SAIKHUMA HRILHLAWKNA ‘ZORAM THUTHLUNG’ (1962 – 1965) “Heng zawng zawng hi kei chuan ka hmu ve lo vang, Lalpa’n min thukru dawn a ni.” - Saikhuma ……………………………………… ….. RAM LEH PATHIAN INKAR - TLUKSANNA 1. Zoram sualna hi a nasat tawh em avang leh ramin Pathian a helsana, a tluksan tawh avangin Pathianin kan ram a hawisan ang a, kan ram leh Pathian inkar chu ‘Sakeiin mihring a seh’ ang hi a ni ang. 2. Kohhran-te hi Pathian Thlarau hruaina tel lo va an kal chuan ram chhiatna leh tlukna-ah mawh an phur ang. Thawhlawm thawh te, Kohhran pawl anga kal dual dual hian ram a siam tha pha lo vang. 3. Ringtu nung an vang hle ang. 4. Tun hi nuih hun a ni lo va, hlim hun a ni hek lo. 5. Zoram sualna hi a nasat tawh em avangin Pathian thinurna kan tawng baw tawh a. Chuvang chuan Pathianin kan ram hi a thianfai dawn a, tuman kan pumpelh dawn lo. Pumpelh tuma bihruk emaw, tlanbo tum emaw awm mahse, hriin emaw a umzui ang a, an thi tho tho ang. 6. Nimahsela, Pathianin Zofate hi a hmangaih em em si a, a hmangaihnain min tungding leh dawn a, khawvel hriatah min pholang dawn a ni. 7. Tuna pawimawh ber chu ‘Thlarau dana awm hi a ni. “Lalpa hming lam apiang…” tih ang khan. Hetiang hi Lalpa min hmuhtir, kan ram awmdan a nih vangin Zoram hian HUN PUI THUAH THUM a tawng ngei ngei dawn a: 1. HUN THIM - THUAH KHATNA 2. HUN THIM - THUAH HNIHNA (A rei lo vang) 3. ZORAM KHAWVAR - LEI ZION 1. HUN THIM THUAH KHATNA He hun thim thuah khatna hun chhung hian Zoram chu hetiang hian a awm ang: Thisen a luang ang. (ii) Ar lawi angin an lawi ang che u ang a, Ar chhuah angin an chhuah leh ang che u. (iii) Lehkhathem var in nei ang a, chu chu in hmang tangkai khawp ang. (iv) Lui tuite hi in la chawiin, in la tlan ang. (v) Ringtu leh ringlotute chungah he thim hi inang rengin a thleng ang. Mi lian leh khawsa thei, thiltithei tan chuan a ziaawm deuh mahna. Khing a sawite khi keini chuan hetiang hawizawng hian kan hmehbel a. ‘Hun Thim Thuah Khatna’ a tih hun chhung hi Zoram buai intan 1st March 1966 atanga buai reh 1986 hun chhungah kan dahsak a. Heng hun chhung hian Zoram dung leh vangah ‘Thihna’-in thla a zar a, mi engemawzat, pawisawi lo thlengin nunna an chan a, thisen a luang a ni. Tin, “Ar lawi ang…” tia a sawi pawh hi Sipaiin khua sawikhawmin Grouping Centre-ah min dahkhawm a. Grouping Centre tinte hi hung vek an ni. Check Gate-te siamin zalen takin kan paltlang thei lo va. Tin, ‘Lehkhathem var’ a tih pawh hi Identity Card/Movement Permit-ah kan belsak a, Identity Card/ Movement Permit keng lo chuan khual khuaah pawh kan kalin kan zin mai mai thei lo va a ni. Tin, Sipai hlaua himna zawngin ramhnuaiah mi tam tak kan tlanchhia a, lui tui awmna kan pan ber a, lui tuite chu kan chawiin kan tlan ta ngei bawk