek aisa gunah jise rokane k liye hamara Samaj Dharm, Iman aur Kanoon sabako takh pe rakh deta hai. Chuki mai in paramparaon ki parwah nahi karta jo Manav ko Manav se alag kartE ho. Atah mai apne faisle par adig tha. Bus use sochna tha kyonki ek Aurat kisi ki Bibi k sath-sath kisi ki Beti aur Bahan bhi to hoti hai. Waise bhi duniya k saare rishte ek aurat ko hi to nibhana hota hai. Hum purushon ka kya hai apne swarth k liye sare rishte jodte hai aur use apne hit k liye Paramparao, jhuthi Shaan aur Ijjat k nam pe bandhe rakhte hai. Hum jo karen sab sahi aur ek Aurat kare wo galat. Usne kaha ki mujhe sochne k liye dus dino ka samay dijiye. Mai bola thik hai aap hume soch-samajhkar bataiga. Lekin 2-3 dino k bad hi uska jawab mil gaya. Us din 5th nov,2010 tha aur Dipawali bhi. Us din hum dono bahut khus the kyonki jo hum bachpan se khwab sanjo k chale the wo sach hone chala tha. Ek taraf shahar aur galiyon me patakhe fut rahe the dusri taraf do dilo me Armano ki fuljhariya chhut rahi thi. Jamin pe deep jal rahe the aur Aasmaan pe tare chamak rahe the. Dharti se lekar Aakash tak sirf ujala hi ujala tha kahi kisi andhere ka nishan nahi tha. Aisa lag raha tha mano Bhagwan aasman se jamin pe khusiyon ki barish kar raha ho. Hume yakin ho chala tha ki Bhagwan ne hum dono ko ek dusare k liye hi banaya hai. Usne hamara purposal to swikar kar liya. Par hum dono k bich me ye sahmati hui ki B.Sc complte hone k bad apne parents k samne apni bat rakhenge. Agar unhone ne ek bar me haan kah diya to haa nahi to na. Tab tak hum dono ek achchhe dost rahenge aur kuchh nahi. Par kuchh chijon par hum insano ka bus nahi chalta. Hum yuhi phone pe chhup-chhup k raton ko ghanto baten karne lage. Mobile par batein karte-karte hum ek-dusare se itna ghul mil gaye ki hum khud ko Pati-Patni samajhne lage. Ek din bhi bat nahi hoti to hum dono ko chain nahi milta. Hamesha is bat ka dar bana rahta ki yadi Mummy-Papa na kar diye to hum log kaise ji payenge. Isliye hum faisla kiye ki yadi hum sath ji nahi sakte to sath marenge par na hi aatm hatya karenge aur nahi apno se hum bhangenge. Unse hume do hi chij chahiye ya to hume Jindgi de de ya Maut. Anjaani bola karti thi, “Anil! Hum aap se bahut pyar karte hai. Hum apke bina mar jayenge.” Aur mai kahta tha ki Anjaani! Pyar apne aap me bahut hota hai. Isme alag se bahut jodne ki jururat nahi hoti. Hume bus apne rishte ko nibhana hai wo bhi ek sath. Din par din hum dono ka pyar badhta hi gaya. Iske sath hi hum dono ko apne ghar ki Ijjat aur Maryada ka bhi khyal tha. Atah hum kabhi aisaa kam nahi kiye jisse hamare Mata-Pita ka sar nicha ho ya bhavishya me unka samna na kar sake. Atah hum dono jitna mansik rup se ek dusre k najdik the utna hi bhautik rup se ek dusre se dur. Uska ghar railway station k pas padta hai. Atah ek din office k saare kam khatm karne k bad shaam k 6 baje k karib train pakadkar, rat ko karib 11 baje Anjaani ko surprize dene k liye uske ghar k aas paas tha. Jab wo mujhe phone ki to na jane kaise usne mahsus kar liya ki mai uske aas paas hu. Mai usse bola ki nahi mai apne quarter pe hun. Usne kaha, “Nahi Anil, aap jhuth bol rahe ho aap aas hi paas ho mera dil