NANTA - episod 136 | Tumu Pagi Nganjung Alex seduai Jedon Pulai (repost) Pukul 5pagi undur, datai di pangkalan di pasar di ili din pukul 6:30pagi. Kira ke laju meh injin bot pasang Nanta. Laban undur kira ke nyamai agi ari mudik. Nitihka aris ai sungai aja. Enda dipasang injin, anyut meh perau. Datai di pangkalan, Nanta belalai nyuaka duit tiga ribu rm ngagai Alex. Alex paham, tang enda bejaku. Iya nemu maksud Nanta. Seduai endang udah bebinchang pasal nya malam tadi. Nanta ngenggam iya jari Jedon. Lembau amat iya beserara enggau Jedon, taja pan enda lama. Pengerindu seduai udah mansau amat. Nganti ke nanggal ari tampuk. Enti nadai penanggul, tentu ulih ambi Nanta. Diempu iya. Enda ibuh ia begitang ai, nadai orang menggi. Nanta seduai Sawai lalu ke pasar. Bemain-main din, kenu ko Nanta madahka iya. Meda china. Udah lelengau china ka tua, ngemuka madi iya Sawai. Tang ni china ngelala seduai. Bisi pan semina Towkay Leong ke alai Nanta selalu bejualka getah, lada enggau buah pisang. China ke bukai mina ngelala duit seduai. Mayuh utai dibeli Nanta. Iran ga ati Sawai tang iya enggai nanya. Dipeda iya, madai iya Nanta nya baka ke berubah mood. Enda tentu riang baka selama. Biasa nya Nanta ka betundi. Selalu betundi, tang sekali tu, madi iya nadai mayuh jaku. Macham serius aja iya bebeli ka utai. Sebendar ia, Nanta sediaka rami ujung minggu ke ka datai. Ti nadai penanggul, Nanta ka ka Sawai seduai Alex duduk besanding di atas tawak hari enam minggu ke ka datai tu ila. Bisi Sawai ninga resu nya ari randau sida ba bilik kemari. Tang Sawai enda tentu nemu enggau nyemetak. Nadai nadai madahka iya utai ke nyengala. Nanta pan enggai nyadi madahka Sawai ranchangan ke sebendar, laban Nanta empu pan enda nemu sekalika amat ke enda sida apai-indai Alex ngasuh iya bebini. Nanta enggai enda besedia, laban iya ngarapka ranchangan sida nya nyadi. Jedon nemu. Sebendar ia, ranchangan nya ari idea Jedon. "Meli gari nuan madi," ko Nanta madahka Sawai. "Aku ka meh. Aram tua ke mall nyin." Nanta ka ka Sawai begari manah ujung minggu tu ila. Iya ka meda madi iya bajik ba mua orang mayuh. Action aja Nanta ka bebelika gari ka iya empu. Sebendar ia, iya ngasuh Sawai meli gari ke deka iya empu. Nanta sanggup meli nya ka Sawai. Pulai seduai ke pangkalan numpang van. Kelalu mayuh ai enggau utai bukai dibeli Nanta. Tentu sarat perau seduai mudik ke ulu legi. "We are on the way back," pesan singkat Nanta diterima telepon Sawai. "Udah magang utai ke perlu," tambah Nanta, sms ke Jedon. "Take care," ko Jedon malas pesan singkat Nanta. " I love you." "I love you too," ko Nanta, malas enggi Jedon. Seduai Sawai pan mudik. Pulai ke ulu baru. Sawai ke ngeluan duduk manah laban perau seduai kelalu sarat. Nanta pan bejimat, enda nguitka perau enggau ngenyit. Datai seduai di pendai sida, Jimbai, Doman, Achom enggai sida bukai nulong Nanta seduai Sawai ngangkatka utai ari perau. Jedon seduai Alex udah di tempat kerja. Nadai penanggul seduai taja pan tumu-tumu nurun ari ulu. Seduai sama-sama ngirum teks ngagai apai indai seduai pasal ranchangan ujung minggu. Apai indai Alex enda tekenyit, tang ia ke tekenyit angka apai indai Jedon. Arapka ranchangan sida mujur nitihka ke udah diatur. ~ >> (besambung)
Posted on: Wed, 25 Sep 2013 18:02:12 +0000
Trending Topics
Recently Viewed Topics
© 2015