TERRITORIAL ACSAL HQRS: AIZAWL, MIZORAM, INDIA PRESS RELEASE Dated Aizawl, the 31st October, 2014 Lei sipai leh Sumdawng Company anga inrelbawl a, khawvel pum huapa NGO hriat hlawh tak ‘The Salvation Army’ (SA) kalphung tha lo siamthat duhtute leh siamthat duh lotute inkara inhriatthiam lohna kal zel avangin ‘The Salvation Army’(SA) chu phelin, Kohhran anga a inrelbawl tur ‘The Salvation Church (Chhandamna Kohhran)’ chu a lo piang ta a. He Kohhran thar hi ni 2.10.2014 khan a puanchhuahna leh Pathian hnena hlanna (launching & dedication) pawh neih a ni. He Kohhran thar a lo pian ruala The Salvation Army (SA) Territorial Headquarters in Press Release dt, 06.10.2014 tichhuakin, a fa hrin ngei chu thu belhchian lo tak tak hmangin a rawn bei ta chiam mai a. Adivisory Council of Salvation Army Laymen (ACSAL) lam chuan Headquarters thuchhuah reng reng hi chhanlet tul kan tih loh laiin dawt leh thudik hrula mipui kaihruai sual thei hmanga Vantlang hriata min beih tak avangin Press Release hi kan han tichhuak ve ta a ni. Tawngtaina nena ngun taka min chhiarchhuah sak turin mitinte kan ngen a che u. Part-I : SA Hqrs., Press Release chhanna(Rejoinder) “Salvation Army atanga chhuakten Kohhran thar ‘Salvation Church’ an din a” : The Salvation Army, India Eastern Territory chu kum 2001-2002 sum endiktu International Auditor ten sum leh paia chhiatrupna (Bankruptcy) tawlh pa-nalah a tawlhthlu mek a ni tih an hmuhchhuah avanga Task Force te dina, kum 2003 atanga Adivisory Council of Salvation Army Laymen(ACSAL) ten Sipai Pawl hi sum leh paia tlakchhiatna nasa tak atanga chhanchhuaha, lei sipai rorelna anga mimal thuneihna nasa lutuk titawp a, NGO/Company mai ni lo a, Kohhran thangduang leh Kohhran ngialnghet, Chanchintha nasa zawka hril thei, Mipui tam berte rorelna Kohhran, mipuite rin ngam sum leh pai inrelbawlna tha leh langtlang nei Kohhran nihtir tumin nasa takin hma kan la a. Hqrs-a kan thawhlawm tipungin Sumpui chhunkhawm (Centralisation of Fund), Bial siksawi (Reorganisation of Divisions) te kalpuiin chutih rualin Mipui rorelna, thurawn petu mai ni lo, policy siama, thutlukna tawp siam thei Territorial Council leh Division Council-te neih a, Territory roreltu sang ber Territorial Finance Council(TFC)-a laymen te tel thlengin SA hotute nen Joint Resolution-te mumal tak siamin hma kan la ho a a ni. Mahse, SA hotuten thutawp siam thei Mipui rorelna Council leh Territorial Finance Council chu an ti hlawhtlin duh tak tlat loh avangin ACSAL chuan Joint Resolution ti hlawhtlin a nih theih nan kawng hrang hrangin hma kan la ta a, kan hmalakna leh thahnemngaihna chuan mipui support a hlawh hle a, mahse sum leh thuneihna a tuihalten nasa taka min dodala, kalphung (system) siamtha tura beitute chu puithiamte(officer-te) dodala anga min puhin thudik lo leh thu belhchian dawl lo tak tak hmangin min beihlet ta a. Officer leh an chhungkhat laina hnai, nihna leh chanvo duh avanga hotute tlawn chi hote nena phiarrukna leh “thendarh la awpbet rawh” tih policy kalpuiin SA hmangaih avanga siamthat duhtu, thudik tan ngam Upa thahnem takte nihna hlihsak an niin member tam tak hnawhchhuah an ni ta a ni. An mahni din ngei Biak inah chuan Pathian chibai buk phalsak an ni ta lo a, inkhawmna hmun pawh nei lovin an vakvai ta a ni. Mi inah te inkhawmin Pathian maicham an buatsaih ta a. Mahse, chutia