jhutha nahi ho sakta. Aap sach batao kaha ho aur mere ghar k samne aao.” Fir mai usko sach bata diya aur agle hi pal mai uske Ghar k samne tha aur wo apne chhat k upar. Wo us din bahut khus thi ki mai usse milne k liye adhi rat ko itne dur se aaya. Ye do premiyo ki pahli milan thi mano Jamin aur Aasman ka milan jo mil kar bhi kabhi mil nahi pate. Un dino kadake ki thandi pad rahi thi aur mai puri rat station par kapte huye bitaya. Usne kaha ki Anil aao aur ghar se chadar le jao aur subah jaldi mujhe pahucha dena.Par mai kaha nahi Anjaani Rahne do is thandi rat ka bhi ek apna maja hai.Usne puchha khana khaya hai aapne. Mai uska dil rakhne k liye bol diya ki ha Anjaani mai kha kar chala hu, tum so jao. Us station par kuchh khane ko bhi nahi tha ki mai kha kar apna pet bharta. Puri rat pet me chuhe kudte rahe aur bahar kutte bhaukte rahe. Wo thandi rat mujhpe is kadar kahar barsa rahi thi mano mere sath- sath puri dharti kaap rahi ho. Mere sharir ko sparsh karne wali Thandi hawa mere naso me Rakt ko jama rahi ho. Sadke khamosh thi aur dur-dur tak Aadam Jati ka pata nahi chal raha tha. Mere siwa bus 2-4 Railway k staff the aur samay –samay pe waha se gujrne wali kuchh traine. Aisa lag raha tha mano puri duniya se manav jati ka ant ho gaya ho aur mai wo akhiri insaan tha jo apni maut ka intjar kar raha tha. Railway staff sarkari dress me aise pratit ho rahe the mano Yamraj dwara bheje gaye Devdut ho jo mujhe apne sath le jane aaye hai aur waha se gujarti hui traine mano swanm Yamraj ho jo samay-samay par aakar unse sthiti ka jayja le rahi ho. Rat bhar nind nahi aayi aur puri rat us kadake ki thand me karwatein marne k siwa kuchh nahi kar saka. Fir subah ki train se mai Office laut aaya. Chuki Anjaani ko mera wahan aana achchha laga . Atah usse milne k liye aksar raton ko jane laga. Wo pahle ki tarah ya to khidki par hoti thi ya chhat par. Ye sab kuchh isliye kyonki wahan mera uske sath hona use achchha lagta tha. Wo pal hum dono k jindgi k sunhale pal the jise hum kabhi bhulana nahi chahenge. Hum dono ki bahut khwaish hoti thi ki hum ek dusare ko gale lagaye par ye hamari khwaish har bar hi sine me dafan ho jati thi. Itne karib hokar bhi hum dono k bich me ek fasla tha, Jise na wo khatm karna chahti thi aur na hi mai. Aisa nahi ki wo into-pattharo se bani diware ya salakhon se saji khidkiya hamare pyar se jyada majbut thi. Par ek chij thi jo hamare pyar se bhi jyada majboot thi aur wo thi hamare ghar ki Maryada aur apne Mata-Pita ki Ijjat, jo hume Virasat me mili thi. Hume is bat pe Garv tha ki hum unki santan hai. Ek aisa rista jo hum chahkar bhi nahi tod sakte kyonki hum jaha bhi rahe aur jis hal me rahe hamesha isse bandhe rahenge. Hamari jindgi apne parents dwara di gayi ek aisi saugat hai jo hamari to hai par hamesha unke sath judi hui hai. Wo hamare sath har pal hai chahe wo hamari Khusi ho ya Gum. Ye alag bat hai ki hum unke sath hai ya nahi par wo hamare janm k sath bhi hai aur mrityu k bad bhi. Bus yuhi hamare mulakto aur Mobile se baton ka silsila chalta raha. Ek–ek din bus is intzar me katate rahe ki wo ghadi bhi ek din aayegi jab hum dono k bich k sare fasle mit jayenge aur bus mai , wo aur hamare sapne jo apne sath-sath apne gharwalo k liye humne dekhen the. Hamare sath hamare parents aur unke god me khelte hamare do bachhe. Itna sab kuchh kitna achchaa lagta hai. Hum dono ka bato ka karwan din pratidin badhata gaya. Batein karte- karte aksar rat se subah ho jati thi ya fir mobile ki battery discharge ho jati thi. Ghanto batein karne k bawjud bhi hamari batein adhuri rah jati. Bus ye alam tha hamari baton aur raton ka ki hothon tak pani ki bund aate-aate hum pyase rah jate the. Hum dono ne baton hi baton me ek haquikqt ki duniya basa rakhi thi jise sapano se kahi dur samajhte the. Usme hamara do kamaron ka chhota sa ghar tha jisme hamare do ful jaise bachche ‘Sreyansh Aur Aleina’ haste huye najar aate the. Anjaani aksar mujhe Sreyansh ka Papa kahkar bulati thi aur mai use Sreyansh ki Mummy. Ek bar ki bat hai jab mai lambi Yatra k bad sham ko room pe aaya. Bahut thake hone k karan jaldi khana kha kar so gaya. Rat ko Sreyansh ki Mummy ka call aayi par gahri nind me hone k karan mujhe pata nahi chala. Usne mssage likha, “Sreyansh k papa, aap so gaye hai kya ? Plz, uthiye na hume aapse batein karni hai.” Jab mai message padha us samay rat ko do baj rahe the. Fir mai Anjaani ko call kiya. Aaj wo din yad aate hai to aankhon se aansu chhalak jate hai. Aise jane kitne hasin pal hai jo aankhon ko nam kar jatein hai. Hume is bat ka yakin ho chala tha ki Bhagwan ne hum dono ko ek dusre k liye banaya hai. Par hum shayad bhul gaye the ki is sansar me Bhagwan k alawa bhi ek shakti hai jo uski Satta ko challenge kar rahi hai aur wo hai Insaan. Humne apna rishta bakhuda nibhaya aur sath hi apne gharo ki Maryad aur Ijjat ka khyal bhi. Par humein malum nahi tha ki jin gharo ka itna khyal kar rahe hai, unme rahne wale hamare apne ek din hamare armano ka gala ghot denge aur tahas nahas kar denge khusiyon se bhare hamare Sansar ko. Akhir wo din bhi aa gaya. Jab ek taraf mera pyar aur dusre taraf mere apne. Sabse pahle mere ghar walo ko, hamare rishte ki khabar hui. Ye bat hai 14th January, 2011 ki. Mere sabhi apne ek taraf aur mera pyar aur mai dusari taraf. Sab kuchh Filmo jaisa lagta hai, hai na! Par real jindgi utni hi mushkil hoti jab hamare apne dudh ki kimat magne lagte hai. Jise hum chahkar bhi nahi chuka sakte kyonki is Sansar me kuchh chije aisi hai jiski koi kimat nahi lagayi ja sakti. Unme se Maa k dudh ka karj sabse uper aata hai. Ye hamara dudh aur khun k rishte hai, jise hum kabhi tod nahi sakte. Jab yahi rishte apne Haq ki duhai dete hai to aansuon se Aankhein bhar jati hai aur us samay marne k siwa koi aur rasta najar nahi aata jab apne kahte hai, “Ek ladki k liye apne Mata-Pita ko thukra rahe ho.” Jis pyar ko mai ibadat samajh raha tha wo ab mujhe Abhishaap aur Gunah ki tarah lag raha tha. Par yadi vastav me gunah hai to Radha aur krishn, Parvti aur Shiv bhi gunahgar hue. Fir yahi Samaj unki puja kyon karta hai. Lekin hum apno ko kaise samjhayen ki ek vyakti vishesh k liye unka sath nahi bulki wo hamara sath chhod rahe hai aur jhok dete hai gamo k sagar me jahan hum tadpte hai, rote hai, chillate hai aur jab koi rasta najar nahi aata majbur hokar maut ko gale lagate