Mizoram Home Guard zingah hian an duty boot rawng sâng hi bun ve duh miah lo pakhat a awm a, a chhan chu a pën zawnga a pheikhawk tlângin a zùzu a hrùt phak thin vang a ni. Vawi khat pawh an hotupan a bun luihtir rawk mai a, a duty-na hmunah zankhuain a pen nui uar uar mai. Chu pa chu Home Guard parade-a tel turin vawi khat chu thlan a ni ve tawh a, mahse a rifle ahin leiah a hawlh kalh tlat zel a, a penpui theih miau loh avangin thlan nawn a hlawh leh ta lo. Pa lian a ni lem bik lo a, a din hian lei a rap phak chang chang. Ls Kawlni sawi dan phei chuan kun miah lovin 407 hnuaiah a lut dûn dûn thei a, polythene a khai pawhin a mawng a hrût pawp ziah a ni awm e. A tet lai chuan a nu hian a țhan duh nan tiin zing tin a silipar-ah DDT leh vawk ek a phulsak țhin a, mahse pa lian chu chawm an hautak mai mai e tia rilru thlakin an bonsai leh ta zawk a ni. Passport size thlalakah hian a taksa hmun li-a țhena hmun thum chu a lang kim biai țhin nghe nghe. Thu ziak thiam tak a ni a, amah la hmu miah lo pawh hi ngai sangtu eng emaw zat a nei. USA-a amah ngai sangtu nula pakhatin zungbun a rawn thawn phei chu a ke zungpuiah a bun tawk chiah. Mi rinawm tak a ni a, Thakthing Bazar-a cheng sing riat teh meuh a chhar țum pawhin zarda pân leh Center Fresh lei nana cheng riat a hman heu bak chu a neitu hnenah a hlan let leh thlap. Internet pack leh zarda pân a neih chuan eng dang a ngai lo va, khawi hmunah pawh mawng aikhirh mup khawpin a thu thei zel. Hmeichhe nazawng hian a lung a tileng pha ngai lo va, nupui atan tia kan han hmehbel ve ngial pawh hi a ni chuan nuihpui atan bak a lo ti ngai meuh lo. Nula, kum hnih kum thum kan han bëm ve dek deka lo yes nghal ngawt ang chi hi chu ngaihzawng atan ka duk țhak lo; an easy hmel em mai, a ti nghe nghe. Tuna a bialnu pawh hi love letter, envelope pâra thun uar laia a bëm țan tawh kha a nia, whatsapp hmangin chhanna a dawng chiah. Chu pa chu itsikna thinlung pianpui map lo, mi tu pawh an hlawhtlinnaa thinlung taka lawmpui em em thei zel mi, mi sual ber pawh an țhat lohna hai dera an thatna lai chauh hmuh vàwngsak zeltu, amah ka țhianpa, tlangval Duhawma Kawlni ngei chu a ni. Vawiin hi chu ka thianpa pianchampha phak chu a ni a, nuam taka hmang tura duhsakna ka hlan rualin, a thu leh hla thiamna, sawi fiah rual loha ril hmang hian kum tam tak Zofate min awi tlei turin kan beisei a ni tih hi ka chah duh bawk. Thianpa, he i tana ni special, kum 20 leh thla 180 i tlinna ni hi hlim takin lo hmang ang che.
Posted on: Wed, 10 Dec 2014 08:56:55 +0000
Trending Topics
Recently Viewed Topics
© 2015