TALA FOU MO TE TOKELAU PROGRAMME IN AUSTRALIA TALA O TE TAU Ko te tulaga o te tatou tau e he mau tonu mai te tala o te tau eiei te taimi e kikini mai ai te havili ma uaga kae e iku lava ki te malu manaia. 1. Ko te taeao o te aho Lua 18 Iuni ve na ma te aho Lulu 19 Iuni na fai ai na inati a te nuku ko na alofa ienei ma i ulugaliki foou Alisa ma Tiaina. 2. E fakaauau pea na galuega mahani a te malohi o te Nuku ki te fakamamaaga o te malae o Hemoana ve na, i he fakamoemoega ke tapena fakalelei ma fakatu ni fale kie ki na koga e api ai na motu Atafu, Fakaofo ma Nukunonu i te taimi e fai ai na takaloga, kua he gata i tena kae vena ai foki ko te tologa o te fatu i loto o te malae ki na autafa, ma te velega o te vao. Ko te tahi malohi o te nuku e olo lava ki a latou galuega mahani vena ai ma te fakaauauga o te galuega o te Falemai. 3. E tuha kua iei foki he tahi alofa o na tamana Taupulega kua tuku ki te Kautafafao he tahi afa aho kia latou koleniga kilikiti, ko te aho Lulu ma te aho Valaile e afa aho ai na galuega a te nuku kae olo uma ki te malae oi hapoti na koleni kilikiti a te Kautafafao. Kua kamata foki na koleniga ping pong ate Kautafafao e 3 ia aho o te vaiaho e fakataunuku ai na koleniga ienei ko te po o te aho Lua, Tofi ma te aoauli o te aho Ha. 4. E tuha e lua ia aho o te vaiaho aho po aho Tonai ma te aho Ha kua fakaavanoa ki te kaiga Tupulaga ke tapenapena ai ki te latou finauga (debate) ko te fakamoemoega o tenei fakatahiga a Tupulaga a Tokelau ke fakataunuku i te taimi o na takaloga a te Kautafafao a Tokelau. E tuha e 4 ia matakupu taua kua tapena kiei te faufautua o te Tupulaga a Tokelau te matua kia Lise Suveinakama, 1. pe tatau te pia ona fakaha ke toe kaumai ki Tokelau? 2. Pe tatau ona taofi te hikaleti nahe toe kaumaia ki Tokelau?. 3. Ko te faitama tamaiti kua matea ko he fakafitauli i luga o Tokelau i te vaitaimi nei. Ko hea nei te tatau ke fai ke fofo ai tenei fakafitauli?. ma ko te toe matakupu. Ola fakaaloalo ma ola fakatahi, aua e fanau mai ai te olaga fiafia o Tupulaga o Tokelau. Vaega muamua : Ko hea te taua ina nofonofoga Faka-te-kaiga i Tokelau. Vaega lua : Pe taua ke fakaolaola ma taupau pea te aganuku a Tokelau i te olaga faka-te -kaiga? Vaega tolu : Tefea te auala ka kui ai ki taua Tupulaga o Tokelau? Kona vaega uma ienei e fakamoemoe ka fakatalanoa i te fakatahiga muamua tenei a Tupulaga talavaou o Tokelau i te mahina fou Iulai. Ka tapena mai lava te Tupulaga o te nuku ma tana kau e olo i te finauga (debate) tenei. TALA MAI TE AKOGA MA TE USP I MATITI 5. Ko te vaiaho ka tulaki mai nei aho 24-29 Iuni ka alo atu ai ia fanau akoga a Matiti Tauhaga 7-11 kia latou hukega o te lototonuga o te tauhaga. 6. Ko te taimi tenei e koi taukikila nei te akoga a Matiti ki he latou faiakoga o te Igilihi. 7. Kua alo atu nei te akoga a te USP ki te latou tukuaga e tuha e 4 vaiaho te mataloa, e tuha e toka 5 te aofaki o fanau akoga ka fakaopoopo ki te akoga a te USP kafai e toe ake ia akoga. TALA MAI TE FALEMAI 8. E kitea lava te ola manuia o tagata i te vaitaimi nei, ihe lipoti mai te falemaki ko te aho Falaile ona vaiaho takitahi e fai ai na hiakiga o te Huka vena ma te toto maualuga , e kitea lava te tulaga manuia o na tauale ienei i te kalafa o te taimi nei e heai he tino e fakapopolegia ia tauale ienei. 9. Kua teka malie atu foki te famai tenei ko te fulu nae peehi i te akoga e heai foki he fakapopolegia ki te itu tenei, kae e fautuagia lava te fakaeteete o fanau ina tauale pepehi venei. TALA MAI TE FATUPAEPAE 10. E koi fakaauau pea na galuega a matua ki te taufakaumaga o te togiga a te Kautafafao i he fakamoemoega ko te vaiaho tenei ke fakauma ai na galuega ienei, kae toe kikila atu ki he tahi polokalame i te vaiaho fou. TALA MAI TE HIKOMAGA 11. Ko te matua tenei kia Asi Pasilio ko ia tenei kua Manager nei i te ofiha o te Tama o Kaiga, e tuha kua 2 mahina nei talu te kamata o ana tautuaga ienei. Kua toe taliu mai ma te manuia te latou malaga na fakatahi atu ki Apia mo te akoakoga o te lolo popo i he fakamoemoega ki te Taupulega keina fakataunuku loa te polokalame tenei ki te fakatau atuga ki fafo te lolo popo mai Tokelau. OFIHA O LEOLEO MA TE OFIHA O TULAFONO 12. E tuha e 4 mahina e fakataunuku ai he koohi mo na galuega tautua ana leoleo i luga i Hamoa, na kamata i te fakamuliga o te mahina ko Me ki a Oketopa. ko ki latou ienei na fkaatahi atu ki te koohi tenei, ko te Hatini Sefo Leo, leoleo fafine Suliana Pehamino fakatahi ai ma te leoleo tamaloa ko Patrick Tegei Lui. Ma ko te taimi tenei e taukikila ai e te hui hatini Aleki Manuele te ofiha o Leoleo i luga o Nukunonu fakatahi ai ma na tamana leoleo kia Kueva Sakaria ma Viliamu Ioapo. LITIA MAIAVA mo na tala fou.
Posted on: Sun, 23 Jun 2013 20:13:49 +0000
Trending Topics
Recently Viewed Topics
© 2015