“PATHIAN KHAWPUI” LALPA CHENNA Lalpa chuan Zion chu a thlang si a, A awmna atan a duh a, Hei hi kumkhua atana ka chawlh hmun tur a ni, hetah hian ka awm reng ang, ka duhzawng a ni si a. A eiturte chu mal ka sawm rei rui ang a, a mi retheite chu chhangin ka ti tlai ang. (Sam 132 : 13 – 15) Awle, hei, “Pathian khawpui” Lalpa Chenna, tih thupui hmanga Pathian thu sawi kan tum dawn a. “Pathian khawpui” han tih hian, kan rilruin Jerusalem lam a tinzawn nghalin a rinawm a, a Zion ruih e, pawh kan ti thei awm e. Chu chu a dik a, kan chang rawn thlan chhuaha kan hmuh angin, “Lalpa chuan Zion chu a thlang si a, a awmna atan a duh a, Hei hi kumkhua atan ka chawlh hmun tur a ni, hetah hian ka awm reng ang, ka duhzawng a ni si a,” ti-a, kan hmuh angin. Awle, chu “Pathian khawpui”ah chuan kumkhuaa Lalpa chu a chen theihna turin, Lal Davida chuan Lalpa tan insak a rilruk a, mahse Lalpan, chu a rilru-a awm chu hriain, a fapa Solomona kal tlangin in chu a sa ta zawk a. Chu Lalpa chenna tura Temple sak zawh a nih a, hlanna an neih ni chuan, Lal Solomona chuan, mipui tam tak pung khawm hmaah, Pathian hnenah tawngtaiin dilna a thlen a, “I chhiahhlawh leh i mi Israelte hian he mi hmun lam hawia an tawngtai hunin an dilnate lo ngaihthlak sak thin ang che tiin, tin, I mi Israelte chuan i chungah thil an lo tihsual avang a, hmelma laka an lo tlawma i lam an lo hawi leh a, i hming an faka, he mi hmuna tawngtaia thil an lo dil chuan, nangin van atangin lo ngaihthlak sak la, an sualna chu ngaidam ang che. Tin, I chunga thil an tihsual avanga van a pin a, ruahte a sur loh hunah pawh, tin, an ramah tamte a lo tlak a, hri te a lo lena, rona emaw, tawihna emaw, khuakhuap emaw, pangang emaw a lo awma, an hmelma ten an kawngka velahte an rawn huala, hri eng pawh, natna eng pawh a lo thlen chuan,I mite zinga mahni thinlunga hri awma hriaa, he mi in lam hawia kut rawn phar apiangin, tawngtaina leh dilna an rawn hlan reng reng chu, I awmna van atangin lo ngaithla la, ngaidam la, che la, nang an thinlung hretu, mi tin an awmdan ang zelin hlawhtir ang che. an trih theih nan che tiin. Tin, Hnam dang mi pawh he mi lam hawia i hming lama an tawngtai chuan, ngaithla ang che, he hmun hian “I hming a pu” tih an hriat theih nan, tin, I chungah thil an tih sual avanga hmelma kuta i pek a, sala hruai an nih pawhin, he mi in lam hawia i hnena an dil chuan ngai thla la, sala hruaitute chuan anmahni an khawngaih theih nan an thinlungah khawngaihna neihtir ang che, tiin. Awle, chutiang khawpa hmun pawimawh a nih avangin, Judate chuan a hlu em em a, khawi hmunah pawh awm se, an thinlungah a cham reng thin a ni. Chuti taka an ngaihnat leh thlakhlelh a hlawhna chu, a khawpui mawina leh, ropuina emaw vang ni lovin, chu Zion khawpui chu LALPA chenna a nih avangin, theihnghilh an hlau em em a, an ngai em em a. Aw, Sipaihote LALPA, I awmna chu a va duhawm em! ka nunna hian LALPA biakin hung chhung kawtlaite chu a ngai em em a, a ni, a chauh phah hial a, tiin, Pathian nung hma-ah chuan an au chhuak a.Chutiang khawpa an thlakhlelh chu a nih avangin, thil dang zawng aia thlan an duh a, Pathian an pawl thina hmun, Lalpan kumkhuaa a chenna tura a