NANTA - episod 52 (v) Lelengau. Sama lelengau ka pangan diri. Baka nya meh gaya ia di ili enggau di ulu. Tang lapa nangguh ti ati udah sama baka nya. Lapa mesti nganti maya ke lebih menyana, ala bepadu ka rindu, alai besaumka jaku. Jadi meh. Anang keh-keh. Anang bedalih. Enda semudah nya, ko Nantu bepikir dalam ati. Bebini belaki ukai baka ke bepangan. Nyamai milih. Nadai beleman. Tang bebini belaki mina sekali. Idup selama lama ia sampai ka parai. Nya-alai pengerindu mesti chukup mansau. Ngambi begulai sejalai enda tebasau. Nambahka nya, restu enggau blessing apai indai mesti bisi. Setuju sida mesti diambi. Anak orang enda tau dijingkau ngapa. Mesti berandau dulu, mesti betunga. Ti udah sama bela setuju, nya baru tau dipaju. Nya baru tau dipetemu. Nya baru ka nyadi diadu. Sapa ke nguai ke enda, nya pekara bukai. Ni ke ngugi nyau aum apai indai. Taja pia, pikir Nanta iya mesti berunding ka hal madi iya Sawai dulu. Kasih ga Sawai ti enda diadu ka dulu. Enggai nyadi iya ngelakka Sawai kapa-kapa enti ditinggal ka iya. Isa seduai enda jadi laban mali, sekurang-kurang ia, Sawai mesti digiga ka laki sebedau Nanta bebini. Chara baka nya, enda Sawai asa, laban udah dulu belaki sebedau Nanta bebini. Ba runding Nanta, Alex nya meh ka disabung iya enggau Sawai. Nya-lalai Nanta mesti ngiga jalai kati neleba ka Alex seduai Sawai. Ngambi ka teleba dulu, bisi udah labuh jaku, bisi pengerindu ka pangan diri. Kediatu nganti dulu. Nanta agi bepikir chara ke paling sesuai alai nyantilka pengerindu seduai; awakka nyadi ba semai padi di tisi paya sida; awakka tumbuh bauh baka semai sampai ke nyadi padi tuai; betangkai, beisi, bebuah sampai ke jemah. Sekurang-kurang ia, nya meh jalai Nanta malas pengerindu Sawai. Taja enggai seduai tebengkalai, Sawai tetap madi iya; perlu diatur enggau naka pemandai, perlu dipikir dulu sebedau semua utai. Enti Sawai senang, Nanta pan lantang. Nadai agi utai nekul nanggul ba ati, nadai agi masalah Sawai diketati. Lalu sida pan ulih begulai sejalai diri sebilik; begulai idup siti penaik. Agi ulih betundi, agi ulih bebuti, agi ulih begagai baka diri menyadi. "Makai semakai, nuan Sawai. Nama tak menung aja ari tadi," ko Nanta nibar ka jaku ngawai Sawai, nguti madi iya Sawai. "Ahh ngigau Nanta nya indai. Iya ke enda berengu ari tadi. Nama enda utai runding iya nya, " ko Sawai nyaut. Nanta senyum aja; enda nyaut agi. Indai iya malik ngagai iya, iran ati ka telatah Nanta. Kuit-kuit ka Nanta burit iya empu, ngangkatka diri lalu belagu. "Enti aku ulih, enti ku ulih, ahai, ahai.. dam da di dam (bisi buah asam) nyawa ku raguk, nadai buah chiruk... Enti ku ulih, enti ku ulih, ahai, ahai dam da di dam (bisi buah maram) rekung ku raguk, nya Sawai ngantuk. dam di dam..ka makai buah asam" ~~ " Puu lagu nama ngedi nya," Ko Sawai. "Lagu reka kediri," ko Nanta nyaut. Sawai enggau indai iya nyau engkakah ketawa, geli ati ninga lagu gila-gila Nanta. >>
Posted on: Sun, 11 Aug 2013 16:41:54 +0000