SZ, 100% durust tajzia kia hai aap ne lekin afsos is mumlikat e khuda daad mein cherismatic jokaron ko leader bana kar tamasha karnay bhej dia jata hai aur puri qaum ko TAMASHAEE bana dia jata hai. In ke ye Tamashay tax payers ke paison ya pir kuch aur posheeda zaraye se hasil shuda raqoom jari o sari rakhtay hein. Media ko in Tamashon ki promotion ke liyay be panah paisa de kar mulk mein ye taasur qaim kia jata hai ke yehi Jokar tumharay Azadi ke zamin aur Inqilab dahinda hein. Is narrative ko ba zor e bazoo(jo boht hi lambay nazar aatey hein) Rigging cases, be gunah logon ke qatal aur tarah tarah ke engineered hathkhandon ke zaryay becha jatha hai. Society ko ye bawar karaanay ke Mulk mein Tawayef ul Muluki hai, na police, na thana, na Adalat, na parleman aur na hi Dastoor ki koi zaroorat hai,Na sabar aur tameez ka lehaz. Agar darna hai to dar ya to in Jokaron se hona chaiyay ya pir Fauj se. Ye Fascists Fauj ka naam jaga jaga is tarah se letay hain jaisay Fauj in ki ham piyala are hum nawala saathi ho. Ye Qasdan Police ko khuli Dhamkian aur Galian jabke sharatan Fauj ke taranay gatay hein tak e qaumi idaron aur logon ke darmian bad gumani, shuqooq aur shubaat paida kiay jaen. Doosri taraf nau jawanon ko jan boojh kar 24/7 Tv ke live coverage ke zaryay sirf aur sirf nafrat ke paighamat diay jatay hein aur in paighamat ko intahai mediocre music ke zariyay promote kia jata hai jo entertainment starved society ke liyay khoob soorat afeem ka kam deti hai. Aap ne sahi ishaara kia ke youth ko tehzeeb, shaistagi aur bhai charay se ya muqalmay ke zaryay door kia gaya hai aur ye kam Dictatoron ne Taleem ko qasdan commercialise kar k kia hai ta ke aam awam k bachay se dur rahein. Taleem ke naam pe jo Dukanein aur karkhanay pichli 2 dhahiyun mein promote kiay gai hein un mein Paison ke badlay sirf degrees aur badtameezi hi mil saki hai. Merey nazdeek ye zehreela kam boht soche samajh kar kuch bikao elements ke zariyay karwaya gaya hai. Ye poori qaum ke liyay aik lamha e fiqria hai k 2 Fascist Jokaron ko chand hazar intihai bad tehzeeb nafoos ke saath Islamabad aisay hallat mein laya gaya k Hamari Fauj aik taraf TTP ke khilaf Zarb e Azb mein masroof hai, IDPs ka masalh darpesh hai aur doosri taraf borders par Indian Forces roz jang bandi ki kilaf warzian kar rahi hein. Tamam mulk mein Karo bar,economy aur mulk ki saakh ko shadeed nuqsaan paunchaya ja raha hai. Islamabad mein zindagi maflooj ho kar reh gai hai, schools aur colleges musalsal band hein aur chand hazar pur tashadad latt bardar logon ke zariyay law and order ki situation paida ki gai hai, mulki imlak par hamlay aho rahay hein aur Ptv headquarter par qabza kia gaya jo Fauj ne khali to karwa liya lekin kisi ko giriftar nahi kia gaya. Kia ye chand hazaar log 20 karore Pakistaniun ki numaendagi kaisay kar saktay hein???? Ye sawal hum sab ko pehlay apnay aap se aur pir aik doosray se aik mukalmay ke zariyay poochna chaiyay kiun k gali galoach aur tashadud hamein sirf Khana Jangi ki taraf le jaega aur shayyad hamaray mushtatreka dushman yehi chahtay hein?????
Posted on: Tue, 02 Sep 2014 07:13:39 +0000
Recently Viewed Topics
© 2015