Pawl hming pawh nei lo, dan leh hrai pakhatmah nei bawk si lova awm ngawt mai chu, thil harsa tak mai a lo ni chho ta a ni. Remna beiseiin hun rei tak an nghak a, mahse beisei tur a awm lo tih a chian hnu-ah an tawngtaina chhan a awmin Lalpan Kohhran a buatsaih sak ta mai zawk a ni. Salvation Church hi Sipai Pawl atanga chhuak ni loin Sipai Pawlin a ban leh a hnawhchhuah kal khawmte bul tan Kohhran a ni. “Court thuchhuak avangin Salvation Army hming leh a chhinchhiahna hman chhunzawm loh an rel ta zawk a ni” : SA dan kalh a kan Upa nihnate SA hotuten min hlihsak avanga Court-a kan zualko avanga nasa taka min chirhthehtute khan October ni 2,2014-a Kohhran thar hlanna leh puanchhuahna kan neih dawn meuh chuan khawvel rorelna Court an tih thinah khan kan hmalakna ti tawp turin an zualko ve ta tlat mai a. He an hmalakna hian min support-tu mi thenkhatte kan ven thawn avanga Kohhran thar hming a ‘Army’ thumal kan la telh te chu rawn ngaimawhin SA chhinchhiahna reng reng hmang thei lo tura Court chu order siam turin an ngen a ni. Laymen hruaituten kan duhthusam chu SA hotute kaltlangin mipui hriatthiam tir a lo ni ta hi kan lawm em em a, khawmpui lian kan neih hmasak berah paih turin chhawpchhuah ni se, kan lo tih mek chu October ni 2,2014 vek hian mipuiin lungrual takin banphar meuhin ‘Army’ thumal chu paihin “The Salvation Church (a lam tawiin ‘SAC’, Mizo tawngin ‘Chhandamna Kohhran’)” tiin Kohhran hming kan vuah ta a ni zawk. Tin, Salvation Army chhinchhiahna (symbol) reng reng hi hman kan tum lo sa hrim hrim bawk a ni. “ACSAL te hian Territory rorelna sang ber luah ve duhna te an lo nei ta hial a” : Patling rualin nitla van vuain ro kan rel a, an thurelte chu eng ang pawhin tha se, thurawn/rawtna a ni vek mai a. Territory SA hruaitute an inthlak rual rualin policy a inthlak vek zel mai a. SA hian Synod Executive Committee (SEC) ang tluka thunei Territorial Finance Council (TFC) a nei a, Territorial leader-te nena Joint Resolution siam thlapa TFC-a ACSAL ruat laymen 2 telna tur hi remti kan ni a, an thutiama an din tak loh avangin chhuanlam an zawng kual ta a ni. International Secretary retired Comr. Lalkiamlova ngei pawhin ‘laymen an tel theih lohna tur dan lamah a awm ka hre lo’ tiin TACSAL hruaitute a lo hrilh tawh nghe nghe a ni. Mahse, invitees angin kum 2011 khan min han telh ve a, meeting vawi khat bak min ko zui duh ta lo a ni. Tun hnu kan boruak a chhiat vek hnua mipui rilru lak pen nana an duh duha an tih theih tute emaw an ruat dan hi laymen leh laymente rorelna hnuaichhiahna lian tak a ni.. Tuna ACSAL hruaitute hian heng dinhmun laymen-te luah ve theih nana kan hmalaknaah hian keimahni mimal tan kan ti lo, chhuan lo la awm zel tura SA chhunga laymen-te hmakhua kan ngaih vang a ni. Kan mimal dinhmun ringawt thlir ni ila, laymen te thlen san theih ber thlenga chanvo nei tawh vek kan ni zawk. SA hotute intiam ang ngei khan Sipai Pawl hmasawnna tura kan thil phutte kha a hunlaiin tihhlawhtlin ni se, tuna ACSAL hruaitute hian laymen-te tana nihna/chanvo kan nawrte kha luah zui tum pakhat mah kan awm lo zawk hial ang. “TC/THQ hruaitute dawr tawh loh ni se…”: Dt. 31st August, 2011-a ACSAL Territorial Council Special Conference-a kan Resolution No. 3 a -“…ACSAL Leader-te hi anmahni dawr turin kal tawh lo se” tih awmzia chu PCI Synod rorel khawl ang emaw