hai. Hum to bus apna rishta nibha rahe hai aur rishte hamesha jode jate hai tode nahi. Bus hum wahi kar rahen the Aur ek din uske gharwalo ko bhi hamare rishten ki bhanak ho gayi jab mere dwara diya gaya mobile pakda gaya. Fir wahi hua jo aksar do dilo k sath hota hai. Anjaani ko marne-pitne k sath daraya dhamkaya gaya. Unki Mummy ne mujhe phone karke dher sari galiyon k sath yah chetwani di kee ki yadi hum dono apne rishte ko aage badhate hai to hamari boti-boti karke chil aur kauon ko de dengi. Par hume is bat ki chinta nahi thi kyonki aaj kal chil-kauven dikhte kaha hai. Par is bat ki chinta jarur thi ki yadi hamare botiyon k sadan se Pradushan paida hoga gaya to kahin koi aur Jiv vilupt na ho jaye. Vaise bhi hum insaano ki ye fitrat si ho gayi hai na hum khud chain se rahte hai aur na hi dusare jivon ko rahne dete hai. Akhir hamare kriya kalapon se kuchh to pata chalna chahiye hamari Sabhyata ka. Wo upper wala bhi hume dekhta hoga to use bhi pachhtava hota hoga apni kriti pe jise usne vivek, bhawana, mahtawakanksha jaise Abhusano se sajakar is dharti par yah sochkar bheja ki uske dwara banayi gayi Sansar ki Sarvottam kriti hai Manav. Aur hum insaan yahan aakar……….Chhodiye jane bhi dijiye Sahab mai bhi kaha apni Kahani ko chhodkar philosophy karne laga. To kahan the hum……haaan yad aaya, Hum dono apne gharo ki Ijjat aur Maryada ki khatir sabkuchh sahte gaye. Ye Bat thi 18th april, 2011 ki subah lagbhag 7:30 baje ki. Mai unki Mummy ko bataya ki hamare bich aisa kuchh nahi hai jisse aap logo ka sir nicha ho. Hum dono ek-dusare se shaadi karna chahte hai wo bhi aap sabhi ki rajamandi se. Magar wo hamari ek bhi bat sunane ko taiyar nahin thi. Mujhse nafrat ka wahan wo aalam tha ki yadi Anjaani apne juban pe mera naam le le to mera naam aane se pahle munh par jor ki padti thi. Sachmuch yakin nahi hota ki aaj Shiksha ka vyapak swarup hone k bawjud bhi kahi-na- kahi Naitikta aur Maulikta ki kami rah gayi hai aur Shiksha ka Uddeshya kahi dur chhut gaya hai. Mai Anjaani se milne uske Coaching pe gaya wo muskura rahi thi. Mai samajh gaya ki wo apne jakhm aur dard ko mujhse chhupana chahti hai taki Anil k aankhon me aansu na aaye. Anjaani haste huye boli, “ Anil! Sabkuchh khatm ho gaya.” Uske juban se ye shabd sunkar meri aankhen bhar aayi. Hu…….Kabhi-kabhi kitna majbur hota hai Insaan jab Jivan k sangharsh me apno k virudh khada hona padta hai aur wo bhi apne Parents ke. Mai samajh raha tha jo is samay uspe bit rahi thi kyonki kuchh din pahle ye sab kuchh mujh pe bit chuka tha. Anjaani nahi chahti thi ki uski wajah se meri Jaan jaye. Bus wo itna chahti thi ki mai jaha rahu jinda rahu aur khus rahu. Isliye mujhse fasla banana behtar samajhi. Maine use samajhaya, “Anjaani ! Mai tumse dur rahkar jinda to rah sakta hu par khus nahi. Waise bhi hum sirf apne liye nahi ji rahe hai. Hum ji rahe hai apne aane wale kal k liye jahan kisi mod pe hamare bachche ‘Sreyansh aur Aleina’ apne mata pita ka intjaar kar rahe hai. Jab hum ek dusare k Jivansathi hai to hum ek saath aane wale mushkilon ka samna karenge. Chahe hamari jindgi 2-4 pal ki hi kyon na ho par wo pal hume ek saath gujarne hai. Yadi aisa hum nahi