thlanna hmun a nih avangin, an ni pawhin theihnghilh an duh lo. “Aw Jerusalem, ka theihnghilh che chuan, ka kut ding lam hian a thil thiam hi theihnghilh ve rawh se, ka hriat reng loh che chuan ka lei hi ka dangah bet tlat rawh se, ka hlimna ber aia Jerusalem ka duh zawk loh chuan, an lo ti hial a. Sam 137 : 5 – 6, a kan hmu angin. Tin chu khawpui ropuina em em leh mite ngainat leh thlakhlelh a nih leh na chu, Chu khawpuiah chuan mi tin maite chu an zalen em em a ni tih hi. Mi tin a lian a te, rethei leh hausa an khat veka an chen theihna hmun a ni a, Hman lai atang tawhin khawvelah, mi rethei leh hausa karah kak nasa tak a lo awm tawh thin a, chi leh kuanga in thliar hranna te, in tih bingnate a awm nasa em em a, chutih lai kar-a, he Lalpa chenna Zion-ah erawh hi chuan, mi tinte leh chi tinte, hnam tinte an leng vek a, hnam dang mite leh mikhual thlengin an lenna hmun a nih avangin miten an ngaina lo thei lo va, an thlahlelh lo thei lo a ni. Chu Lalpa chenna Zion khawpuiah chuan, Inthliar hrannain hmun reng a chang lo va, in duhsak bikna a awm lo va, mi tinte chu Lalpaah chuan, ang khat vekin an cheng a, chu hmun tlawh tawh apiang leh hmu apiang te chuan Lalpa thatna hmu-in, mak leh ropui tiin, “Sipaihote Lalpa khawpuiah, kan Pathian khawpuiah chuan, Benga kan hriat ang ngeiin kan hmu ta..Pathianin chu khawpui chu kumkhuain atan a tinghet ang. Aw Pathian, i biakin chhung rilah chuan i ngilneihzia hi kan ngaihtuah tawh tiin ropuina zawng zawng Pathian hnenah an hlan thin a, mi tin ang khat veka Pathian an biakna hmun a nih avangin. an thinlungah in thliar hranna reng a awm si lo, duhsak biknain hmun a chang thei lo va, Pathian fate an nih vek zawk avangin chu hmuna chen chu nuam an tiin, “I biak-in hung chhung kawt laia ni khat awm hi, ni sang khat aiin a tha zawk si a, suah sualna puanin te-a awm ai chuan kan Pathian biakina kawngkhar vengtu nih pawh ka duh zawk an lo ti hial a ni. A va ropui tehlul em! Tin, chu hmun, Lalpa chenna chu “Hmun thianghlim” a nih avangin, mi tinten an serhin, an zah em em a, a chhungah sual leh bawlhlawhin hmun reng a chang si lo, a chengte pawh, khawvel hnam zawng zawng zinga “Hnam thianghlim” tih an ni a, chu Zion khawpui Jerusalem pawh chu “Ram thianghlim” tiha vawiin ni thlenga sawi a ni thin a ni. chu chu eng dang vang ni lovin,Lalpan a chenna atana a thlan hnam leh ram a nih avanga khawvel mite hriat hlawh pawh a ni a, Judate tan chuan chu hmun chu a hluin a ropui em em a ni. Awle, zanina sawi kan tum ber chu, chutianga hmun ropui leh thianghlim, Lalpan a chenna atana ringtute min buatsaihna hi sawi kan tum zawka chu a ni a. Tirhkoh Paula’n engtin nge (2Korinth 6 : 16) ah a sawi kan tih chuan,”Keini zawng Pathian nung biak-in kan ni si, Pathianin anmahniah ka awm ang a, anmahniah ka leng bawk ang, Tin, an Pathian ka ni ang a, anni pawh ka mite an ni ang, tiin. Pathian chenna, Pathian nung biak-in kan nih min hrilh a, .. ringtu Pathian fa tawh phawt chu. Tin, Ephesi 2 : 21, ah chuan, Amah Kristaah chuan lung rem hrang hrangte, rem taka chuktuah a, Lalpaah chuan biak in thianghlima a chan zel thinna leh keini ringtute hi Thlarauva Pathian awmna tura rem