a ni. Hetiang hi thil awm dan a lo nih takah chuan, “A thu puan lawkte nen khan a inmil riau mai, heng hi Zoram hun tawng tur ‘Hun Thim Thuah Khatna’ a lo tih thin kha a lo nih dawn hi kan ti ta a ni. 2. HUN THIM THUAH HNIHNA (A rei lo vang) He ‘Hun Thim Thuah Hnihna’ Zoramin a tawng dawn a ni tih a sawi hian a ngai pawimawhin, a la runthlak em em a. “Lalpa’n min hmuhtir dan chuan” a ti mauh mai si a. “Lo thleng ngei ngei tur, kan pumpelh hauh loh tur” a ti bur mai! ‘Thim Thuah Hnihna’ a hrilhfiah dan chuan “Thim tak, thim chhah tak” tih bakin he Thim Thuah Hnihna hi a sawifiah lo. Chu chuan Zoram hi a khuh dawn a ni. Mihrinna thilah chuan pumpelh chi a ni dawn lo. Eng thil mah pumpelhtir thei emaw, chhan thei tur emaw an awm lo reng reng. Amaherawhchu, “He Thim Thuah Hnihna hi pumpelh emaw, pal tlang theihna emaw kawng khat chauh a awm a, chu chu Lalpaa a tak taka innghattute chauhvin he Thim Thuah Hnihna hi an paltlang ang.” a ti a ni. A sawi zel dan chuan he Thim Thuah Hnihna hian Lalpa chu tunge a nih? Kan Pathian chu a nung a ni tih a tilangchiang em em dawn a, tin, Lalpaa a tak taka innghatute nihlawh tur thu uar takin a sawi thin. He Thim Thuah Hnihna chungchangah hian ‘Thuchah’ pawimawh a tih em em, a chah ngun em em chu “Lalpaah hian a tak takin lo innghat tlat rawh u” tih hi a ni. ‘Thim Thuah Khatna’ tia a sawi thu-ah kha chuan han ngaihbel tur leh hmehbel tur kan nei ngei mai a. Amaherawhchu, he ‘Thim Thuan Hnihna’ a tih, hun pawimawh a tih em em chu Zoram- in kan la tawn loh leh ka la hmuah thlen lohah kan dah ringawt mai a, eng tak ni maw! Thim Thuah Hnihna chu hetiang hian a sawi: “Khawchhak lam atangin ‘Hnam Kawlh’ an lo kal ang a, in Ui leh Ar, ei theih thil zawng zawng an ei buan buan ang a, sakhaw nei lo an nih avangin in hmeichhiate an pawngsual mai mai ang a, nangmahni erawh chu an tipawi lo vang che u. Hlau suh u, kan ram thianfaitute an ni e” Heta khawchhak atanga ‘Hnam kawlh’ lo kal tur a tih hi Zoram chhim lam atanga lo kal/lo lut tur angin a sawi bawk. Keini erawh chuan a ngaihna kan hre lo hle. Han ngaihbel emaw, han tinzawn tur ang chi kan hre lo, kan bo hle a ni. Tin, “Hun Thim Thuah Khatna nen chuan tehkhin chi a ni lo,” tiin a sawi tel bawk. 3. ZORAM KHAWVAR – LEI ZION Zoramin khawvar a thlen huna Zoram awm dan tur leh hmelhmang a sawi hian a hmelah pawh lang thei khawp hian a hlimin a sawi tui thei em em thin a. Thim thuah Hnihna a sawi lai hmel leh ‘Zoram Khawvar’ hun thu a sawi lai hmel chu danglam tak a ni. Tichuan, “Zoram Khawvar Hun – Lei Zion-ah chuan hetiang dinhmunah hian Zoram chu Lalpa’n a dah tawh dawn” a ti” Hetiangin: 1. Lalpa’n Zoram hi ‘Milem Ban Sawm Nei’ lak ata a lachhuak dawn. 2. Zoram hi ‘Changkha ang mai’ tiin sit