SAM : ( Tihhreawma ka awm hma khan ka vâk bo thin a; Tunah erawh chuan i thu ka zâwm ta. I thuruatte chu ka zir theih nan a Tihhreawma ka lo awm kha ka tân a tha a ni. Rangkachak leh tangka sâng tam tak ai chuan I kâa dân chhuak chu ka tan a tha zâwk e.) 119:1 Kawng a mi tha famkimte chu an êng a thâwl e, LALPA dân zawhtute chu. 119:2 A thuhriattirte zawmtute chu an êng a thâwl e, Thinlung zawng zawng a zawngtute chu. 119:3 A ni, anni chuan fel lohna rêng rêng an ti lo a; A kawngahte chuan an kal thin. 119:4 Nangin i thununna thute chu thupêkin min pe a, Thahnemngai tak a kan zawm theihna tûrin. 119:5 Aw, i thuruatte chu zâwm tûrin Ka awm dânte hi tihnghehin awm teh sela aw! 119:6 Chu mi hunah chuan ka mualpho lo ang, I thupêkte zawng zawng ka pawisak hunah chuan. 119:7 Thinlung dik tak puin lawm thu ka hrilh ang che, I rorêlna felte chu ka zir hunah chuan. 119:8 I thuruat chu ka zâwm ang e. Aw mi kalsan hlen suh ang che. 119:9 Tleirawlin engtin nge a awm dân a tihthianghlim ang? I thu ang zel a a awm dân vêng thain. 119:10 Ka thinlung zawng zawng hian ka zawng che a: Aw, i thupêkte ka kal bosan chu phal lul suh ang che. 119:11 I chung a thil ka tihsual loh nân I thu chu ka thinlungah ka khawl khâwm a. 119:12 Aw LALPA, i êng a thâwl e; I thuruatte chu mi zirtir ang che. 119:13 I kâ a i rorêl chhuak zawng zawngte chu Ka hmuiin ka hriattir ta. 119:14 I thuhriattir kawngah chuan ka hlim a, Hausakna zawng zawng a ka hlim ang maiin. 119:15 I thununna thute chu ka ngaihtuah ang a, I kawngte chu ka ngaihsak bawk ang. 119:16 I thuruat chungahte chuan ka lâwm ang a: I thu chu ka theihnghilh lo ang. 119:17 Ka nun theihna tûrin i chhiahhlawh chungah hian tha takin ti ang che; Chutichuan i thu ka zâwm ang. 119:18 I dân thu atang a thilmak ka hmuh theih nân, Ka mitte hi mi tihvarsak ang che. 119:19 Leiah hian mikhual ka ni a: I thupêkte chu ka lakah zêp suh ang che. 119:20 Ka nunna hi keh sawmin a awm a, Englai pawh a i rorêlnate a ngaih avângin. 119:21 Mi chapo, ânchhe dawngte chu, i zilhhau a, I thupêkte vah bosan thinte chu. 119:22 Sawi chhiatna leh hmusitna hi ka hnên ata la bo ang che; I thuhriattirte chu ka zâwm si a. 119:23 Mi liante pawh an thu a, mi sawisel a: Nimahsela i chhiahhlawh hian i thu ruatte chu a ngaihtuah zawk si a. 119:24 I thuhriattirte chu ka lâwmna a ni a, Rem mi ruatsaktute pawh a ni. 119:25 Ka nunna hi vaivutah a bet tlat a: I thu ang zêlin mi tiharh ang che. 119:26 Ka awm dânte chu ka hriattir che a, nangin mi chhâng a: I thuruatte chu mi zirtir ang che. 119:27 I thununna kawng chu mi hriat thiamtir ang che: Chutichuan i thilmak tih thute chu ka ngaihtuah ang. 119:28 Ka nunna hi lungngaih avângin ka tuiral thin. I thu ang zêlin mi tichak ang che. 119:29 Awm dan dik lo hi ka hnên ata la sawn la: I dan khawngaih takin mi pe ang che. 119:30 Awm dân rinawm ka thlang a: I rorêlnate ka hmaah ka awmtir a. 119:31 I thuhriattirahte hian ka bet tlat a: Aw LALPA, mi timualpho suh ang che. 119:32 I thupêk kawngah chuan ka tlân ang. Ka thinlung hi i tihzau hunah chuan. 