khawm kan nih thu min hrilh a. chu ngei chu Kohhran zahawmna leh ropuina pawh chu a ni a. Kohhran neitu leh dintu chu Krista Chatuan lungpui chu niin, chu Chatuan lungpui chunga innghat chu tumah tih chim rual loh, thlipui leh ruahpui nasa tak pawhina a tih nghin zawh rual loh chu a ni a, khawvel mite leh ringlo mi ten tih chhiat tumin bei thin mahse, dodalna chi hrang hrang kara leng thin ni mah sela, mi hring duhthusam (finnaa) din ni lo, Lalpan Krista thisena a tlante chu , Lu ber Krista hmanga, Krista hnathawh chhunzawmna tur leh Thlarauva Pathian awmna tura a remkhawm a nih zawk avangin, tuma hneh theih chi rual lah a ni hek lo, A va ropui em! Lalpa chu fakin awm rawh se. Lalpan chu khawpui chhungah chuan khawngaihna avang chauhvin nang leh kei pawh min teltir a, Pathian chenna, Pathian nung biak in kan nih avangin, kan thianghlim tur a ni keini pawh. Kan rilru a thianghlim ang a, kan ngaihtuahna a thianghlim bawk ang a,tichuan kan nunin Lalpa a chawimawi thei ang a, a rawng kan bawlnaah pawh hlawhchham leh beidawn a awm ngai lo vang a, “Inthawina nung leh thianghlim, Pathian lawm tlak” rawngbawlna kan kalpui zel thei dawn a lo ni, Amen Chu chu in rawngbawlna awm reng a ni, he khawvel dan ang hian awm suh ula, Pathian duhzawng, a tha leh lawmtlak leh that famkim chu in hriatfiah theih nan, in rilru athara awmin lo danglam zawk tawh rawh u, ti-a ngen kan nih kha. Engtin nge, (1Korinth 3 : 16 – 17) ah min kawh hmuh Kan en chuan, “Pathian in in nih leh Pathian Thlarau nangmahniah a awm reng tih in hre lo vem ni? tupawhin Pathian in chu a tih khawloh chuan, chu mi chu Pathianin a tikhawlo vang, Pathian in chu a thianghlim si a, chu in chu nangmahni in ni e. tiin hetah hian ringtu mi mal tinte mawhphurhna a lo lang a. Tin, (1Korinth 6 : 19) ah chuan, A nih leh, in taksa chu, in chhunga awm Pathian hnen atanga in hmuh Thlarau Thianghlim in a ni tih in hre lo vem ni le? Mahni ta pawh in ni lo va, mana lei in ni tawh asin, chuvangin in taksaah chuan Pathian chawimawi rawh u, tia hriattir kan nih avangin, Lalpa chawimawi turin kan inpe ang a, Krista hnathawh chhunzawm zel thei tura Thlarauva Lalpa chenna tura rem khawm kan nihna angin Kohhranah Lalpa rawng kan bawl ang a, Juda ten an fate hnena Lalpa thupekte leh dan te chu a chhun azana an zirtir thin angin, kan fate kan zirtir zel ang a, Lalpa thu zawmin kan nung zel ang a, tichuan mi dangten Lalpa awmpuina changtute kan ni tih leh Lalpa chenna kan nih min hmu ang a, mite ngainat leh thlakhlelh kan lo ni tawh ang a, keimahni atangin mi dangten Krista hmel an lo hmu tawh ang a, Pathian chibai buk chakin kan zingah Lalpan, Thlarau leh tihtak zeta Amah chibai buktu turte a rawn hruai khawm thei dawn a lo ni. Amen Keini zawng Pathian nung biakin kan ni si a, Lui pakhat a awma, chu mi pengte chuan Pathian a ti lawm thin, tih (Sam 46 : 5) ah kan hmu a,Chu lui chu Krista chatuana kang ngai lo,tui nung lui neitu chu a ni a, Keini a pengte chu kan ni, mahni lawmna ni lova, Pathian tilawmtu turte kan nih theih nan, Lalpan a thu kan han sawi takte chu mal minsawm rawh se, Amen
Posted on: Sun, 07 Sep 2014 14:30:22 +0000
Recently Viewed Topics
© 2015