suh u. Lalpa’n Zoram lei hnuaiah hian hausakna namen lo a phum a sin. Lunghlu, Rangkachak, Lungalhthei, Tuialhthei te hi namen lo Lalpa’n Zoram lei hnuaiah a dah a, heng hi haichhuah a ni ang. 3. Zoram leihnuai hausakna Lalpan a thuhruk hi ‘Milem Ban Sawm Nei’ hnuaia Zoram a awm chhung chuan Lalpa’n haichhuah a phal lo, a hunah haichhuah a ni ang. (A thusawi/ thupuan hi a ngai ngaiin ka han tilang a ni.) 4. Zoram lei chung hausakna leh malsawmna pawh hi Lalpa’n min hmuhtir dan chuan sawi hian a siak lo. Buh vuite hi Sakawr mei buk tiat tiat an ni ang a, sawntlung el khatah mai pawh hian nau rual chhung tlai tlai an thar dawn a ni. Tin, Alu te hi lungthu tiat tiatin a thar ang a, Balhla bu te hi Dawrawn tin thum dawng aia lian lian an ni ang a, a kungte chu in do tek tuk ang. Dai vel di hmun leh phul hmunah te hian Buh, thlai leh thei chi hrang hrang te hi an la hmin tiar tuar ang. 5. Bedsury ram saw Zoram buhzem tur a nih saw. (Bedsury ram hi Chhimtuipui District huamchhunga awm a ni.) 6. Khawvel Sorkar lian liante hian Zoram hi an intlawnsiak dawn a ni. Ram lo ding tur chu khawvel sorkar dangte hian an rawn tanpui rawn ang a, hmasawnna leh malsawmna a luang lut dur dur dawn a ni. ‘Tarsis Lawngliante’n hmakhalh an inchuh ang khan khawvel Sorkar liante hian Zoram dawr tur hian hmakhalh an la inchuh dawn a ni. 7. Tlang leh tlang inkarahte hian thirhrui hi a inzam tuk a, chung thirhruiahte chuan Tawlailir hi an in tlan pel zut zut a ni. Sangha manna len hi khawmualah dah ila, a ziain chhim leh hmar, chhak leh thlang a hawi ang hian Zoram dung leh vangah hian Tawlailir kawng hi a inzam tuk a ni. 8. Lui dung leh lengkir kham hnuaiahte hian khawl ropui tak tak leh thil ti thei tak tak te hi an inbun fer fur bawk ang. 9. Zoram hmun tam takah hian Thlawhtheihna tum hmun a awm fer fur ang. 10. Zoram kawngpui kawtchhuah hi ‘Hmar lam’ ni tawh lo vin, ‘Chhim lam’ a ni tawh zawk ang. Hmar lam kawtchhuah kawngpui hi a la ping ang. Zoram khawvel kawtchhuah hi chhim lam a nih tawh dawn avangin, sawng ‘Akyab’lawngcha wlhnate saw in la hmang tangkai em em ang. 11. Zoram hi ‘Ram ni eng’ Malsawmna – Lei Zion a ni tawh ang 12. “HENG HI THLASIK ANGA KHEL LO VIN A LO THLENG NGEI NGEI DAWN, LO NGAI RENG RAWH U” 13. Heng zawng zawng hi kei chuan ka hmu ve lo vang. Lalpa’n min thukru dawn a ni. (A sawi lawk ang ngeiin 18th May, 1965 khan kum 54 mi niin a boral ta a ni.) KHAWVEL PUM HUAPA ZOFATE MAWHPHURHNA LEH RAWNGBAWLNA 1. Sap-ho hmangin Lalpa’n Zofate hi Chanchin Tha min pe a, chu bak chu Lalpa’n Sap-ho khu Zofate chungah mawhphurhna a pe lo. 2. Khawvela Krista Chanchin Tha hrilh darhna hna hi Lalpa’n Sap-ho (British) kut ata Zofate kut-ah a dah/ hlan a ni. 3. Khawvel hmun hrang hrangah