Pathian hian mihringte hi min siam mak bik em em mai a. Kan hlima kan nui thei te, ka lung a chhiata kan tap theite hi a mak a. Lunglen leh khawhar theihna kan neite hi a ropui ka ti a. Thil mawi leh duhawm ngainat theihna kan nei hlei hleite hi a ropui ka ti bawk a. Thil siam dangte aia siamtun min siam chungchuanzia hi sawi sen a ni lo. Kan hmeltha tih zawng kan hmuh ruala duhna leh ngaihzawnna thinlung kan put mai theih dante hi a mak ka ti thin. Rante hi chu chi thlah turin an inkawp chauh thin a. Chi an thlah zawh chuan an inthen leh mai thin. Mahse, mihringte hi chu chutiang chu kan ni ve lo va, ran leh ramsante anga chi thlah hun lai chauhva inkawp thin ang hi ni lovin kan tha tih zawng leh duhzawngte chu kan dam chhunga neih atan kan duh a, kan thinlungah hmun sang tak an chang ang hian an thinlung hmun sang luah ve kan duh thin a. Chutiang tur chuan kan thiam leh theihna zawng zawng kan hmang thin. Hmuh ruala hmeltha an awm a. En chet dawl an awm bawk a. Hmelthat hmel fûin lang mah se, a mizia avanga ngainat hlawh lo an awm thei bawk a. Hmeltha vurin lang lo mah se, an mizia leh nungchang avanga hmeltha leh duhawm em em an awm thei bawk. Tin, belhchiana ngaihawm leh duhawm em em, kan thinlung hneh em emtu an awm thei bawk awm e. Engpawhnise, hmeltha tak maite chu cho loh ena kan en avangin kan duhna tilang ngam thin lo mah ila, tunlai tawng takin kan star ru veng veng mai thin a ni. An che vel leh an hawiher en reng reng pawha zei hah maite leh vantlang chunglama hmeltha leh duhawmte chu Lasi leh Van Angel-te ai pawha duhawm leh tha niin kan hre thin a. Chutiangin, nupui pasal nei tawhte pawh hian hmeltha leh duhawm chu kan hre vek tho va, nulat tlangval lai ngaih rum rum mai hi thil awl tak a ni a, ‘an laichin hnai tal ni ila aw’ tiin duhthu kan sam thin a ni. Chutianga Lasi leh Van Angel-te ai pawha hmeltha nia kan hriatte kan tawh chang chuan a ni, kan chhingmit leh thinlung a lo uire thin ni….!! A va rapthlak em :P :P Chutiang anga hmeltha leh duhawm chu awm mah sela, kan tan an hlu berin an tha ber lem chuang lo va, thufing pakhat ka hriat reng thin chu, “Hmeltha sang sawm, tha min ti ve lotu leh eng atan maha min ti ve lotu ai chuan thinlung thiamhlim leh tha, min thahlel ngawih ngawihtu chu kan tan an hlu zawk a ni, pakhat tê chauh pawh ni se,” tih a ni a. A dik hlein ka hria a, thinlung thianghlim leh dik neih tel a pawimawhzia min hrilh a ni. Mahse, he hla hi han en teh – 1. A lo duang thiam ngei che, Khuanu leng pawh hian; Tha chungchuang turan maw, Kan Zotlang nuam an, I chun leh zua lei lawm a famkim ngei ang le; Ka chhuihthangval nun hlui min ngaihtir vawng vawng. A mawi lo bik lem lo, Ka hmangaih mai ang che; Tha chungchuang tleitiri Aw, ka ngaina che. 2. Ka ring thei lo kei zawng, Khuavang lasi zawng zawng; Van chung la zawng zawng, Nang khum zo tur hi; An awm thei lo’ng e, An piang tawh lo’ng e; I zei zia reng reng hian, Lengtin a lem ber mai. 3. Hmangaih di atan zawng, Ka hai lo, i rem lo; I chunnu leh zua tal, Han chang thei ila; Ka thuam mawi zual ang che, Ka chhuang ber zel ang che; Chutih ahnehin kei zawng, Kar a hla em mai. (He hla hi Miss Mizoram hmasa ber C. Lalbiakzuali tan, November ni 14 1985-a Hnahthiala a awm laia a phuah a ni.)
Posted on: Sat, 20 Sep 2014 20:49:16 +0000
Trending Topics
Recently Viewed Topics
© 2015