Rosing Brønlund-p apeqqutaanut: Naalakkersuit.gl-mi aatsitassarsiormut tunngasut paasissutissat takuneqarsinnaapput. Aaku ilaannaminngui Qaasuitsup Kommuneani misissuinermut tunngasut. Qeqqani, Sermersuumi aamma Kujataanut immikkut peqarpoq. Qaasuitsup Kommuniani aatsitassarsiornermik ingerlatat Uummannap aamma Qeqertarsuup eqqaanni eqiterussimapput, kisiannili minnerunngitsumik sumiiffiup Qaanaap kujataaniittup aamma avannaaniittup ukiup kingulliup ingerlanerani annertusiartortumik sammineqarnera misigineqarpoq. Matuma kinguliani suliaqarfiit 2013-imi piffissami suliaqarfiusussami Qaasuitsup Kommuniani annertunerpaamik ingerlataqarfiusussat allattorneqarput. Washington Land Avannaa Resources Washington Land-imi, 2011-imi februaarimi satellit-imit misissuinerit ingerlanneqareersut aallaavigalugit ingerlataqarnissamik pilersaaruteqarpoq. Juunip qiteqqunneranit aggustip qiteqqunneranut pingaarnerusutigut asimi ujarassiorluni sulineq ingerlanneqassaaq. Asimi suliaqarnernut taakkununnga atatillugu sumiiffimmi qulimiguulimmik timmisartornerit ingerlanneqassapput, peqatigisaanik Avannaa Resources sumiiffimmi tammaarsimaarfeqassalluni. Ikummatissanut toqqorsivik aamma tammaarsimaarnermi atortussat piffissami suliaqarfiusussami kingullermi pilersinneqarput. Qaanaap eqqaani ingerlatat Tuluit/Islandimiut ingerlatseqatigiiffiat North Atlantic Mining Association Greenland Ltd. Sumiiffimmi Savissiviup avannaaniittumi aamma Qaanaap kujataaniittumi pisinnaatitsissutiminni piffissami maajimiit oktobarimut arlalinnik ingerlataqarnissamik pilersaaruteqarpoq. Tassani ilaatigut pineqarput ukioq kingulleq asimi suliaqarnerit nangeqqillugit qillerinerit aamma tunngaviusutut aallaaviusussanik misissuinerit. Sumiiffimmi tammaarsimaarfiliortoqassaaq, angutit 40-it missaanniittut piffissami suliaqarfiusumi tassani pisinnaatitsissuteqarfiup sumiiffiani sulisussat illusimaffissaannik. Ingerlatseqatigiiffiup piffissami suliaqarfiusussami tassani 9.500 meterinik qillerinissani naatsorsuutigaa. Maarmorilimmi aqerlusiorfiup/zinkisiorfiup ammaqqinneqarnissaa Qaasuitsup Kommuniani Maarmorilimmi aqerlusiorfiup-zinkisiorfiup (Inngili Qernertoq) ammaqqinnissaanut piiaanissamut akuersissut Black Angel Mining A/S-ip aamma Naalakkersuisut ulloq 21. maj 2008 atsiorpaat. Piiaanissaq pilersaarutigineqartoq pingaartumik aqerlumut aamma zinkimut sammitinneqarpoq, saniatigullu siilvimut sammitinneqarluni. Piiaaneq qaarusummi sukaasat pioreersut piiarnerisigut aqerlusiorfitoqqami-zinkisiorfitoqqami ingerlanneqassaaq. Ingerlatseqatigiiffiup naatsorsuutigaa sukaasat uninngatinneqartut 35 %-iisa missaat piiarneqarsinnaassasut. Piiaareernerup kingorna saffiugassaq qaarusuup iluani akuitsunngorlugu suliareqqinneqassaaq. Tamatuma kingorna eqqarsaatigineqarpoq saffiugassaq akuiariigaq kabelikkut majuartaammik Maarmorilimmi talittarfimmut assartorneqassasoq, tassanngaaniillu umiarsuarmik aallarunneqassalluni. Suliaqarfik suli sanaartornerup immikkoortuaniippoq, tassani tunisassiorfik aamma attaveqaatit sanaartoqqinneqarlutik. Tassani ilaavoq aatsitassarsiorfiup tammaarsimaffittaata aamma qaarusuup akornanni kabelikkut majuartaatip sananeqarnera. 2009-imi aatsitassarsiorfiup illutaata ataatungaa sananeqarpoq aammalu 2011-imi ukiaanerani qulaatungaata sananeqarnera naammassilluni aammalu kabelitavia amoorneqareerpoq. Ingerlatseqatigiiffiup aammattaaq illuutit ineqarfiusussat, imeqarfik kiisalu satelliteqarfissaq pilersippai. Aatsitassarsiorfitoqqami sukaasani piiaaneq taamaallaat ukiut tallimat missaanni tunisassiornissamut naammassinnaassaaq. Tamatuma kingorna aatsitassarsiorfiup eqqannguani peqarfinni immikkoortuni piiaanikkut, tunisassiornerup minnerpaamik suli ukiunik 15-inik sivitsorneqarsinnaanissaa ingerlatseqatigiiffiup naatsorsuutigaa. Kalaallit Nunaanni aatsitassarsiorluni misissuineq 2013 10 Black Angel Mining A/S 2013-imi piffissami suliaqarfiusussami sanaartornermik ingerlataqassanngilaq. Ingerlatsinermut immikkoortumi qaarusummi 120-it missaanni suliffissaqartitsilernissaq naatsorsuutigineqarpoq. Qeqertarsuup Tunuani aamarsuarsiorluni misissuineq Ingerlatseqatigiiffiup Coastal Ventures-ip ukioq manna Qeqertarsuup qeqertartaani misissuinissamut pisinnaatitsissutini annertusitippaa, taamaattumillu qillerinermi pisussanut pilersaarut annertusisaq ingerlatsivigissallugu pilersaaruteqarluni, tassani putuni 10-15-ini agguataarlugu 7.000 meterit missaanni qillerisoqassalluni. Sumiiffimmi qilleriffiususami gassit katersuuffiinik peqarnera pissutigalugu, qillerinerit blow-out-preventer-inik taaneqartartut atorlugit ingerlanneqassaaq, tassani qulakkeerneqassalluni qillerinerit akuusunut aamma sumiiffimmut navianartorsiorfiunngitsumik ingerlanneqarnissaat. Ingerlatassat piffissamut juunip naaneraniit aggustip qiteqqunneranut pilersaarusiorneqarput. Qeqertarsuup Tunuani nikkeli aamma Kanngussak Ingerlatseqatigiiffik Avannaa Exploration Ltd. Qeqertarsuup qeqertartaani aamma Nuussuup qeqertaasaani nikkelisiorluni aamma kanngussassiorluni qillerinissanik arlalinnik pilersaaruteqarpoq. Pilersaarutaavoq qillerlugit putuliat tallimat missaat ataaseq 1.200 meteriusoq qillerneqassasut. Coastal Ventures-ip ingerlatai assigaliugit, sumiiffimmi gassip katersuuffiinik peqarsinnaanerata aarlerinaateqarneranik iliuuseqarfiginninnissamut isumannaallisaanermut iliuusissat assigiinngitsut atorneqassapput. Ingerlatassat piffissamut juunip naaneraniit aggustip qiteqqunneranut pilersaarusiorneqarput.
Posted on: Sat, 12 Oct 2013 19:28:03 +0000
Trending Topics
Recently Viewed Topics
© 2015