BCM General Assembly anga Council System thar, thurawn petu mai ni lo, thutlukna siam thei nei tura kan beihnaah hian kan beidawn tawh em avangin tun dinhmunah chuan hemi chungchangah hian, kan hotute hi dawr rih tawh loh ni se, kan tihna mai a ni. Hei hian thildangah chuan thurawn pein (advice, counsel, information and service) kan tanpui lo ang tihna lam a kawk lo a, he thu hi Territorial Commander pawh 7th September, 2011 khan ziakin kan hrilhfiah thlap a ni.Tin, he Resolution-ah hian issue dang tar lan a ni lo a, kan beisei ang ni lo Territorial Council leh Divisional Council, thurawn petu tho inbarhluih tumna leh a ruk a rala a member turte September ni 1, 2011 zing dar 5:45 Am-a Aizawl Temple-a hlan tumna awm hi thil kalphung lo tawp a ni a, hei hian SA hotuten puan hnuai nei chunga an thil tih thin dan chu a pholang ta a ni. “ACSAL chu 01st September,2011 khan tih tawp a ni ta,, tih leh General pawmpui ngei a ACSAL tih tawp a ni chungin..” : Thurawn petu (ACSAL) hi Constitution nei a, International Hqrs (IHQ) pawmpui thlapa kum 1994 atanga kan neih a ni a. A din tirh atangin ACSAL hi thuneihna pumhmawm duhtu Officer thenkhat chuan an tan hling angah an ngai a. Remchang an hmuh ve leh a dan leh dun pawh thlir lo leh vaukhanna emaw insawifiahna hun pawh min pe miah loin a titawp theitu pawh ni lo Territorial Executive Officer kal khawmin September ni 1,2011 khan min tihtawp sak ta a ni. Thiamchan nan Council thar dang (Advisory tho kan pawm theih loh) chu kan nei tawh a tiin General chu zu misguide in an thutlukna chu an zu pawmtir ta a ni ber. Hei vang hian ACSAL hi SA siam that duhtute chuan kan kalpui ta zel a ni. Mipuia kan thu thehdarh emaw, London emaw Govt. of India hnena kan thu thlen reng reng hi belhchian dawl leh thudik tawk lo pakhat mah a awm lo tih hi Mizo mipuite kan hriattir duh a, hetianga a tidik lo zawktuin an hmaiphih fai nana min chirhtheh zui zel an tum dawn a nih chuan kan duh bak thleng thleng pawh kan la sawi lo ang tih a sawi theih loh a, chutianga kan tih chuan Puithiam hna pawh an chelh hleihtheih lohna tur an mimal chanchin pawh kan tarlan ngei a ngai tawh ang. “Silaimu/Pathian ram, THQ-a Corps / society-te chhunluh thin 60% chu titawp turin theih tawp an chhuah ta a…” : Pathian Ram thawhlawm/Silaimu hi S.A-Dan ang chuan Corps-in sawma pakhat (10%) Hqrs-ah a chhung lut thin tur a ni tih a ni mai a. Hqrs. hotuten Council nghet (hna thawk thei) din leh Territorial Finance Council-a laymen 2 tel ve an remtih avanga 60% chhun luh hi sipaiten remti chauh kan ni a. Hqrs., hotute hian an tihtur an intiamna pahnih hi ti ve duh leh si lovin sipaite hi sawma paruk (6/10), a hnu-ah sawma panga (5/10), min pek luihtir tumin min nawr lui tho si a, hei hi kan harsatna bul chu a ni zawk. Tichuan, SA Dan anga sawma pakhat chhunluh kan tum chuan an dawng duh lo a, an dawn duh loh miau chuan Tualchhunga kawl mai chu tih makmawh a ni. SA hotuten an intiamna an tihhlawhtlin loh avanga sawma panga (5/10) pe duh lo Corps-a Upate chu an ban a, an mahni thlavang hauhtute thlengin an tuartir ta a ni zawk. India ram hi SA IHQ London tan chuan an Ramthim upa ber (oldest Mission Field) a ni a, mipui lam hian thawh miah lo mah se a inrelbawlna atana sum pek hi IHQ London mawhphurhna a ni. Hei vang hian India ram Territory dang ten an member-te an sum