Sapele Glory Must Be Restored! MORNING NEWS UPDATE: DATE: SATURDAY 26th JULY 2014. UNA DON HEAR? Report jump through Ogoro enter my studio say 3 days ago nor be small taking for Police people, for both Ajogodo and straight new road. One police officer go stop one tired okada man, based on traffic rule break down, but where the police officer for fork up be say the money when him tell the okada man to bring to take appease the gods of bribery too high, him say the amount fit buy another Okada, as the argument de go on, na for der other okada men come de ride come, as time de go the okada men de gather de park, na once all of them gather all the police officers wen de the ground there with kponsing. One of the Okada men break the head of one of the police men, but the police men con re enforce come and dem finally carry the okada man and e machine go station. Report use Jimpama sore, enter my studio say, one Odumutete (Small pikin rapper) run out of luck 2 days back for Abeke Road, Opposite them Ogwele place. This Idiootic boy, go de shuck e hand for one very small girl body, but God come punish am, because dem catch am. Nor be small brusing those Ijaw boys squad give the guy, dem usam sit down ground after which dem makam sign many papers with the small girl family. Report when reach us now through Delta State University Abraka Help Desk(DELSU HELPDESK) say the date for their post UTME exam when them schedule to hold from on the 29th of July --- 2nd of August 2014 nor go work again, because of the public Holiday when Federal Government Declare. The current date when them choose now, na from Wednesday 30th July -- Friday 1st of August 2014. All the stipulated venue for all the departments still de valid. The Management of DELSU apologise for the inconveniences when the change of date go cause. Also Report all the way from Auchi Polytechnic Help Dest, inform us say Auchi ND Sales of Form don expire, make una nor let any burger deceive una collect money o. NEPA!PHCN!BEDC! I de alert the management BEDC say some unscrupulous entity don de do illegal connection follow every where for the town now, 2 days ago I spot some Abeke Road boys with the barger for front of Jimor barbing Salon when de before the Anglican Church for front of Anegbe Lane Junction, this illegal electrician go de reconnect the light when BEDC cut for Morning. Based on say d people when dem cut their light de owe light bill. Jomoh you de affected, so you nor fit pay light bill abi. I de call on BEDC to go disconnect that light now. Report use Dr Afoke injection enter my studio say the Federal Government don declare Monday 28th July and Tuesday 29th as public holiday. Also I de use this update de warn all Okada men, say make dem give main road chance as from 7pm upward because police people don vow to deal root lessly with all Okada men based on say during the clash when dem get for Ajogodo Road 2 days ago lead to the serious breaking of one police man head. Report enter our say, one Gana Burger use e motor go jam one electronics store yesterday for Abeke Road, but thank God sha, say no casualty de recorded for the incident. The damage when the accident cause for the store don de undergo reconstruction. Report enter my studio say some unscupolous entity don go forge ID card, and dem de parade them selves to be Sapele Olofofo Unugbragada and Sapele Tafia personal assistant and HRM for the town, and dem de use that platform de ex tort money from notable personalities for the town, and also de deceive small girls de sleep with them. I de use this update de inform the public say neither me or ST issue any ID card to any group of individuals when de parade themselves as either the Deputy, HRM or Personal assistant to the duo forum. One of una when de do this nonsensical thing name na Obruche Nikoro. I just de sorry for you because when de hold you, you go confess witch when you nor get. Report reach us too all the way from Lagos show say, Nigeria don record the first EBOLA DISEASE yesterday from the Lagos Teaching Hospital.. We go give una more information about this disease later. Una Good Morning and make una enjoy Happy Saturday!
Posted on: Sat, 26 Jul 2014 06:33:54 +0000
Trending Topics
Recently Viewed Topics
© 2015