kar sake to hamara rishta ek gali banker rah jayega aur hume hamesha k liye Badchalan aur aawara ka nam diya jayega. Jab hum sab kuchh sochkar apne rishte ko aage badhaye hai to hume ek Pak anjaam tak pahuchana hai, chahen hum is duniya me rahe ya na rahe. Ha magar hamari soch rahe aur iske sath Anjaani-Anil ka pyar.” Use meri bat kuchh-kuchh samajh me aane lagi thi. Ek bar fir hum dono ne apne aane wale kal k liye aaj ko bhulakar ek nayi udan k liye khud ko taiyar kiye. Is dauran main apne parents ko mana liya magar unke parents abhi tak hamare rishte k liye taiyar nahi huye. We ye mankar chal rahe the ki hum dono ka rishta khatm ho chukka hai. Ek din achanak unhe khabar hui ki hum dono me aaj bhi baton ka silsila kayam hai. Mummy ne ek bar fir Anjaani ki pitayi ki aur gale me rassi kas di. Fir bhi Anjaani ne kuchh virodh nahi kiya. Sabkuchh sahti gayi. Bus itna hi boli ki hume jo karna tha hum kiye. Ab apko jo karna hai kariye. Kabhi-kabhi ek Maa kitna nirdyi ho jati hai ki apne hi Jigar k tukade ki Jaan ki pyasi ban jati hai; is bat ka yakin nahi hota. Anjaani Chhatpitati rahi par Mummy ne gale se Rassi ka fanda nahi nikala. Wo to ganimat tha ki Anjaani ki didi ne hastkshep karke uski Jaan bachayi, nahi to us din ek Maan k hathon uski beti ki Jaan chali jati. Jab mai Anjaani ko dekhne uske Coaching Class pe gaya to uske chehre pe Ghavon aur gardan pe rassi k nishaan ko dekhkar rone laga. Aaj bhi uske chehre par pahle ki tarah Muskan thi. Jitna majboot wo hai mai nahi kyonki wo har paristhitiyon ka haskar samna karti hai. Sachmuch us samay wo duniya me sabse adhik Samjhdar aur Shaktishali aurat lag rahi thi jise mai apni patni k rup me paya tha. Anjaani haste huye boli, “Ab Kuchh nahi hone wala.” Usne mujhe bataya, “Anil yadi hum dono shaadi karte hai to hamare parents hamare sath-sath samuhik rup se khud ko mar denge. Aisa unka kahna hai aur mai nahi chahti ki hamare karan kisi ki Jaan jaye. Hum apna rishta nibhakar kya karenge ki hamare apne hamare karan is duniya me nahi rahenge.” Yakinan mahan soch tha Anjaani ka aur Usse bhi bada uska Tyag jo apne parents ki khusiyon ki khatir karne ko taiyar thi. Shayad bhartiya Itihas me ye pahli bar hua ki koi Pativrata patni apne gharwalon k liye apne Pati ko chhodne ko taiyar ho gayi. Kash aisi soch hamare bade bhi rakhte. Sachmuch us din hamare apne kitne galat the aur galat rahenge kyonki wo ek rishte ko todne k liye kisi ki Jaan lene ko taiyar hai aur hum apne rishte ko bachane k liye apni Jaan dene ko taiyar the. Use jitna apno se ladna tha lad chuki thi aur ander se tut chuki thi. Aage usme himmat nahi rahi ki hamare rishte ko jinda rakh sake. Anjaanj ne kaha, “Anil kahi se Jahar lakar de dijiye mai marna chahti hu kyonki is samsya ka koi aur samadhan nahi hai.” Mai bola nahi Anjaani yadi marna hi hai to hum sath marenge par Paristhitiyon se bhagkar nahi bulki ladte hue. Ab mobile pe hamari batein band ho gayi. Unhi dino ek bar Anjaani ka phone aaya bhi to mai use mana kar diya. Mujhe is bat ka dar tha kee ki yadi aaj Gala dabaya gaya hai to ho sakta hai wo log Anjaani ka kal gala kat de.Akhir ek aurat ko hi to sab kuchh sahna padta