119:33 Aw LALPA, i thuruat kawng chu mi entir ang che; Tichuan a tâwp thlengin ka zawh dawn nia. 119:34 Hriat thiamna mi pe ang hche, tichuan i dân chu ka vawng tha dawn nia; A ni, ka thinlung zawng zawng hian ka zâwm ang. 119:35 I thupêk kawngah mi kaltir ang che; Chu mi-ah chuan ka lâwm si a. 119:36 I thuhriattir lamah chuan ka thinlung hi thlektir ang che, Duhamna lamah ni lo-in. Thil engmah lo mai mai en lo tûrin ka mit mi laktir la, I kawngahte chuan mi tiharh ang che. 119:38 I thu chu i chhiahhlawh hnênah hian tinghet ang che, Chu chu nangmah tihtu tan a ni. 119:39 Mi sawichhiatna ka hlauh hi la bo vang che, I rorêlte chu a tha si a. 119:40 Ngai teh, i thununna thute chu hriat ka châk thin a: I felna avângin mi tiharh ang che. 119:41 Aw LALPA, i ngilneihnate chu ka hnênah lo kal rawh se, I chhandamna ngei chu, i thu ang zelin. 119:42 Chutichuan, mi sawi chhetu chhânna tûr ka nei ang; I thu ka ring si a. 119:43 Tin, thutak thu chu ka kâ ata hi la chhuak vek suh ang che; I rorêlnate chu ka beisei si thin a. 119:44 Chutichuan i dân chu ka zâwm fo ang, Kumkhaw tlaitluanin. 119:45 Tin, dîp dal loh-in ka lêng ang; I thununna thute chu ka zawng si a. 119:46 I thuhriattir thute chu lalho hmaah ka sawi ang a, Ka zak lo vang. 119:47 Tin, i thupêk, ka ngaihnat chungahte chuan, Ka lâwm ang. 119:48 I thupêk, ka ngaihnat lamahte chuan ka kutte ka phar ang a; I thuruatte chu ka ngaihtuah ang. 119:49 I chhiahhlawh hnên a thutiam chu hre reng ang che, Nangin mi beiseitir avângin. 119:50 Chu chu ka hrehawmnaah pawh ka thlamuanna a ni: I thu chuan mi tiharh ta si a. 119:51 Chapote chuan nasa takin mi nuihzabur a: Nimahsela i dân chu ka kalkawisan lo. 119:52 Aw LALPA, hmasâng a i rorêlte chu ka hre reng a, Ka inthlamuan thin. 119:53 Lungnih lohna nasa tak hian mi tlakbuak ta a, Mi suaksual i dân kalsantute avângin. 119:54 Ka khualzinna inah hian I thuruatte chu ka hla a ni thin. 119:55 Aw LALPA, zanah chuan i hming ka hre reng thin a, I dân pawh ka zâwm thin. 119:56 Chung chu ka nei a, I thununna thute chu ka vawn that avângin. 119:57 LALPA chu ka chanvo a ni: I thu ka zawm ang tih ka sawi tawh kha. 119:58 Ka thinlung zawng zawngin i khawngaihna ka ngen a: I thu ang zelin mi khawngaih ang che. 119:59 Ka awm dante ka ngaihtuah a, I thuhriattir lamah chuan ka ke ka pen ta a. 119:60 I thupêkte zâwm tûrin Ka hmanhmawh a, rei ka rial lo. 119:61 Mi suaksualho hruihrualte chuan mi zem hlawm reng a; Nimahsela i dân chu ka theihnghilh lo. 119:62 Zan laiah lawm thu hrilh tûr chein ka tho ang, I rorêl felte avângin. 119:63 Nangmah tihtu zawng zawng leh, I thununna thute zâwmtute thian ka ni. 119:64 Aw LALPA, leilung hi i ngilneihnain a khat a ni: I thuruatte chu mi zirtir ang che. 119:65 Aw LALPA, i thu ang zelin I chhiahhlawh hi i titha thin. 119:66 Ngaihtuah thiamna leh hriatna mi zirtir ang che; I thupêkte chu ka ring si a. 119:67 Tihhreawma ka awm hma khan ka vâk bo thin a; Tunah erawh chuan i thu ka zâwm ta. 119:68 Nang chu i tha a, thil tha i ti bawk a; I thuruatte chu mi zirtir ang che. 119:69 Chapote chuan ka chungah dâwt an phuahchawp a: Ka thinlung zawng zawng hian i thununna thute chu ka vawng tha ang. 119:70 An thinlung chu rîlbawh thau angin a thau a; Kei erawh chu i dân chungah ka lawm thin. 119:71 I thuruatte chu ka zir theih nan a Tihhreawma ka lo awm kha ka tân a tha a ni. 119:72 Rangkachak leh tangka sâng tam tak ai chuan I kâa dân chhuak chu ka tan a tha zâwk e. 119:73 I kutin mi siamin, mi din a ni: I thupêkte chu ka zir theih nân hriatthiamna mi pe ang che. 119:74 Nangmah tihtute chuan mi hmu ang a, an lâwm ang; I thu chu ka beisei thin avângin. 