Sapele Glory Must Be Restored! WHO GO TALK FOR SAPELE! When I wake up from bed this morning, I just begin wonder for this town when my mama and papa for born me. I know say una go de imaging say wetin Olofofo de wonder for again. Na true say baba God bless us with the gift of life and sound health, but me nor go fit end for just that gift. Some people for life de struggle to survive while others de live with full focus on the future. Me na the later category I belong to. One wise man talk one word and I go quote the word, him say The battle you stand to fight today will not confront and overcome your children tomorrow. This publication when I de do so, assuming somebody else do am I for nor de do this publication today. In other words assuming we get Sapele Tafia, Sapele Olofofo Unugbragada and others before now when de use same medium de address issues when de affect the common man, we for don pass this level since. But I still thank God say this oyeburu, Aproko, Tafia, Olofofo, Tatafo work when we put ourselves so without salary still de produce in one or two little way the needed change when we de hope to see, and I pray say God go finally take us to our dream destination. WETIN MAKE I WRITE THIS MORNING: This morning I wan ask some questions when go beg answers from our Okpe Leaders and our Sapele Politicians: 1. Since 1991 when mark the inception of Delta State, wetin be one notable thing when any government Official go boast of say him don put in place for this town, when the people de benefit from today. 2. If na through say according to the story when I hear say Okpe chiefs gather kill one of their kings, when dem say him wicked and according to the story, them say him con lay course on the land before him die. Wetin stop the okpe chiefs from coming together to fashion out ways to appease this their king. 3. Why e be say since all these years when we de experience different administration , why Sapele never still get University, Polytechnic, Collage of Education or even School of Nursing. 4. Wetin be the problem? Okpe/Urhobo people, una de sleep or na wetin de happen. See Oghara, see mosogar, make una compare this two places to Sapele in terms of Education. 5. Why e be say, the representatives when we de send go represent us nor de fit talk. Abi the King swear nai still de work on them. 6. My people, una sure say our government and Okpe Leaders get plan for this land. 7. For over 8 years, our Sapele Main Market and Stadium de under construction and even up till now, we nor fit ascertain the actual state of these two project, but yet we say we get representatives, we say we get commissioners, we say we get chairmen, we say we get good and sound okpe lawyers, but non of them de talk, do or write any thing about this gross capital abandoned project. Na we de serve the government? or na the government de serve us? 8. Why e be say na during election period nai dem take de know say people when de in need de stay around Sapele, na that time dem go wan give out 2 basket of rice, tin tomatoes, Omo and N500. 9. Who we wan vote for when go get this town for mind, when go give us UNISAP(University of Sapele) or Delta State Polytechnic Sapele or Collage of Education Sapele or School of Nursing. Sapele.. Na wetin? who de worry this town? na crime if person dress finish for morning waka from e papa house go school, de swear for Sapele young boys and girls say if dem must go school, dem must go cue up for Uduaghan pack. If other student enter motor say them de go school for Sapele the world go end. 10. Last year nai de announce say the state governor don approve the recommendation to build 5 polytechnics for the state, but up till today not one trace or light I de see. 11. Na who go rescue this town, from this inhuman treatment. Governor Emmanuel Uduaghan, I know say you nor get reach 1 year for Office, but you fit do one thing for us, even though if na the last thing when you go do for Sapele. Try make you lay the foundation of either a university, Polytechnic or Collage of Education for Sapele, so that at least when the next governor come into power, him go get mind to complete am, just like the way Oga James Onanefe Ibori leave the Market and stadium for you. This my request small o, Oga governor nor fall your hand. Baba God I beg make this one happen. My people hope I yarn una mind.
Posted on: Fri, 25 Jul 2014 09:10:11 +0000
Trending Topics
Recently Viewed Topics
© 2015