RALTIANG I KAI VE ANG. Keipui hahum ri chu Hmeithai thingphur chuan a hlau em em a. Hmanhmawh takin thing chu a fawm zung zung a. Han ti ngawt ila, Hmeithai aia hmanhmawh, hmanhmawhpui kan awm nual mai thei e. Ni e, Keipui meuh zawng a hlauhawm êm a lawm. Keipui chu hahum tak takin, Hmeithai chuan thing chu phur tak tak ta se, a hlauh tur zia mai chu(h). Tin, chumi ram vekah chuan, Sakhi rual an awm a. Thlamuang taka an tlat lai chuan, Chinghne rual tam tham tak mai chuan an rawn um thut a. Hlauh namena hlau lovin Sakhi rual chu an tlandarh ta vek a. Han ti leh ta ila, Sakhi rual khawngaih a, Chinghne ngei pawl kan awm leh mai thei e. A ni lah tak bawk a, tihlumtu, tichhetu leh tiraltitu chu an huatthlaawm thin êm bawk a tin ni. Keipui, Hmeithai, Sakhi leh Chinghne chungchang zirho tur kan ni lo bawk a, kan chekthûk hman dawn lo. Engpawh ni se, he ramah hian awm reng phawt mai teh ang un. DAN PIAH LAM RAM Ukil zinga hmelhriat pakhat pawh nei ûk si lo hian Dan chungchang sawi chiam ka tum lova, lawithat zan ang maia Dan thar siam lah ka tum bau lo. Kohhran Dan zawhkim ka nihna lah uanpui ka tum lo bawk. Dan zawhkim awlsamna ber chu Kohhran a ni ka ti lo bawk. Heti maitê hian ka zawhkim ve ât mai a ni. Tlangval zei lo ka nih vang hrim hrim pawh a ni lova, Ram duhawm leh nausen chawbel, puitling lawm lam chanchin ka hriat tlem vang pawh a ni chuang lo. Uirê Nu uirê lai tak an man avang kha a ni ta berin ka hria. Heti taka Dan zawhkima ka la awm na chhan hi. A zahthlak dawn êm a lawm. Zosepha nau nih mai hi ka la duh tlat. Ram Danpui palzûta Dan siamtute dem chiam lah ka tum lo. Dan pela hausakna nasa taka hausate lah, lungngaihna hmin tai hler hlawr chuan a luhkhung fo va. Manganna an sengtel tho thin. Sum leh Pai hmangin thiam chang mahse, dik lohna leh thil tha lo chuan chhungril lamah a hêk reng a, hlimna chuan zâwi zâwiin a mangtha thin. Dan hnuaia hausate erawh chuan, hlimna hminduk an mal mawlh mawlh a, an lainâ leh thenawm khawvengte thlengin an eitui thin. An tan Dan chu a hnawksak ngai lova, Dan chu malsawmna Danah a chantîr thin. Dik lohna laka humtu atan an hmang hlauh thung. Khawtlang Dan zawmna kawngah chuan ka thotháng tha lo êm êm a, ka tan hlawkna daltu tiin ka sawisèl fo thin. Dan tha lo an siam ngai lova, mahse, Dan tha rèng ka hmu lo thung. Hlawkna ûma ka daisual luih chang chuan kan zawh loh Dan a ni tiin uar takin ka âu chhuak thin. Mahni chauh inngaihtuah chunga ka thlir chuan, thatna nen ka enzâwn thei ngai lova, kan zavaia that tlànna tur hi ka tan hlawkna alo ni lo thin a ni mahna. Mahse, keimah chauhvin Khua ka luah si lo. Fing berah inngaiin paráwn nihna chu tuma hriat lohvin ka inpe mawlh mawlh thin. Parawn nge ka nih a, pakhawlh pawh ka inhre meuh lo. KAN TA VEK Khawtlang thilte hi kan zavaia ta anih ang ngei hian kan enkawl tha hle tur a ni. A chhiat a thata mawhphurtu chu kan ni. Khawtlang hmêl lanna leh tehna langsar tak a ni bawk. A hmun taka bawlhhlawh paihte hi a dan tur dik tak anih mai piah lamah changkanna a ni tel bawk. Hmun thenkhata zunin kan sawngbawl dante hi ava mak ngai em!. E suh tih târ kher ngai lovin thinlung lamah târ vei mai hi a finthlak khawp ang. Thenkhatte chuan kan zalh leh ngût thin!. Damdawiin emaw ti pawl lah kan awm niin a lang. Damdawi bur ruak a let pheng phung bawk thin. Thuziak târ chhan lah a ni êm si lo. Târ pawh ni ila, a nuihzathlak loh ngawt ang. Kan nihna dik tak zawk kan pho chhuak a ni dawn tlat a lawm. Zunin then khatah chuan, Lupem lukhamtê ni awm tak, sen sêng sûngte pawh hmuh tur a awm an ti. Zunram thiar tumte tan pawha kirsan mai a awl thin. Hri tha lo tak tak kai palh theih chu thuhran ni se, a hmuhnawm loh va, a tenawm em em ringawt mai a ni. Hengte avang pawh hi a ni ang Vawk pul hrite pawh hi a lèn vak thin ni. A ni em em lovang. Vawk pul hrite chu thil dang atangin a ni ang. Â, eng pawh chu lo ni se, Nausên meuh pawh bawlhhlawh bawma paih duh awmna ram a ni miau a lawm. Mahse, chuti maia inhnem erawh a dik leh si lo. Eng pawh ni se, he Ram hi chhuahsan a, khawiah emaw kalbo daih kan tum a nih hmel. A nih loh vek pawhin, lo la piang leh tur an tam tawh lo hmel tlat. Kan ram kan sawngbawl dan atang hian a hriat mai. Khawvel hi a la tawp mai lova, Mizo fa tam tak an la rawn piang leh dawn anih ngai chuan, tlangram thlaler hmun, thlahte hmangaihna nei lote sulhnu, anchhia pawh dawng tlak lo khawpa ram rehah an rawn puang mai thei asin. I dawn chiang deuh teh ang u. Thlahte khawsak relna atana kan duh si chuan, heti mai hi chuan awm reng lo teh ang u. Thlahte anchhedawng, ruhro hnawksak, thisen rimchhe nihna min rawn pe ang a, keinin hre zui lo mah ila, nunna neia hmasawn tum kan tû leh fate chuan, rilru-a hriain an thlâ a ngam mawlh lovang. (Chhunzawmtur).
Posted on: Sat, 30 Nov 2013 14:37:05 +0000
Trending Topics
© 2015