Studio for di Juan Jesus den akshon Jesus a sigui ku e meta pa proba ken E ta. Segun Juan 2:13-18, El a drenta e tèmpel durante e pasku di e hudiunan. Komo un di su siguidornan, Juan a tuma nota di e aktividatnan ku El a realisá den e tempel na Jerusalem. En konekshon ku e selebrashon di e fiesta di pasku, Jesus a bishita e tèmpel pa asina kumpli ku e rekesitonan di e lei (Segun Eksodus 34:18-23). Pasku tabata un di e fiestanan komemorativo ku e pueblo mester a observa tur aña. Dios a libra e israelitanan for di e plaga di morto na Egipto; p’esei El a ordená nan pa komemorá e evento druante nan generashonnan (Eksodo 12,13). Komo huidiu, Jesus tambe a partisipa fielmente na e selebrashonnan aki. Durante su bishita ayá na Jerusalem, El a manifesta su desaprobashon kontra e mal uso di e tèmpel i e Señal di su outoridat i divinidat (Juan 2:13-18). Fervientemente, El a demonstra Su amor pa e adorashon di Dios. Ku sopresa, El a mira kon e hende a kombertí e luga santu di Dios na un kas di nogshi; esta, un berdadero mashe, kaminda nan tabata okupá ku bendementu i kumpramtabata na luga di sirbi Dios. Pa Jesus e komportashon horibel aki tabata insorportabel! Mes ora, El a pone man na obra I a kuminsa saka afor tur esnan ku a soru pa e bista mahos aki den e tèmpel. Komo e bon samaritano, E no tabata kontra pa ningun hende gana nan pan di kada dia; ni tampoko, pa nan hasi negoshi; sinembargo, Jesus a desaprobá kategorikamente ku nan tabata usa e tèmpel pa metanan komersial. P’E kada kos tin su luga. E tempel tabata e luga kaminda Dios a risibi adorashon; p’esei, El a kore ku tur e bendedornan I a boltu e mesanan di e kambiadornan di plaka, pasobra e tèmpel no ta e luga pa aktividatnan asina. El a bisa nan: “stop di hasi e Kas di mi tata un kas di Negoshi! Esaki ta prome biaha Jesus ta involví den tipo akshon asina den e tèmpel. Sigur, e mester tabata hopi molestia ku e situashon malu aki. Mas leu den e buki di Juan, Jesus a definí e responsabilidat di e “Berdadero Adoradornan” di Dios (Juan 4:23,24). El a mustra ku nan mester adora “Dios den Spiritu i berdat” (pasobra Dios ta spiritu), esei ta impliká ku nan mester siña duna Dios un luga kompletamente santifiká, un luga i ora apart den nan bida pa Dios, no por meskl’e ku otro interes (Ek. 19:12, Juan 17:17, 1Pedro 3:15). Pues, No tin mag di atende ku otro asunto ora hende ta bezig ta adorando Dios. E profesa Habakok a bisa: “Ma Señor ta den Su temple Santu laga henter tera ketu ketu Su dilanti.” (Hab. 2:20 ). Esaki kier men ku no ta permití pa hende usa telefon i chat, atende ku facebook, òf kualkier otro aktividat ku no tin di abier ku adorashon. Teniendo kuenta ku loke sa pasa na misa, ta bon pa nos permití Jesus dal un limpiesa, “ruim op de boel,” den nos tèmpel pa asina Dios por wòrdu adora manera debe ser. Tur hende mester keda ketu ora Dios ta presente. Adamas, Beibel ta bisa ku Dios su number ta yalurs pasobra t’asina E ta tambe. E no ta gusta kompetishon (Eks. 20:5; 34:14, Deut. 4:24; 5:9; 6:16, Jos. 24:19). Den adorashon, tur mente mester ta dirigí riba djE so; E no kier ni por kompartí senario ku otro. Tur kos mester ta p’E i p’E So! Esnan ku no ke asepta esei no por ador’E! (Echonan 17:23-28). E no ta asepta tampoko pa hende