lakluh atanga sawma panga emaw sawma paruk emaw an phut loh laiin India Eastern Territory, Hqrs: Aizawl Mizo Territorial Commander nei chuan London tanpuina sum dawng reng chungin an mite atangin an duh zat zat an phutlui tho si a, hei hi laymen te hian tha kan ti lo a ni. A bul berah chuan an sum khawih chet dan kimchang kan hriat hi an hlauh avangin Finance Council-ah te chuan kan tel phal zia zang an lo ni lo a ni. “Puithiamte chauhvin an khawih thin Ceremony an khawih…” : Puithiamte chauhvin an khawih thin Ceremony an khawih tiin an rawn ziak a. SA officer ten Inneihtir, mitthi vui leh nauhlan an tihsak duh loh mi lainatawm tak takte tualchar leh thingbuk hnuaia ceremony tihsaktu Upate kha sawisel ngam tur an ni em le? Thuthlung Thara Krista thisen avanga ringtu zawng zawng puithiam nihna leh Kohhran dangin an Upate inneih leh mitthi vui chungchanga an hman tangkai dante hi SA Officer-te hian an zirchian deuh a tha ang. “Chhandamna Sipaite inkhawm tibuaiin…” : SA Territorial Headquaters Press Release-a inkhawm tihbuai thu lo lang kha, thudik tak chu Public debate awm se a fiah duh viau ang. Dinthar Corps buaina thilah pawh biak in kalh a nih theih nana, an lamtangte fuihpawrha buaina siam dan tur nen lama hrilhtu puithiam lal tak pakhat April ni 14, 2014-a zu kal a, a fuihna tawngkam ngei kha video clipping nen lam a awm a, miten an hre darh tawh a, zep theih a ni ta lo. Chu an duhdan chu October ni 4,2014 zana khan a thleng dik ta a ni mai. Corps hunruat pangngai tibuai tura tlai dar 3:00Pm vel atanga Hqrs lam tang ten programme siama zan Tawngtai inkhawm hun neitu turte thutna lo luah tlat a, an ken duh loh avanga thil thlengah hian Kohhran thar Salvation Church hian engmah tel ve na a nei lo a, Dinthar Corps chhung bila thil thleng a ni. Dinthar Corps Biak Ina thil thleng chungchang a thubelhchian dawllo hmanga Kohhran thar an bei ta chiam mai hian thudik aia dik lo hmanrua atana hman an pawisak loh thinzia a tarlang chiang hle mai. Edenthar Salvation Biak In kalh chungchangah pawh anmahni kutkawih ngeia an sak an biak In nen Salvation Church-ah Corps pum deuh thawin an inlet tawh a, an chhuahsan SA flag, banner leh signboard an hlip chu an tihawm a nih lohna a awm lo. Sawrkar thuneitute bum nana Manipur-a Boys Home-a hoarding nawhreh leh Home lungphun tichhe tura thupek inpekte kha a serious zawk hle lo maw? kan ti a ni. Dinthar leh Edenthar Biak In khar hi SA Hqrs., hotuten nasa taka Sawrkar-a thuneitute an nawr avanga a ni a. Hqrs., lamtang lo lam hian khar lo turin an nawr ngar ngar zawk a ni. SA hotute hi Pathian mite an Biakbuk ngeia Pathian biak chak ngawih ngawih engahmah ngai lova an inkhawm tur tibuaia dang duh an ni a. Hei hi Pathian Engkimtithei chuan min hriatsak a, Magistrate, Police leh khawtlang hruaitute pawhin an hre chiang hle a ni. “Salvation Army atanga chhuakte kan lainat a..” : He thu an sawi ngam hi Pathian chu sawi loh a khaw eng zah loh thlak ngawt mai. An bana, an hnawtchhuak sauh sauh a, ‘an chhuak’ han tih leh daih mai leh ‘kan lainat’ an han ti lek phei hi Pathian rilrem zawng ni hian a rinawm loh a ni. “Salvation Army ni chunga Salvation Church member nih kan remti lo” : SA full member (soldier) ni duh chuang si lo, mahse SA member ni si, adherent member, mi 1,69,144 (as on 1.1.14) khawvel pumhuapa an neih lai a, Territorial