119:75 Aw LALPA, i rorêlte chu a fel tih leh, Nang chuan rinawm takin a ni, mi tihhreawm ni tih ka hria. 119:76 I chhiahhlawh hnên a i thutiam ang zelin Khawngaih takin i ngilneihna chu ka thlamuanna tûr ni rawh se. 119:77 Ka nun theihna tûrin i lainatnate ka hnênah lo kal rawh se: I dân chu ka lâwmna a ni si a. 119:78 Chapote chu mualpho-in awm rawh se; dik lo takin mi titlâwm ta si a: Nimahsela i thununna thute chu ka ngaihtuah ang. 119:79 Nangmah tihtute chu ka lamah hawi rawh se, Tichuan i thuhriattirte chu an hre dawn nia. 119:80 Ka mualpho lohna tûrin Ka thinlung hi i thuruatahte chuan tha famkimin awm rawh se. 119:81 Ka nunna hi i chhandamna ngaiin a chau ta a: Nimahsela i thu ka beisei thin. 119:82 I thu thlir nân ka mit a vai zo ta a, Nangin engtikah nge mi thlamuan ang? ka ti, ka ti thin a. 119:83 Meikhu ur savun pêng ang chu ka lo ni ta si a; Nimahsela i thuruatte chu ka theihnghilh lo e. 119:84 I chhiahhlawh kum chin tûr hi engzat nge ni dawn? Mi tiduhdahtute chungah hian engtikah nge ro i rel dawn? 119:85 Mi chapo, i dân ang a awm lote chuan, Ka tlak nân khuarkhurumte an lai a 119:86 I thupêk zawng zawng chu a rinawm a ni: Anni chuan dik lo takah mi tihduhdah thin hi; mi tanpui ang che. 119:87 Anni chuan leiah hian mi tiboral thelh thelh a; Nimahsela i thununna thute chu ka hawisan si lo a. 119:88 I ngilneihna ang zelin mi tiharh ang che; Chutichuan i kâ a thuhriattir chu ka zâwm dâwn nia. 119:89 Aw LALPA, kumkhua atân I thu chu vânah nghet takin a awm a. 119:90 I rinawmna chu chhuan zawng zawng thlengin a awm ang: Leilung hi i tinghet a, a awm reng a ni. 119:91 Chungte chu vawiin hian i rorêlte angin an awm reng a; Thil zawng zawng chu i chhiahhlawhte an ni si a. 119:92 I dân chu ka lâwmna ni suh sela chuan, Ka hrehawmnaah khan ka boral tawh tûr a ni. 119:93 I thununna thute chu engtikah mah ka theihnghilh lo ang; Nangin chung chuan mi tiharh ta si a. 119:94 I ta ka nih hi, mi chhandam ang che; I thununna thute chu ka zawng si a. 119:95 Mi suaksualte chuan mi tihboral tumin mi nghâk thîn a; Nimahsela i thuhriattirte chu ka ngaihtuah ang. 119:96 That famkimna zawng zawng tâwp chu ka hmu ta a, I thupêk erawh chu a zau khawp mai a ni. 119:97 Aw, i dân hi ka va ngaina êm! Nileng a ka ngaihtuah thin a ni. 119:98 I thupêkte chuan mi dotute aia fing zâwkin mi siam a; Kumkhua a ka hnên a a awm fo thin angin. 119:99 Min zirtirtu zawng zawng aiin finna ka nei zâwk a ni; I thuhriattirte hi ka ngaihtuah a nih thin avângin. 119:100 Tarte ai chuan ka hre thiam zawk a ni, I thununna thute hi ka vawn that avângin. 119:101 I thu ka zawm theihna tûrin Kawng sualah rêng rêng chuan ka kete hi pên ka phal lo. 119:102 I rorêlna lakahte chuan ka peng lo; Nangin mi zirtir avângin. 