NEPALI POPSTAR LAR ANJU PANTA KRISTIAN-AH A INLET Nepal rama celebrity lar ber te zing ami, zaithiam lar tak mai, Anju Panta chu Hindu atangin Kristian-ah a inlet a, sum tam tak hlawha Hindu kut a Hindu hla sa tura sawmna chu hnawlin hei hian Nepal ram chhungah sawi a hlawh hle a, Hindu firfiakte chuan tawngkam dengkhawng tak takin an bei let. Hetih lai hian Kristiana inlet Anju Panta chuan, “Ka rinna hian pathian lemte biakna hla lam sak min phalsak tawh lo,” tia sawiin “Ka thu tlukna sawiseltute leh min demtute hnenah engmah sawi tur ka nei lo. Pathian khawngaihna hnuaiah ka awm tawh a, engkim hi Pathian remruatna vekah ka pawm a ni,” tiin a sawi. Asia Times chanchinbuin a tarlan danin Anju Panta hi kum 2002 khan Nepal zaithiam lar Manoj Raj Siwakoti nen inneiin fanu an nei a. A pasal nena an inthen fel leh hnuah kawng tam taka inhmuchhuakin Kristiana inlet turin thutlukna a siam ta a ni. Anju Panta hi kum 2009 December khan Close Up hits FM Music Award (Nepal-a an music award lian ber) ah Best singer leh Best Song of the Year lawmman te hlan a lo ni tawh a, a hla ‘Nibirse Timilai’ chu Nepal rama hla lar ber a ni nghe nghe. Kristiana a inleh hnu hian Krista lal leh chhandamtua a neih dan, harsatna leh beihna a tawh a Pathianin a awmpui dan chungchang ‘Jaba Ma Prabhuko Bhayar Jiuna Thale Nirasama Shanti paya’ chu a phuah nghe nghe a ni. Hetih lai hian Fr Silas Bogati chuan, “Nepal rama Hindu atanga Kristiana inlet tur hian harsatna tam tak paltlang a ngai a, tihduhdahna leh hmuhsitna te tuar inhuam a ngai a ni,” tiin a sawi, Nepal ramah hian mihring maktaduai 26 chuang an awm a, Kristian erawh 1,50,000 vel chauh an awm a ni. -Lunglei Chanchinthar
Posted on: Tue, 14 Oct 2014 12:45:36 +0000
Trending Topics
Recently Viewed Topics
© 2015