One Day Dengue Awareness Campaign Lamka, Sept. 17: State Malaria Officer guanggalna’n tusun dak 10:30 in Mini Conference hall, CMO campus ah ‘One Day Dengue Awareness Campaign’ a um a, zia hun achun Krishna, Entomologist; Kamini, Biologist; Gope Krishna, Consultant, IEC/PCC leh Liana, MHW/Assistant te’n Vector Borne Disease Control Society nuai ah staff te chu dengue tawh kisai a zilsak ui. Zia zaw chun Male Health Worker te’n khawpi sung ah Chiengkawnpang, D. Phailien, Gochinkhup Veng, New Lamka; Lailam Veng leh Hiangtam Lamka te ah thoukang no tawh kisai in survey a chiau a, zia hun achun inn neite kiang ah tui apat thokang umthei ahi dan leh kepthiangtho ding dan leh kiven tup dingdan te a ziltil malam pek ui. Public Information Bureau Campaign nei ding Lamka, Sept. 17: Public Information Bureau campaign kiti B. Vengnuam Community hall ah September 24 – 26, 2014 leh um ding ahia, zia chu khuallian ah September 24, 2014 zingkal leh Thangso Baite, MP in honna nei ding ahia, Demmang Haokip, Vice Chairman, ADCC leh PK. Jha, IAS, DC/CCPur te chu functional president leh guest of honour ah pang ding ahia, zia ni achun free Medical camp le um ding ahi. Zia hun matna September 25 & 26, 2014 leh National Programmed/Scheme nuai ah na kisemte concerned department te’n suklatna nei ding ahiu a, ziate chu National Health Mission, SSA & Mid-day meal, National Rural Employment Guarantees Act (NREGA), Pension Schemes ICDS, Total sanitation campaign (TSC), Bharat Nirmal package - Rural Housing, Rural Drinking Water supply, Rural Road connectivity, Rural Telephony, & Rural Electricity leh a dangdangte hiding ahi. Jangginthang luang mudok; vuiliam hita Lamka, Sept. 17: Zanitak dak 3:00 vel ah Mualkot lei kiang ah Tuitha lui ah ketha Jangginthang Haokip(18) s/o Thangkai Haokip of Gaspani, Nagaland luang chu zanitak ah muzawlo ah a um nungin tuzingkal dak 6:40 vel ah a kiatna mun apat gamlalo ah mudaw in a um hi. A kigendan achun Jangginthang luang chu tawmngai pawl chuamchuam in zanitak ah a mudawlo ziak un tuzingkal matak apat veng chuamchuam ah tawmngai pawl te’n a hawl nungun a kiatthakna mun apat meter 50 vel ah gamla ah tuili sung chu gawpum mang ah a dawt vel vel nau in a sunkhau a, zia phat achun Lalhmingthang Sungte of Ngurte chun a luang chu tuilak apat a valadok a, a luang chu a Innkuante piakdaw ahi nungin MLA & MTDC Chairman T. Manga Vaiphei inn, Red Cross Road tut ahi nungin tuni’n New Christian cemetery ah vuiliam in a um hi. GSO in felicitation cum fresher’s meet mang Lamka, Sept. 17: Gangte Students’ Organization, Churachandpur College guanggalna’n tunizingkal dak 11:00 in Tribal Museum hall, Hill Town ah ‘felicitation cum fresher’s meet’ a mang ua, zia hun achun S. Lungin Gangte, Ministry of Finance nuai ah Manipur Rural Bank ( board of director ) in khuallian hina tawh a uap hi. Chun, T. Songminlun Gangte, General Secretary, GSO GHQ leh Dr. Lalzogou Neihsial, Associate Professor, Ccpur College te’n guest of honour leh functional hina tawh zia hun chu a uap ui. Zia hun ah khuallian in a thugenna chun Gangte Students Organisation chu 1950 lai vel apat ala kipan in hun chiasa te a nungthil kit leh lunghel um a sak thu a gen a, GSO a ding ah pan ala la masa Pu TS Gangte zana sangtak pia ahi dan a gen banah ama panlakna ziak ah Churachandpur College phudaw ah um hi’n agen a, ama panlakna ziak ah tu ah mi tamtak te’n inn-lum ah graduate tiang zilthei ah um hi’n agen hi. Students organisation hina dawl ah masang ding mi zosia’n ngaitua ahi dan gen in lekha simna lam ah nasatak ah panla ding in chialna a bawl a, tu dinmun ah society sung niamcha gual in kilang maleh students te’n theitawpsua panlak poimaw hi’n agen a, I umna mun chiat ah theitawp leh gunchuna tawh lekha sim zing poimaw hi’n agen hi. Chun, lekha simna kawng ah numei khenkhat ki thadai sek uh hi’n agen a, thupil in numei khat lekha a het leh inn-kuan 2 lekha hia a suak hi a ti gual ah inn-kuan siamtupna ding ah numei te lekha hiat poimaw mama hi’n agen hi. Zia hun achun Special invitee ah Hilltown hausa Dongzakai Gangte leh mi chuamchuam a pang ua, Invited Artist ah Evangelical Union, Ccpur College; Julie Mawi Gangte leh Nunthar Gangte a pang ui. Gangte Student Organisation, Churachandpur College unit pang ah college chuamchuam apat fresher’s 45 leh Graduated student 20 te chu Rev. Thangkhosiem Gangte, Executive Secretary, ESC in a pauchap piak a, L. Pangamte, Vice Principal, CCpur College in tilkhona thu a gen piak hi. Mi tamtak in Student 7 soisa Lamka, Sept. 17: Moirang Police Station apat gamlalo ah um Moirang Hr. Secondary School Students mi 7 chu tunitak dak 2:30 vel in School apat a Innlam uh zuan Tedim Road in a hawkhak Otsangbung ah mi 40 val ding in ala kivuak huan ua, amau chu Churachandpur district hospital casualty tut ahi nungun a gim talua a umlo ziakun dressing bawl ahi zaw in a Innlam ua ki enkol ding ah sawl in a um kit ui. A kigen dan achun tuzingkal lam ah Moirang Hr. Sec. School huangsung ah pawsal mi 4/5 vel in zu a dawn ua, amau chu student te chun zia mun ah zudawn hoilo ahi ti’n ava gen ua leh kinial buai in Police te’n a genveng nung un School pel hun ah Kwakta apat student 7 te chu Diesel Auto ah chuanglai Otsangbung ah pawsal hunkhop in ala kham in ala vawk uh hi’n a kigen a, zia ziak achun Kwakta ah mipi sousang ma ma ah a um ziakun SDPO Moirang mapui in Police team in Kwakta a del ui. Gari phutkhak mi 2 hospital tung Lamka, Sept. 17: Hangpu (3) s/o Seigin of L. Puiphai village chu tuzingkal dak 8:30 vel in Kaprang ah Tata Magic in a phukha, a luchang a liam ziakin Churachandpur district hospital ah etkol in a um hi. Chun, Saruk Khan(13) s/o Zaman Khan of Kwakta chu tuni nitaklam dak 3:00 vel in Kwakta ah Scooter in a phukha, a mai a liam ziakin hospital ah etkol in a um hi. Sum bet ah football kihel ding Lamka, Sept. 17: Khawlmun Play Ground ah September 19, 2014 sunnung dak 2:30 leh Sport Club of Leatherette team leh Gawthol Football Club te’n Rs. 10,000/- bet ah friendly match nei ding hi un a kigen hi.
Posted on: Thu, 18 Sep 2014 11:45:49 +0000
Trending Topics
Recently Viewed Topics
© 2015