Hqrs., pakhatin an member-te Kohhran thara Associate member (aderents tlukpui) nih an phal lo tlat mai hi chu International Army an tih thin kalphung nen hian a inkalh tlat a ni. An Pawl-a Kohhran dang member-te adherent member an nih theih lai a, an member-te Kohhran dang adherent member nih an phal lo tak tak dawn a nih ngat chuan an inbih chian a ngai khawp ang. Part-II : Salvation Army chu enge a nih ? Eng nge kan chhuahsanna chhan? Salvation Army hi Kohhran angin a inrelbawl lova, NGO, Company leh Lei sipai angin a in relbawl a ni. Sawrkar leh mi thilphalte thilpek dawn zel a duh avangin Kohhran hming a pu ngam lo a ni. Sipaia anga thunei taka mitlemte te rorelna NGO/Company chauh emaw a nih kan tih laiin Lok-Adalat hmaah SA Hqrs. Spokesman Major Zothanmawia chuan hmanlai Roman Catholic Church anga inrelbawl ‘Episcopal Church’ kan ni tiin a puang mauh mai. He thu inthup puanzar a nih takah chuan Protestant pawh a lo ni hauh loin hmanlai Roman Catholic anga, Puithiam chauhte rorelna (Episcopal Church/Organisation) a ni tih a chiang ta a, mipui rorelna Kohhran (congregational church) ni tura kan duhna chuan awmzia a nei ta lo a ni; Pathian Thu Thlarau lam rawngbawlna aia pawla thuneihnaa (organizational authority) pathian Pawl, Pathianthu aia Commander-te lalna, Chhinchhiahna, nihna (rank) leh Belsen & Belpawl hmanga an member-te thliarhranna Pawl a ni. SA hi India ramah Indian Companies Act, 1913 section 25 hnuaiah Company anga in registered an ni a, a Memorandum of Association leh Articles of Association-ah chuan mi 30 chiah SA member an ni thei. Board of Directors-ah hian Laymen-te an tel ve thei lo a. SA-a laymen-te telna rorelna reng reng chu thutlukna siam theitu ni lo, advisory body, Commander-te thurawn petu chauh a ni. Tin, SA hi British Parliament in a dan siam, Salvation Army Act, 1980 hmanga enkawl a ni a, he dan Republic of India-a hman luih tlat a ni hi Kumpinu awpbeh hun lai nen khan a la inang thei viau awm e. An thuneihna duh luat tuk avang leh sum leh pai thupui bera an neih avanga an beramte talh a, ban a, diriam a, hnawtchhuak duh Pawl a ni. Berampu an thau tual tual a, Beramte an cher telh telh thung. An hotu lawkte in leh lo a phuisui tual tuala hnuchham in a tlabal tawlh tawlh thung a, hnuchham inte chu sum tuak nan an hmang ta ringawt mai a ni. Chanchin Tha puandarh leh Thlaraubo chhandam No.1 a dah lo Kohhran a inchhal si awmchhun a ni hial awm e. Chhandamna Sipai inti si a Thlaraubo Chhandamna atana sum leh pai hman aia Chhandamna thleng phak lo officer te nawmsakna, tisa rawngbawlna atana hun, sum leh pai, tha leh zung khawhral huau huau lawi si Pawl a ni. Chanhai/Riangvaite tana vehbur leh mahni inphat thawhlawm (Self-Denial) an khawn khawmte Officer hlawh/Retirement Grant atana hmang duh rawngbawltute awmna Pawl a ni. Ring lo mite, Mawngkawhur leh neih in angte rawngbawltu atana pawm a, an hnen atanga sum khawn khawm a, an aiawha Sawrkar tanpuina dawng duh Pawl a ni. General thlanna bakah chuan Democracy awm reng reng lohna Pawl a ni. Zuk leh hmuam insuma kawnga hma la nasa ber ni siin tunhnaia an Upa an ban takte thlak nan a ruihtheih thil, zuk & hmuama insum hauh lo te ruat pawi tih miah lohna Pawl a ni; SA General (Retd) Linda Bond in kum 2013-a a Interview-ah SA chu sakhaw dang Hindu leh Muslim te pawh thawhpui thei pawl