sirbi’E pareu ku otro dios, (Mt. 6:24), ta sea E haña tur atenshon, tur adorashon, tur Gloria, òf E no haña nada; E no kier mitar adorashon, peor ahinda, e wiri wiri ku a sobra. Simper El a eksigí e prome fruta di hende su devoshon I produkshon, no loke ku a sobra ni e kosnan rechasá! Komo kreador, El krea tur kos pa E haña tur onor i tur Gloria (Rev. 4:11). David a bisa: “Laga tur kos ku tin rose alabá Señor” (Sal. 150:6), esaki ta inkluí tur ser humano (Rom 1:18-32). Tambe, E apostel Pablo a bisa, “boso no por bebe e kopa di Señor I e kopa di Demoñonan; Boso No por tuma parti na e mesa di Señor I nae mesa di Demoñonan…” (1Kor. 10:21,22). Pa duna Dios e balor ku E merese, hende mester laga Su reino i boluntat bira nan priordat number un. Jesus a bisa su disipelnan: “Ma buska prome e reino di Dios I Su hustisia…” (Mat. 6:33). Bruahamento di kosnan mundano den e tèmpel santu di Dios ta un falta di respet p’E i un robo di Su adorashon ( 1Pedro 2:5, Mal. 3:7-10). E ta repudia adorashonnan bruahá pasobra E ta meresé mihó (Mateo 15:9, Liv. 10:1-4). Awe, e tèmpel di Dios ta nos mes kurpa. Jesus a spliká ku e ora ta bini ku Jerusalem lo no ta e luga di adorashon mas (Juan 4:20-22). Adorashon na Jerusalem tabata basa riba e prinsipionan di e aliansa Bieu. Awor, adorashon ta basa riba e Testament Nobo, den un tèmpel nobo, un tèmpel spiritual no material (Heb. 8:6, 2Kor. 6:16, 1Pedro 2:5). E ta eksigí sakrifisionan bibu, spiritual, aseptabel (Hebreonan 11:4). Tende kiko e skrituranan aki ta siña: (Rom. 12:1, 1Cor. 6:19-20,). Mester hasi tur esfueso pa mantene e tèmpel na ordu tur ora bai, mester evita ku Cristo ta top’e desordená. No adora Dios den un tèmpel bruha (1Kor. 14:33, 2Kor. 11:3). Finalmente, Jesus su akshon a hala basta atenshon den e tèmpel. Su disipelnan a tuma nota kon E tabata duna nifikashon n’e kontenido di skritura. Pa nan esaki tabata konfirmashon adishonal ku e ta E mesias berdadero. Den Mate 16:16, e apòstel Pedro a deklará ku Jesus ta e Cristo…” Ora ku Jesus tabata limpia e Tèmpel na Jerusalem, E disipelnan a kòrda esaki:, “E zelo pa bo kas lo kaba ku Mi” (Ps. 69:9). Entre otro, e ekspreshon aki ta nifika ku Jesus lo a pone debido atenshon, deseo ferviente, pa e adorashon di Dios ( Sal. 119:139). E insidente den e tèmpel a ilustrá kon leu Jesus tabata despuesto pa bai pa asina defende e asunto di su tata. Sinembargo, E otro hendenan a pidi’E un señal, of un milager grandi, pa demonstrá Su outoridat i divinidat. Jesus no a pèrde tempo, El a bisa-nan ku lo e basha e tèmpel aki abou anto lant’é despues di tres dia. Esaki a trese mas konfushon na e pueblo pasobra nan a saka su palabra foi konteksto. Konsekuentemente, hopi a konkluí ku Jesus kier a destrui e edifisio di e temple, literalmente. Nan a sintí nan mes ofendí ku esaki. Durante Jesus su aresto i kondeno, algun hende a trese e puntu aki dilanti komo akusashon kontradi djE: “El a primiti di destrui e tèmpel.” Obviamente, mente di e hendenan tabata blokia pa falta di fe. Tur kaminda ku tabata hiba na e realidat ku Jesus ta e Mesias nan a pasa esakinan forbei. Manera un hende na soño, nan no por a kompronde loke ku nan tabata mirando. Tende kiko Jesus mes a bisa: (Juan 12:37-40). Siguramente, Diabel tabata e E forsa prinsipal tras di esaki. El a siege nan mente pasobra e no ke pa nan wòrdu salbá (Lukas. 