OBITUARY : REV. F. LALTLANTHANGA (61) Rev. F. Laltlanthanga (kum 61), Tuikual Bialtu Pastor chu July 12, 2014 (Inrinni) zan dar 8:30 khan Cancer natnain a thi a, a ruang hi vawiin (July 13, 2014) chawhnu dar 1 khan vui a ni. Rev. F. Laltlanthanga hi June 14, 1953 khan Puallawi khuah a lo piang a. A pa chu Chaldailova a ni a, a nu chu Vanlengpuii a ni. An Unau hi Paruk an ni a, Mipa pali leh hmeichhe pahnih an ni a, a upa ber dawttu a ni. Mautam tam avangin 1960-ah Puallawi atangin Champhai Tlangsamah an pem a. Khawkhawm avangin Zote lamah te khawm an ni a, a hnuah chuan Tlangsamah hian an kir leh a ni. Aizawl Zotlang vengah In a nei a, Loan te pukin harsa takin In hmun a ngaihtuah a,Patling chuan ama pualin IN a nei ngei tur a ni a tih thin chu a hlen ta a ni. ZIRNA LAM : Kum1963-ah Pawl thum a pass a, Rambuai avang in kum 6 zet sikul chawlin Kum 19 mi niin pawl ruk a zir tha leh a. Harsatna leh retheihna karah 1977 khan Matric a pass a, 1979-ah Aizawl Theological College-ah B.Th zirin a lut thla a. ATC a B.Th a zir lai hian, Students Body-ah President leh General Secretary te ni thina, SCM-ah te hruaitu a ni thin bawk. 1982 khan B.Th chu a zir zo a, B.Th a zir zawh kum hian vanduaithlak takin a pa in a boral san a ni. Pastor ni chungin B.D. chu private-in a zir zo leh a ni. CHHUNGKUA: Kum1982 khan Chaldailova leh Hrangkungi te fanu Sangchhingpuii nen an innei a, fapa pahnih F. Vanlalrochana leh Lalmuankima Fanai Pakhup te an nei a. Lalmuankima Fanai Pakhup hian nupui nei tawhin, a nupui Malsawmtluangi nen Fapa pakhat Laltlanpuia Fanai Pakhup an nei a, a pa rawngbawlna chhunzawmin Missionary rawngbawl hna a chelh mek a ni. RAWNGBAWLNA LAM: Hun pum rawngbawl tura a chhuah hma hian Tlangsam KTP-ah hruaitu a ni thina, Fin. Secretary leh Asst. Secretary te a lo ni tawh a, YMA-ah te Office Bearers a ni thinbawk. Kohhran rawngbawlna lamah NPSS Intermediate Department Leader leh Pathianni zan thuhriltu a ni thinbawk. A nu leh pa ten a naupan lai atanginPastor tura hlan thina ni a, kum 1975-ah Pianthar harhna a chang a. A pianthar hlim atangina nu leh pa ten Pathian hnena an hlana chu a rilruah a awm ve leh tan ta a, kum 1979-ah Aizawl Theological College-ah hun puma rawngbawl tumin Pathian thu zirin a lut ta a ni. Vanzau, N.E. Bualpui leh Kawlkulh-ah te Pro Pastor hnathawkin a awm a. Kum 1985 Synod-Inkhawmpui in pastor atan a nem nghet a. Pastor atana nemngheh a nih hnu hian, Phuaibuang Bialah te, Ruantlangah bialah te, Bilkhawthlir Bialah te, Chawnpui Bialah te, Ramhlun North Bialah te leh tuna a vawn lai Tuikual Bialah te Pastor rawngbawl hna thawkin a awm leh a ni. Pastor a nih hnu hian heng chanvo te hi a lo chelh tawh thinbawk - Bial Chairman tum 8 Presbytery Moderator tum 3 Synod Level Committee-Synod Executive Committee, Pastoral Committee, MSSU, Literature & Publication Board, Synod Mission Board a ni a. Tunah hian Synod Hospital Board Executive Member ni lai mek a ni bawk. Rawnga bawl chhung hian Bial, Presbytery leh Synod hnuaiah chanvo hrang hrang a