Zofate hian Krista Chanchin Tha hi Thlawhtheihna hmangin an la hril dawn a ni. 4. Khawvela natna khirhkhan tak tak, Doctor-te pawhin a ngaihna an hriat loh tih dam theiha an ngaih tawh loh te chungah pawh, Zofate’n damlo te chungah Isua hmingin an kut an nghat ang a, an dam zel ang. Zofate chil hi Lalpa’n damdawi tha ber atan a hmang a ni. Eng Company siam mahin a tluk lo. 5. Zorama meichher te te hi Lalpa’n hmun khatah a telkhawm tawh dawn a ni. (Hei hi Kohhran a ni) 6. He meichher telkhawm hi ‘Eng tak’ a ni ang a, khawvel hmun hrang hrangah chhit en a ni ang. ISRAEL FATE CHUNGA ZOFATE MAWHPHURHNA 1. Israel fate khu thlarau lama kaiharh tur leh tiharh turin Lalpa’n Zofate hi a ruat tlat a ni. 2. Israel fate khuan Zofate hi an la thik em em dawn. 3. “In pi leh pute’n an khenbeh tak Isua kha in nghah Messia chu a ni e” tiin Zofate hian Israel fate hnenah an la sawi dawn a ni. 4. “Chia sawi tham lohte chu hmangin ka thiktir ang che u a; Chi fing lote chu hmangin ka tithinur ang che u,” (Rom 10:19) leh Deuteronomy Bung 28 te hi Zofate chunga Lalpa thu a ni. 5. Pathian thuthlung kan zawm phawt chuan, hnam zawng zawnga ‘Hnam chungnung ber’ah leh ‘A mei lam’ ni tawh lo vin ‘A lu lam’ ah Lalpa’n Zofate hi a dah dawn a ni. 6. Luka 15 thua Fapa Tlan Bo, a pain ‘Puan tha ber, pheikhawk leh zungbun tha ber bertea’ a chei ang khan Lalpa’n nasa takin Zoram hi a cheiin a thuam dawn a ni. SOUTH VANLAIPHAI KHAW CHUNGCHANG BIKA A SAWILAWKTE (i) “Tuikhura tuite hi in chawi tawh lo vang a, khawlai-ah tui in chawi tawh zawk ang.” Hemi a sawi lai hunah hian a thu puan lawk hi mi tumahin an awih lo va, an nuihzat hle zawk a ni. Mahse, hemi a sawi atanga kum 20 vel hnuah PHE Deptt. chuan khawlaiah ngei tui chu an rawn pe ta a ni. (ii) “Khuaah hian buh ‘Faisa’ an rawn dah ang a, chu chu in ei tawh mai dawn a ni.” Hei pawh hi khang hun lai, a sawi lai hun kha chuan tumah, awih a ram an awm lo. Thenkhatte phei kha chuan fiamthu thawh nan an hmang mai mai a ni. Zoram khawi hmunah mah Ration Buhfai (Faisa) sem a la ni ngai lo va, Buh deng khawl pawh a la awm hek lo. Chuvangin, he thu pawh hi a hun lai kha chuan rin harsa tak tur a ni reng a ni. Amaherawhchu, kum tam a liam hmain Retailer kaltlangin Sorkar atangin Buh ‘Faisa’ a lo thleng ta mai a ni. (iii) “Hetah hian Tawlailir kawng a la kal ang a, Buh te hi in chhip phurh tawh lo vang.” Hei hi South Vanlaiphai leilet kam hrul zela Motor kawng lo awm tur a sawilawkna a ni. Keimahni leilet kam ngeiah pawh ding chunga kawkin,”Hetah hian Tawlailir kawng a la kal ang” tiin a sawi. He a thusawi pawh hi Mihlim rui, ‘a let der’ tawh thu sawiah ngaih mai mai a ni. Mahse, a thu puan lawk atanga kum 10 dawn hnuah, a kawhna hmun chiahah chuan PWD te’n