8:11, 2Kor. 4:4). Kòrda, Satanas ta un berdadero adversario, e no ta desea bon pa ningun hende (1Pedro 5:8). Pa Dios nada ta imposibel. Si Jesus mester a lantá e edifisio di e tèmpel den tres dia, Dios lo a provee e rekursonan nesesario pa realisá esaki. Sinembargo, Jesus no tabata papia di e destrushon di e edifisio di e tèmpel; E tabata papia di e tèmpel di Su kurpa, pa ta mas eksakto su morto. Naturalmente, esaki ta ilustra kon fasil hende por interpretá palabranan di skritura inkokorektemente (2Pedro 3:15). Nan por trose e bèrdat I yega na konlushonnan, persepshonnan, ideanan, doktrinanan, falsu. P’esei, mester hasi tur esfuerso pa skrudiña e Beibel pa asina parti e bèrdat na un manera korekto (2Tim. 2:15, Echonan 17:11). No ta prome bia Jesus ta usa su morto komo prueba di Su divinidat. Den Mateo 12, el usa e kaso di Jonas komo simbulo di di Su morto i resurekshon. El a mustra ku meskos ku Jonas tabata tres dia i tres anochi den barika di e piska, asina tambe e yu di hende lo ta tres dia i tres anochi den e tera; esta, dera den dje (Mat. 12:40). Di e manera aki, El a presentá e Señal (Morto I resurekshon) di mas grandi komo prueba di su divinidat. Kune, tur diskushon a stop, tur inkredulidat a wòrdu reprend’e i refutá. Awe, no tin awa pa laba, Jesus di bèrdat ta e yu di Dios!” Awó, hende por laga di asept’e, tòg nan no por deskreditá e pruebanan. Te ahinda, e graf ta para bashi komo muestra ku Jesus ta bibu, probando ku “E ta Yu di Dios, e Cristo.” Tende ki e apostel Pablo a konta den Romanonan 1:4: Den pasado, Hopi hende famoso a yega di biba i muri riba e mundu aki. Te ahinda nan graf ta sera komo prueba di nan fayesimiento. Sinembargo, Jesus no tabatin un graf di su mes, su hendenan a der’E den un graf fia, den graf di Josef di Arimathea. Jesus a fi’e pa tres dia so! Kos fia mester wòrdu trese bek! Segun profesianan bibliko, Jesus a lantá net tres dia despues di su morto, pasobra morto no por a tene den graf (Echonan 2:26-29). Enemigunan a rabia pasobra nan selebrashon riba su morto a para na mitar kaminda. Frustrá i desapuntá, nan a akusá su disipelnan di a hortá e kurpa di Jesus i a skond’e. Pero tur esaki tabata akusashonnan fofo, otro intento frakasá pa a nenga e gran echo ku Jesus ta e Mesia, Yu di e Dios bibu. El a vense morto pasobra E tabatin un mishon pa kumpli kune, e mishon di duna bida eterno na tur esnan ku kere den djE (Juan 3:16). Pues, drumi den graf E no por a logra esaki! Awó, Jesus ta e primoginito di e mortonan, e prome persona ku a lanta for di morto i keda na bida te dia djawe; E no ta muri nunka mas (Kol. 1:17, Rev. 1:5). Konsekuentemente, El demonstrá poder absoluto, poder divino, poder ehekutivo dor di su Resurekshon (Mateo 28:18). Esaki ta e poder ku ta salbá esanan ku kere (Rom 1:16,17, 1Kor. 15:1-4). Dor di e Resurekshon, El a probá no solamente ku e ta Yu di Dios, E mesias, salbador di mundu, pero tambe ku E ta kapas pa yuda tur esnan ku konfia den dje. T’esei ta e señal grandi pa mundu (Rev. 12:11, Rom 8:37, Hebreonan 5:8,9). Abo a risibi Jesus Kaba? Alfordd Lazar
Posted on: Sat, 23 Nov 2013 18:48:29 +0000
Trending Topics
Recently Viewed Topics
© 2015