Otro iniciativa comercial di Aruba Bank ‘3-DAY CORPORATE LECTURE SERIES’ TA PRIMINTI DI BIRA ALGO GRANDI E mundo di comercio constantemente tin desaroyo nobo y p’esey mes Aruba Bank ta organisa un “3-Day Corporate Lecture Series” pa tur su clientenan entrepreneurs y comerciante, pa keda al tanto di desaroyonan. E serie di lectura aki lo ta tuma luga na Renaissance Convention Center, cuminsando for di diamars 27 di augustus proximo y lo termina dia 29 di augustus, 2013. E lecturanan aki lo tuma lugar di 8:30 pa 11:30 di mainta. E “3-Day Corporate Lecture Series” ta similar na e lectura cu Aruba Bank a organisa na juni den e Young Entrepreneur Center na Aruba Bank Camacuri, esta e “Breakfast Meeting: Leadership & Management” cu Cor Storm, cual lectura a resulta den un exito total. E biaha aki, Aruba Bank lo organisa 3 lectura consecutivo pa tur su clientenan corporativo. Cada orador lo ofrece e participantenan di e lectura cu informacion super valioso, actual y relevante pa nan negoshi. Diamars 27 di augustus, Ryan Kock lo presenta e topico: “Mergers and Acquisitions”. Diaranson 28 di augustus, Jeanette Solognier lo presenta e topico: “Compliance” y diahuebs 29 di augustus, Martijn Balkenstein lo presenta e topico: “Macro Economic Developments”. Ryan Kock lo elabora riba e topico ‘Acquisitions’; e obhetivonan, e proceso, e balor di e mercadonan di compra, consideracion di impuesto y legalisacion, financiamento y algun conseho practico. Ryan Kock tin un Masters Degree den impuesto economico y tambe ta un ‘Certified Public Accountant’. El a traha na Ernst & Young tanto na Hulanda como na Aruba y a haya e funcion di General Manager di oficina Aruba. Ryan tambe a forma parti di Gerencia di Aruba Bank. Desde 2012 Ryan a join e firma ATLAS, unda el ta asisti companianan riba tereno di accountancy, asunto di impuesto y mucho mas. E di dos orador, Jeannette Solognier, lo elabora ariba e topico “Compliance”. Jeannette Solognier tin un curiculo y conocemento amplio den investigacion di fraude. El a cuminsa su carera como polis den Cuerpo Policial. Den transcurso di aña a tuma hopi curso y a profundisa den e area forense. Desde 2010 Jeanette a join Compliance & Forensic Services Caribbean y ta haci e trabounan di consulta den e area di investigacion di fraude, security checks, etc. Y tambe den e area di cumplimento cu AML/ CFT compliance, integrity training/ policies y (pre-) employment screening na Aruba, Curaçao, Sint Maarten y Venezuela. Jeanette a profundisa den e area di e lucha contra labamento di placa y terorismo financiero, tanto local como den exterior y ta un “Certified Anti Money Laundering Specialist” (CAMS). E di tres orador, Martijn Balkenstein, tin estudio den ‘Environmental Management’ y den ‘Science of Public Administration and Management’. El a cuminsa su carera como investigador na Centraal Bureau Statistiek na 1993 y na 2009 el a haya e funcion di director. Martijn a fungi como lider di proyecto di diferente investigacion, manera; Labor Force Surveys, Income and Expenditure Surveys, Tourism Expenditure Surveys y Business Count y tambe a traha durante Censo 2000. Su forma di maneho tin enfoka ariba resultado. E charlanan aki tur lo tuma lugar for di 8:30 pa 11:30 di mainta y lo tuma luga na Renaissance Convention Center. E idioma di e charlanan lo ta Ingles y e lecturanan ta completamente gratis. Registra prome cu diamars 22 di augustus, 2013. Pa registra, bishita arubabank/corporate y completa e formulario digital y asina garantisa bo luga pa por atende na e charlanan interesante y actual, presenta pa Aruba Bank.
Posted on: Thu, 15 Aug 2013 14:39:39 +0000
Trending Topics
Recently Viewed Topics
© 2015