kawng an lai tlang ta a ni. (iv) “Hnahchang lui tui hi in la tlanin, in la chawi dawn a ni.” He “Hnahchang lui tui” a tih hi South Vanlaiphai khaw bula awm a ni. Khatia 1966-a Mizoram a buai takah khan Sipai hlaua tlanchhiatna hmun atan he lui kam hi hman a ni a. Hnahchang lui tui chu kan tlanin, kan chawi ta ngei a ni. (v) “Darzo khuaah hian Lalpa’n ‘Ban kaw ruak’ min hmuhtir a ni.” Darzo khua hi South Vanlaiphai khaw thenawm a ni a. S.Vanlaiphai atang hian Mel 5 vela hla a ni. Darzo leh S.Vanlaiphai (Leilet) hi Lal (Mizo Chief) pakhat awpna hnuaiah an awm thin a. Pu F.Lalkhama, Fanai lal chuan he khaw pahnih hi a awp thin a ni. Khatia ram buai vanga khuate sawikhawm (Grouping) an han nih khan, Darzo khua pawh hi S.Vanlaiphai Grouping Centre-ah sawikhawm a ni a. Tichuan, Darzo khuain an in an rauhsan takte chu Sipaite khan thiat vek turin an ti a. Tin, an In-te chu luah leh mai theih loh turin Ban- te thlengin an phawitir vek a ni. (vi) “Saibuchhuah hi hmun pawimawh tak a la ni ang a, khawl ropui tak pawh bun a la ni ang” Saibuchhuah tih hi hmun hming a ni a. Chhimtuipui (Kolodyne) kam, Rotlang ‘E’ (Lunglei District) ram zawna awm a ni. He thu a sawi atanga kum 35 dawnah he Saibuchhuah ram panna kawng hi laih a ni a, Saibuchhuah hi Balu tha tak lakna hmun a lo ni ta a ni. Khawl ropui erawh chu bun a la ni rih lo. Engpawhnise, keimahni khua leh a chheh vel khuate’n heng a thupuan leh hrilhlawknate hi kan hre zing mawlh mawlh tlang vek a. A lo sawi lawk ang ngei zelin “a thleng dik” tih tur leh chung chu kan mit ngeia kan hmuh bawk si avangin “A lo mak hle mai” kan ti ta a ni. CHAKMA CHUNGCHANG LEH PHAWNGPUI TLANG 1. “Chakma-te khu Lalpa’n Zoram atangin ABOR ramah a thiar chhuak a nih khu, a la bang tlem te pawh khu nakinah chuan in la buaipui ang.” 2. “Phawngpui Tlang hi Zorama tlang sang ber a nih angin ‘Hmun Pawimawh’ takah buatsaih a la ni ang.” NOTES and COMMENTS: Rambuai (1966) leh S.Vanlaiphai chungchang thu Pu Saikhuma’n a lo sawi lawk zawng zawngte kha a thlen dik em avangin ‘Thim Thuah Hnihna’ leh ‘Zoram Khawvar’ lo thleng tur a sawilawkte pawh hi a lo thleng dik leh ngei ang tih hi a rinawm hle a ni. Pu Saikhuma hnena Lalpa’n ‘Thim Thuah Hnihna’ a hmuhtir ang hian, khawchhak lam atanga Hnam Kawlh/ Ral lo lian tur hi Pastor chhawna leh Pu Chawngkhupa te pawhin an lo sawi ve ngei avangin a rintlak lehzual a ni. 1. Pastor Chhawna: “Khawthlang diar khim leh khawchhak diar khim hnuaian kan ram a lut dawn ngei a, chumi chuan kan ram hmel fel liah puin a talchhuak dawn tih ka nghak reng a ni. Zoram, i ke chu Lalpa chungah nghat tlat rawh” tiin. Khawthlang diar khim a tih te hi Vai- ho khu ni ngeiin a rinawm a, tin, khawchhak diar khim a tih te pawh hi China-ho