chelh thina. Committee pawimawh hrang hrangah te telin Bial vawnga kohhran enkawl bakah a mawhphurhna te theih tawp chhuahin a thawk thin a, kohhran tana mi thahnem ngai leh kohhran chu No. 1 a dah thinmi a ni. Pastoral Ministry a mi tui a ni a Bial vawn leh kohhran enkawl chu a nuam tih ber leh a tuina ber a ni. 2013 August thlaa a dam loh tak avangin 2013 chhungin a bial chhung kohhran in tinin a tlawh chhuak hman ta lo a. A dam loh hma zawng hi chuan kum tinin a bial chhunga Kohhran intina lutin a tlawh chhuak thin a ni. Chhungkualeh ama hriselna ai pawha Kohhran rawngbawlna dah pawimawh mi a ni a. A fate an dam loh emaw, a nupui a dam loha khuma a mut reng lai pawhin, Bial fan a thulh ngai chuang lo a, a bial fan a lo hun chuan a kal mai zel a ni. “Anni chu Pathian kutah an awm a lawm,” a ti mai thin. Kohhrantana tha turah chuan huaisen taka hma la thina ni a, administration a ngai pawimawh a, Mi lawmna siam ngawr ngawr ai chuan min haw dawn pawh ni se, khuareia kohhran tana tha tur hi Pathian rawngbawltu chuan a ngai pawimawh tur a ni, a ti thin. Tlinglotak leh chaklo tak chungin Kross chakna rinchhan a rawngbawl tura kal zel thina ni a, Lalpa lung tih awi zel hi a tum ber a ni thin. Kumin hian Bial Inkhawmpui Chairman tura ruat a ni a, amah pawhin hlen ngei tumin a bei a, mahse a taksa chaklohna avangin a hlen thei ta lo a ni. THUZIAK LAM: Thuziakmi chu a ni hauh lo a. Chutih rual chuan, Bial chhung chanchinbu leh Souvenir hrang hranga sawmna avangin sermon leh article engemaw zat a ziak ve tawh a. Seminar leh Training paper 100 chuang Abrahama Zinkawng (Published 2004) Jakoba Zinkawng (Press a awm mek) Tunlai Thalai te nun leh a kaihhnawih (booklet-2006) Pathian Biak hona leh a kaihhnawih (booklet 2006) Hla2 (pahnih) a phuah ve bawk. A DAMLOH THU: Hun rei tak chhung a Kawng lam insawiselna a lo neih tawh chu, kum 2013 August thla khan a inentir a, Chuap cancer a ni tih an lo hmu chhuak ta a. Cancer a vei na a, a natna avang hian a zam hauh lo a. Na ti awm ang pawhin a awm ngai lo a, a ke lamah te harsatna a han tawk zual leh zel chung pawhin a rilru chu a zam ngailo a, na awm ang pawhin a awm duh ngai lo a. Pathian hnena lawmthu sawi a thulh ngai lo a ni. Ka natna hi pa taka tuar tur a ni a ti a, nikhua a hriat chhung zawngin Pathian hnena lawmthu sawiin a awm a ni. June thlaah Damdawi Inah an lut a, a tha deuha an hriat avangin In lamah ah hawpui a ni a, July 12, 2014 (Inrinni) zing a tangin a thawk a buai zual a. Thih hlauhthawn awmin a awm ta a. Chhun dar 12:30-a a na zual chu zawi zawiin a a thawk a muang riai riai a, Engkim zawng aia a thlan zawk, khawngaiha rawngbawl tura thlangtu hnen lam chu hmangaih taka a enkawl mek Tuikual Pastor Bial Pastor Quarters atangin July 12, 2014 zan dar 8:30 khan a pan ta a ni. Mi tawrhchhel em em a ni a, a thawk tawp thlengin na tuar awm pawhin a awm duh lo a, ngawi rengin hah dam takin Chatuan Ram Engmawiah a chawl ta a ni.
Posted on: Sun, 13 Jul 2014 10:11:58 +0000
Trending Topics
Recently Viewed Topics
© 2015