a ni, a ti a. A sawitu ngei pawh a hnu mai a a chhan leh vang sawi duh miah loa General atanga a bang ta thut mai khan ngaih a ti tha theilo a ni. Khawvel pum huap pawha thlira lawngpil mek, member tam takin an chhuahsan mek Pawl a ni; Kristian ten tihduhdah an tawrhna hmun leh hunah pawh tuar ve ngai lo, a him china rawng bawl Pawl a ni. Puithiam intite hnen atanga thlarau lam malsawmna dawng lova thupek ringawt mai an miten an dawnna Pawl, Pathian Thusawina hmun SA Pulpit te chu Pathian thu/fakna aia Hotute fakna hmun leh Sipaite hnuaichhiah taka rorel khumnaah a chang zo ta!!! Milim chibai buk bansan a, Pathian chauh chibai buk tawh turin Kohhran thar din kan duh a ni; A full time-a thawktute tan chauhva Pawl din, memberte benefiaciary ang chauh a ngaihna Pawl a ni. Chutih laia a beneficiary-te hnen atanga thawhlawm phut lui tlat si Pawl a ni; Kohhran anga inchhal, Bible a innghat a insawi ve si… Bible-a kan hmuh Ringtute tih tur Baptisma leh Lalpa zanriah hmang ve duh lo leh sawichhe rengtu Pawl a ni. Pathian aia London leh General ngaihsanna Pawl a ni; Inremna, inpumkhatna leh inhmangaihtawnna aia an mite inkara indona puang duh sakhaw puithiam inti te hi keini chuan Krista rawngbawltuah kan ngai thei tawh lo a; an zing ata a hranga awm kan duh a ni; SA inkaihruaina hi kum zabi 19-na tawplam leh 20-na tirlam Victorian Era a Social work thawh nan chuan a tha a ni mai thei, mahse kum zabi 21-na Computer/Digital Age a Chanchintha rawngbawlna kalpuina atan chuan a tha tawh hauh lo thungin kan hria a. Chuvang chuan siamthat a Chanchintha hril No.1 a daha, chanhai, riangvaite tana rawngbawltu Kohhran nung leh awmze nei a nih theih nana buatsaih kan duh a ni, mahse SA hotute chuan an duh si lo; Hmuchhuak William Booth leh Catherine Booth ten rethei, chanhai leh thlaraubo hmangaihna an neih ang kha tunlaia SA Officer ten an nei tawh lo a, anmahni sahmim ham puar nan leh an mimal hamhai nana hun an khawhral tam tawh zawk avangin he pawl hi chhuahsan kan duh a ni; Heng a hnuaia sum leh pai inenkawlna felhlel tak avangte hian SA hi awm zelna tlakah kan ngai lo:- Cheng Nuai 305 lai mai (Rs.Nuai 70 General fund telin) Investment a an dah theih lai a, Territory sum enkawltu Financial Secretary in deficit-in kan kal a ti tlat mai leh Officer hlawh tur kan nei lo an ti hi kan hrethiam thei lo; Sum leh pai nuai tel ti chingpen chunga DC pahnih transfer chauhva hrem an ni te hi mak kan ti a, DC pakhat phei chu DC an nih tir leh mai te hi fel lo kan ti; Budget session mumal nei loin Budget an siam thin a, ‘nangni ho(laymen-te) sawipui kher hi eng guidelines ah mah kan hmu lo’ an ti thin. Hei vang hian kan pass pui loh- budget, kan thawhkhawm nisi hi a ti hlawhtling tura ke pen a harsa thin a ni. Officer kan ni vek dawn lo, officer kan nih loh avanga kan Kohhran hmakhua kan rel ve thei lo hi kan hrethiam lo; Kum 2010-11 Budget-ah IHQ tangin Rs. 81,25,308/- hmuh beisei a nih laiin Sipaite Self Support Fund/Pathian ram thilpek atangin Rs. 2,04,50,000/- beisei a ni thung a. Rs. Nuai 204 thawhtute aia Rs. Nuai 81 rawn petute ngaih pawimawh zawk tlat a ngai reng mai te hi kan hrethiamlo; Kum 2010 khan Financial Secretary ngei pawhin a Budget speech-ah travelling, Misc. expenditure, unforeseen expenditure, non-planned seminar, workshop,etc a tam lutuk, tiin a sawi lang