khi an nih ngei a rinawm. India leh China inbeihna nasa tak hnuaiah Zoram a lut ngei ang a, chumi zarah chuan kan ram hi mak tak leh felfai takin India awpbehna lak ata a talchhuak hlauh dawn niin a lang. 2. Pu Chawngkhupa : “Ngawi teh u, nizan chu ka mumang niin ka hria, thenkhat chuan ‘Inlarna’ an ti ang. Khawchhak lam atang khian ‘Zawng Hmaisen’ hi lei vang dapin an lo chhuk thla chiam mai a, an vir em em a, ei tur reng reng hi an ei duak duak mai a, ka kuta ei tur ka ken pawh chu min dil zel mai a” Tin, anni bakah hian khawchhak lam atanga ral lo lian tur hriattirna dawng hi midangte pawh an awm nual bawk. Tunhma hma deuha ‘Khawchhak Lungpui’ lo lum tur hlauva insaseng ta ‘Pu Lalzawna Pawl’ te hlauh pawh kha Lungpui tak tak ni lovin, he huna thil lo thleng tur hi a ni zawk mai lo maw tia ngaite pawh an awm bawk a ni. Mi thenkhat hnena Pathianin Zoram ‘Thim Thuah Hnihna’ lo thleng tur chungchang, ‘Khawchhak Ral’ lo lian tur a hmuhtir hi mi thil chik mite chuan ‘China’ an nih an ring ber. India leh China hi khawvel sumdawnna lamah nasa taka thang lianin, an iner nasa hle a, tin, ramri chungchang thu avang hian an inkarah, chhungril takah boruak rit tak a inmung ru reng bawk. A bik takin Jammu and Kashmir leh Arunachal Pradesh chungchangah hian China rilru hi a za ru hle tih hi khawvel hriat a ni. Tin, tunhnai hian China sipaite hi an huangtau sawt riau a, ramri rawn pelin India tana ngaihmawhawm deuh taka khawsak an ching viau a ni tih tunlai Chanchin Thar-ah an puang ta zeuh zeuh bawk. Tin, Indian Defense Review Editor, Bharat Verma phei chuan kum 2012 hma ngeiin China hian India hi a beih a ring a, he thu hi Internet-ah chhiar tur a tam hle a, inhnialna pawh a chawkchhuak viau bawk a ni. China hian India a beih chuan ram hrang hrang a nghawng ngei ang a, chu chuan Indopui III-na a chawkchhuak mai ang tih hlauthawng ru tam tak an awm bawk a ni. Engpawhnise, Bharat Verma thuziak hi Pathian hnen atanga a dawn a ni nge ni lo tih kan hriatpui loh vangin a kum thu – 2012 hi chu rin bur tura han tarlang ka ni lo va, thleng dik thei, thleng dik lo thei a ni. Amaherawhchu, ‘Thim Thuahna Hnihna’ lo thleng tur Pu Saikhuma hrilhlawkna-a ‘Khawchhak Hnam Kawlh’ tih kan hmuh te, Pastor Chhawna’n ‘Khawchhak Diar Khim’ a sawi te leh Pu Chawngkhupa’n ‘Khawchhak atanga Zawng Hmaisen’ a tihte hi ngun taka han ngaihtuah khawm hian Bharat Verma thuziak pawh hi a dik ngeiin a rinawm a ni. Tin, “2012 hma ngeiin” a tih pawh hi kan sawi theih piah lam nimahse, ngun taka tunlai India-China Defense News han thlir hian kei chuan lo hnawl ngawt chu finthlak berin ka hre lo. Engpawhnise, Zoramin rinna leh thlarauva mi ropui kan neih, Pu Saikhuma leh Pu Chawngkhupa leh Pastor Chhawna te hnena