119:103 I thute hi ka tân a va thlum êm! A ni, ka kâ atân a va thlum êm! A ni, ka ka atân chuan khawizu aiin a thlum zawk. 119:104 I thununna thute avângin hriat thiamna ka nei thin: Chuvangin awm dân dik lo tinreng hi ka hua a ni. 119:105 I thu hi ka ke atânte hian khawnvar a ni a, Ka kawng atân êng a ni. 119:106 I rorêlna fel takte chu zawm tûrin Chhia ka chham a, ka tinghet bawk a. 119:107 Nasa taka tihhreawmin ka awm a: Aw LALPA, i thu ang zelin mi tiharh ang che. 119:108 Aw LALPA, khawngaih takin ka kâ a duh thu a thilpêkte hi la la, I rorêlnate chu mi zirtir ang che. 119:109 Ka nunna hi ka kutah a awm fo thin a; Nimahsela, i dan chu ka theihnghilh ngai lo. 119:110 Mi suaksualte chuan ka awh nân thang an kam a; Nimahsela i thununa thute chu ka vah bosan lo e. 119:111 I thuhriattirte chu kumkhua a rochunah ka la a; Ka thinlung tihlimtu a ni si a. 119:112 Kumkhuain, a tâwp thlengin, I thuruatte ang a ti tûrin ka thinlung ka thlêktir a. 119:113 Rilru mumal nei lo mite chu ka hua a; I dân erawh chu ka ngaina a ni. 119:114 Nang chu ka bihrûkna hmun leh ka phaw i ni a: I thu ka beisei a ni. 119:115 Nangni thil tha lo titute u, mi kalsan rawh u; Ka Pathian thilpekte ka vawn that theih nân. 119:116 Ka nun theihna tûrin i thu ang zelin mi chelh reng la, Ka beisei chungah hian zakin mi awmtir suh ang che. 119:117 Mi kai ang che, tichuan ka him ang a, I thuruatte chu ka pawisa fo dawn nia. 119:118 I thuruatte vah bosantu zawng zawng chu i hmusit a; An bumna chu dâwt a ni si a. 119:119 Lei a mi suaksualte zawng zawng chu englo êkchhia angin i tibo thin a: Chuvangin i thuhriattirte chu ka ngaina a ni. 119:120 Ka tisa hi nangmah tihin a khûr a; I rorêlnate chu ka hlau bawk a. 119:121 Ro ka rel a, fel takin ka ti thin a ni: Mi hnehchhiahtute lakah mi thlahthlam suh ang che. 119:122 I chhiahhlawh chungchang thu-ah, a thatna tûrin a bul tum la: Chapoten mi hnehchhiah suh se. 119:123 I chhandamna thlir nân ka mit a vai zo ta a, I thu fel tak thlir nân nên. 119:124 I ngilneihna avângin i chhiahhlawh chungah hian ti la, I thuruatte chu mi zirtir ang che. 119:125 I chhiahhlawh ka ni a, hriat thiamna mi pe ang che; I thuhriattirte chu ka hriat theih nân. 119:126 LALPA, thawh a hun ta; I dân hi engmah lo-ah an siam ta si. 119:127 Chuvangin i thupêkte chu rangkachak aiin ka ngaina a ni, A ni, rangkachak thianghlim ai pawhin. 119:128 Chuvangin kawng tinreng thu a i thununna thu zawng zawngte chu dikin ka hria a; Awm dân dik lo tinreng hi ka hua a ni. 119:129 I thuhriattirte chu a mak a ni: Chuvangin ka nunna hian a vawng tha thin. 119:130 I thu hrilhfiah hian mite a tiêng a; Mi mawlte chu a hriat thiamtir thin. 119:131 Ka kâ ka âng zau a, ka thaw hlawp hlawp a; I thupêkte chu ka chak avângin. 119:132 Ka lam lo hawi la, mi khawngaih ang che, I hming ngainatutte i khawngaih ang khan. 119:133 Ka ke pênte hi i thu-ah tinghet la; Sualna rêng rêng ka chungah thu neihtir suh ang che. 119:134 Mihring hnehchhiahna lakah chuan mi chhanhim ang che: Chutichuan i thununna thute chu ka zâwm dawn nia. 119:135 I hmêlin i chhiahhlawh chhun êng la; I thuruatte chu mi zirtir ang che. 119:136 Ka mittui hi lui tui angin a luang thla a, I dân an zawm loh avângin. 119:137 Aw LALPA, nang chu i fel a, I rorêlte pawh a dik a ni. 119:138 I thuhriattirte chu fel tak leh Rinawm êm emin thu i pe a. 119:139 Ka thehnemngaihna hian mi tiboral ta, Mi dotuten i thu an theihnghilh tak avângin. 