hai. Aaj ek aurat ki sabse badi dushman ek aurat hi hai. Isliye mai use Coaching pe hi Saptah me ek ya do bar mil liya karta tha. Us dauran mujhe shak tha par yakin nahi ki wo puri tarah se tut chuki hai. Hamare khusiyon aur Armano se saje chhoti si Duniya ko isliye ujad chuki thi taki hamare apno ka Ghar basa rahe aur apne aansuo ko Chahardiwali k andar kaid kar li taki uski siskiya bahar na ja sake. Jald hi Anjaani ka coaching jana band ho gaya. Uska coaching classes na karne k karan, ab mera usse milna julna bhi band ho gaya. Bus udher wo tadpti rahi aur idhar mai. Isi dauran jab mai 17oct-21oct ,2011 k bich apni training k liye Lucknow tha tabhi 20th oct, 2011 ko training class se nikalkar Shaam ko lagbhag 6:30 baje jab hotel pahucha tabhi Anjaani ka Phone aaya, “Hum ab aapse Shaadi nahi karna chahte. Koi prayas mat kariye. Koi fayda nahi hoga.” Yah sunkar mai pagal sa ho gaya. Mano mere pairo talon se Jamin khinch li gayi ho. Mere rone aur Chillane se us hotel ki diwaren gunj uthi. Magar afsos is bat ka tha ki meri karur awaz sunkar wo fati nahi. Anjaani k ghar k sare mobile switch off kar diya gaya. Sara masla mujhe samajh me aane laga ki use jabrjasti phone karaya gaya hai. Usne to Dil pe patthar rakhkar mujhse to kah diya par khud ander hi ander ghutati rahi. Ek ghante k bad Anjaani k ghar ka number laga aur Mummy se bat hui. Mai unse vinati kiya ki hume alag na kare par mujhe galiyon aur dhamkiyon k alawa kuchh nahi mila. Tab se lekar aaj tak roj Jita hu aur roj Marta hu. Ab to kisi Chamtkar ka intjaar karta hu ki hamare apne apni rudhiwadi paramparao ko chhodkar kash hamare khusiyon k bare me sochen taki apni Anjaani se bichhada ye Anil mil jaye. Nahi to jine ki Aasha jati rahi…………………………........... ....................................yet to be end Usne to apne tadap aur dard ke sath jina sikh liya. Par mujhe charon taraf andhero k siwa kuchh najar nahi aata. Aaj mai us dard aur taklif ko isliye bayan kar rah hu taki aap log bhi ise mahsus karen. Mai is duniya me akela nahi hu jo mere sath huwa hai. Jaane kitne hamare jaise ‘Anjaani aur Anil’ hai jinki kahani adhuri rah jati hai. Shayad aap bhi unme se ek ho . Fir aap kyon chahte hai ki jo aapke sath huwa, wo auro k sath bhi ho. Fir Insaanon aur Janwaron me fark hi kya raha? Mai nahi chahta ki jo Anjaam ‘Anjaani aur Anil’ jaise rishton ka hota aaya hai wo bhavishya me fir kisi aur ‘Anjaani aur Anil’ k sath ho. Yadi mere prayas se koi Mata-Pita apne bachcho ki khusiyon ki khatir samne aate hai ya fir yah samaj ek bar fir sire se Jat-Pat jaise vishayon pe vichar karta hai to mai samjhunga ki mera prayas safal ho gaya. Hume kisi system se narajgi nahi hai bulki apko hamari khusiyon se narajgi hai. Hum apka sath chhodna nahi chahte bulki aap hume apne rishte ki duhayi dekar alag karna chahte ho. Hume aapki jindgi jine se koi aaitraj nahi hai. Par hume apni jindgi jine ka aadhikar chahiye. Aap bhi sochon, humme se kaun galat hai aur kaun sahi. Ek taraf koi rishta jodna chahta hai aur dusari taraf koi rishta todna chahta hai…... . Posted by - shivam
Posted on: Sun, 21 Jul 2013 16:43:44 +0000
Trending Topics
Recently Viewed Topics
© 2015