hriattirna thu inang petu kan Pathian hian dawt thu ringawt chu a hriattir hauh lo vang. “Dik takin Lalpa PATHIAN chuan a rawngbawltu, a zawlneite hnenah a thuruk hrilh lovin engmah a ti lovang.” (Amosa 3:7) tih ziak ang khan Zorama ‘Hun Thim’ lo thleng turah hian mipuite kan inralrina, kan lo inpuahchah thiam theih nan a lo hriattir lawk zawk a nih a rinawm hle. Chuvangin, he ‘Hun Thim’ hmachhawn tur hian rinna leh thlarauva lo inbuatsaih hi kan tih tur pawimawh tak a ni ta! Pu Saikhuma hnena Pathian hrilhlawkna lo thlen dikzia chu Rambuai (1966) leh S.Vanlaiphai chungchangah kan hre ta a. Tin, thil mak leh ropui tak dang leh chu ‘Look East Policy’ a lo hmu lawk vek hi a ni kan ti thei ang. Kan hriat theuh angin India Sorkar chuan a innghahna ber, USSR chu a lo kehdarh tak avangin khawchhak lam ram, South East Asia ram (ASEAN)-te nena insumdawn tawnna tur Policy ropui tak, China ram economics pawh nghawng lawih phak ‘Look East Policy’ chu a duang chhuak a. India hmar chhak ram hi sumdawnna atan inkalpawhna tur ringawt ni mah ila, thil kal fuh dan azirin kawng tam takah hma kan sawn phah thei a ni. Look East Policy avang hian India hmarchhak ram State hrang hrangah Airports, Railways leh Kawngpui tha zawk siam lamah India Sorkar chuan nasa takin hma a la mek a. South East Asia ram hrang hrangte nena insumdawn tawnna lian tak kalpui tur a nih avangin Pu Saikhuma’n, “Zoram kawngpui kawtchhuah hi ‘Hmar lam’ ni tawh lo vin, ‘Chhim lam’ a ni tawh zawk ang…..” tia a lo sawilawkte hi a dikzia a lang chho mek zel a ni. Rambuai (1966) hma lam daih tawh atanga Mizo pa-in India Look East Policy lo piang tur a lo hmu lawk vek mai hi a makin a ropui hle a ni. Aw le, engpawhnise, Chanchin Tha hian Zofate hi min au nasa tawh hle a ni. A bik takin India ram leh South East Asia lam atangin kohna/sawmna leh mamawhna a nasa sawt hle. Sap/Mingo ho hi Asia rama Chanchin Tha hril tak tak turin an tuitla tehchiam tawh si lo va (chu chu anni pawhin an hai lo). Amaherawhchu, Chanchin Tha pechhuak tak tak tur chuan Zoram hi thenfai leh tihthianghlim kan ngai a, chu tak chu kan mamawh ‘Thim Thuah Hnihna’ lo thleng tur chu a ni ta! A rei tawh lovang. Lalpa-ah kan inbuatsaih a hun ta hle a ni. Milem ban sawm nei lak ata Lalpan min lachhuak ngei ang, leilung hausakna a thuhruk zawng zawng pawh hi mahni ke-a kan din huna lakchhuah chauh tur a ni. ZORAMTHAR a hnai ta, inralring ang u le! Zion-ah chuan tawtawrawt ham ula, ka tlang thianghlimah chuan inralrinna puang rawh u; he ram chhûnga mi zawng zawngte chu khur rawh se: LALPA ni chu a lo thleng mek a, a hnai tawh si a. – Joela 2:1 Jul 28 · SPECIAL REPORT
Posted on: Mon, 04 Aug 2014 06:46:10 +0000
Trending Topics
Recently Viewed Topics
© 2015