SAPELE/DELTA STATE MUST BETTER 01/06/2014 GOD BLESS YOU Becos say na the beginning of a new month we dey, e good for us to slow down a bit and take things slow. Remember by now say, you suppose don know say nor be by who run pass. Or by who strong pass. Or by who work pass. Or by who get experience pass. Nor be by who Holy pass. Or by who get levels pass. Everything about this life dey God hand e dey. You fit don carry one kain load for head since many many years now. You don pray sotay your mouth nor know which word to say again. You don wake up in the middle of the night to beg God to answer you or turn your situation around. Many of us don dey suffer from one kind of sickness or the other. Some na debts wey we dey owe nai dey give us sleepless nights. Some of us na barreness be our dying issues. Many of us nor get work. And for some of our families, no peace and joy. Many marriages dey experience a lot of troubles. My pipo, how many we fit mention? But becos say God wey create us know all wetin we dey go through for life, he dey always get time when e dey use take dey settle each and every one of us. So my pipo, nor give up in prayers. God know how e go take answer you. He know how to send your helper come. So nor think say na as you dey run so, you suppose don reach where you dey go. Nor feel say as you dey pray so, God don suppose answer you. Nor reason am say, as you dey work since, God don suppose make you get everything you want for life. Or feel say becos you get good results from school, you suppose dey work the best work. Nor be so o. Nor be like that. Experience nai be the best teacher. Na God get time. When e time reach, he go answer you. And your answer go become a blessing. And we know say, who God bless, no man go fit curse am. We all na human. With falling tears and bended knees, I call upon the name of God wey we all dey serve. I look through the land of Sapele and see a lot of us begging God for a miracle. I put my ears for ground and hear a lot of us pleading and praying for Gods intervention in life. But becos I know how it feels to be in need, I join my faith with everybody wey need the hand of God. May this month be the month of our divine contact with God. Amen. God go open our files this month. Amen. God go clean our eyes this month. Amen. That thing wey dey give us sleepless nights go get permanent solution this month. Amen. Anything evil nor go come from our heart this month and forever. Amen. Everything wey we go do from this month go must bring good name to God, to us, to our family, to our Sapele, our Delta State and to our Country, Nigeria. Amen. And the song wey we go sing from today go change our lives for good. Amen. My pipo, just believe and let God perform the finish work. Na faith we all need to claim wetin we need from God. May God see us through. Amen. Happy New Month. Oya reply studio if u really love dis forum. If you are glad you are alive, Say a prayer of faith to any fan of this forum. And I believe, God will seal our prayers for divine answers. Amen. My prayers go to all my fans in this forum and to everybody living in Sapele. God Bless you. God Bless Sapele. SAPELE/DELTA STATE MUST BETTER.
Posted on: Sun, 01 Jun 2014 15:01:20 +0000
Trending Topics
Recently Viewed Topics
© 2015