119:140 I thu hi a thianghlim êm êm a ni; Chuvangin i chhiahhlawh hian a ngaina a ni. 119:141 Mi tê leh mi hmusit ka ni a: Nimahsela i thununna thute chu ka theihnghilh ngai lo e. 119:142 I felna chu kumkhaw felna tûr ani a, I dân pawh thutak a ni. 119:143 Manganna leh thlaphanna chuan mi tlakbuak ta a: Nimahsela i thupêkte hi ka lâwmna a ni. 119:144 I thuhriattirte chu kumkhua atân a fel a ni: Hriat thiamna mi pe ang che, tichuan ka nung reng ang. 119:145 Ka thinlung zawng zawngin ka ko che a; aw LALPA, mi chhâng ang che: I thuruatte chu ka vawng tha dawn nia. 119:146 Ka ko thin che a; mi chhandam ang che. Tichuan i thuhriattirte chu ka zawm dawn nia. 119:147 Khawfing chat chu ka khalh a, ka au thin a: I thute chu ka beisei thin. 119:148 I thu ka ngaihtuah theihna tûrin Ka mitin zân vênte chu ka men khalh thin. 119:149 I ngilneihna ang zelin ka aw hi ngaithla la: Aw LALPA, i rorêlnate ang zelin mi tiharh ang che. 119:150 Ngaihtuahna sual umho chuan an rawn hnaih a; Anni chu i dân hlata awm an ni. 119:151 Aw LALPA, nang chu i hnai a; I thupêk zawng zawng chu thutak a ni. 119:152 Hmasângin, i thuhriattirte atangin, Chung chu kumkhua atân i tinghet tih ka lo hre tawh. 119:153 Ka hrehawmzia hi ngaihtuah la, mi chhanhim ang che; I dân chu ka theihnghilh ngai si lo a. 119:154 Ka thu mi sawipuiin, mi tlan la; I thu ang zelin mi tiharh ang che. 119:155 Chhandamna chu mi suaksualte lak a hla a ni; I thuruatte chu an zawn loh avângin. 119:156 Aw LALPA, i lainatnate chu a nasa a ni: I rorêlnate ang zelin mi tiharh ang che. 119:157 Mi tiduhdahtute leh mi dotute chu tam tak an ni. Nimahsela i thuhriattirte chu ka kal kawisan lo. 119:158 Vervêk tak a titute chu ka en a, ka lungni lo a; I thu an zawm loh avângin. 119:159 I thununna thute ka ngainatzia hi ngaihtuah la; Aw LALPA, i ngilneihna avângin mi tiharh ang che. 119:160 I thu infinkhawm chu thutak a ni a; I rorêlna fel tinreng pawh hi kum khuain a awm reng ang. 119:161 Mi lianten eng a khawlawi lo-in mi tiduhdah a; Nimahsela ka thinlung chuan i thute a ni, a hlauh ni. 119:162 I thu-ah hian ka hlim a ni. Thil ropui tak râllâk a hmutu angin. 119:163 Dâwt hi ka huain ka ten a; I dân erawh chu ka ngaina a ni. 119:164 Ni khatah vawi sarih ka fak thin che a ni. I rorêl felte avângin. 119:165 I dân ngainatute chuan thlamuanna nasa tak an nei a, Tlûkna rêng rêng an nei lo. 119:166 Aw LALPA, i chhandamna ka beisei reng a, I thupêkte angin ka ti thin. 119:167 Ka nunna hian i thuhriattirte chu a zâwm thin a; Ka ngaina êm êm a ni. 119:168 I thununna thute leh i thuhriatirte chu ka zâwm thin a; Ka awm dân zawng zawng hi i hma a awm ani si a. 119:169 Aw LALPA, ka au thâwm hi i hmaah lo hnai rawh se: I thu ang zelin hriatthiamna mi pe ang che. 119:170 Khawngaih ka dilna hi i hmaah thleng rawh se: I thu ang zelin mi chhanhim ang che. 119:171 Ka hmui hian fakna thu sawi rawh se; Nangin i thuruatte chu mi zirtir thin avângin. 119:172 Ka lei hi i thu fakin zai rawh se; I thupêk zawng zawng chu felna a ni avângin. 119:173 I kut chu mi tanpui tûrin inpeihsain awm rawh se: I thununa thute chu ka thlang si a. 119:174 Aw LALPA, i chhandamna chu ka châk thin a; I dân chu ka lâwmna a ni. 119:175 Ka nunna hi nung rawh se, tichuan a fak dawn che nia. I rorêlnate pawhin mi tanpui rawh se. 119:176 Berâm bo angin ka vâk bo a; i chhiahhlawh hi zawng ang che; I thupêkte chu ka theihnghilh ngai si lo a.
Posted on: Tue, 26 Nov 2013 19:51:01 +0000
Trending Topics
Recently Viewed Topics
© 2015