a. Surplus/saving nei thei rual loin nuam an lo tawl tihna a ni ber awm e; Kum 2009-2010 Financial Year tawp hnu Dt. 9.4.2010 a statement siam tlangzarh vek tawh, Dt.28.5.2010 a statement dang siam leh a, an tidanglam vak mai kha a mak kan ti a. A bik takin Hqrs Officers’ allowance Rs. 24,04,507/- lai maia a danglam ta leh a hmasa zawk Statement-a sum hmanralna a tarlan a hnuhnung zawka awm leh ta lo te leh pung hluaite hi a ti mak leh zualtu a ni bawk. Heti mai maia kan sum leh pai hi enkawl a nih chuan a petu lam tan hian pek zel a phurawm thei lo kan ti; Kum 2009-2010 chhung khan TC Car thar lei a ni a, mahse Expenditure Statement-ah a lang lo a, mipui hriat ve loh tur sum leh pai vawnna bu hi a awm niin a lang a. Hetiang inrelbawlnaah hian awm zel a tul tawh lo kan ti ; Kan hriat chinah Territory hmalakna thenkhat CHAN, Anti-Human Trafficking, Capacity Development Project, Mission Support Project, etc, a an sum hmuh Nuai tam takte te hi mipui hmuh phak Budget buah tarlan a ni ngai lo a, hei hian SA sum leh pai enkawlna-a transparency leh accountability a awm lohzia tilangtu leh an member-te ngaih pawimawh lohna tarlangtu a ni. Tin, Overseas fund khawihtu SA hotu lian tak fapain HDFC Bank-a Bank account lem (bogus) thahnem tak a lo neia, man chhuah a, cancel sak a ni te khan kan ngaih a ti tha thei nganglo bawk. Tin, kum 2004 Tsunami tuartute SA in a chhawmdawlnaa Mizo Contractor a awm ni a an sawi leh hetih laia sum leh pai enkawltu ber IET senior officer, tuna India ram pawna dahbo mek nena SA hotu lian tak inzawmna leh thil tihho dan ni a an sawite hi hriatchian chakawm thilmak (mystery) a la ni reng a ni; Budget hawi lam nei lo, Berambo zawng lo lutuk zawnga Budget siam, Pathian programme lang tlem, Field lam aia Departmental cost a sum an dah uar thinte hi hriatthiam a harsa kan ti. Kum 2010-11 Budget-a Field Operational Work atana pawisa dah 33.39% chauha a pun lai a, Departmental Cost a 72.41% lai mai a pungte hi a fel lo kan ti; Heng zawng zawng aia la hriatthiam theih loh chu Budget Council/Session nei lo a, Budget an han finalise ngat mai duh thin kha a ni. Sum hi thawh tawh lo mah ula, kan in enkawl thei’ emaw ‘thilpek rawn pe zel ula, a hmandan tur ruahmanna leh a hmanna hi chu inhriat ve a ngai love’ an tihna tlukah a ngaih theih hial awm e; Officer kan indaihlo an tih an tih lai a, THQ-a la in ek beng tlat mai te, Rank leh ropuina uma Mission field zawk atanga foreign a in tirhchhuah fo te hi a thlaraubo hmangaih loh thlak kan ti. International level a hruaitu lawk ber ber pawh nei mah ila, an member-te rahbeh duh tlat leh hmathlir fel tak nei an nih chuan si loh chuan Lalpa ram leh a mite tan an tangkai lo a ni, kan ti; Hqrs.,-ah Sumpui 60% kan chhungkhawma, Division 4 kan thiat a, inrenchemna kawng kan zawh a, chutih laia Saving neih aia Deficit a kan kal tlat mai kha a ngaihthat thlak lo a ni. A lut a tam rualin a hman lama insumkarna(austerity measure) leh invawnna(Fiscal discipline) an neih hauh si loh avangin harsa taka kan sual chhuah Division siksawi avanga mite rilru kan hliamna te kha kan tuam dam zo ta lo a ni ber mai; Budget a lang lo, sum mal tlat IHQ, London kaltlangin atangin dawn an nei fo niin a lang a. Budget a lang lo, Territory account puia dah luh ni si lo, account hrang hawnga pawisa dah a awm ngei niin kan hria. Surplus/Saving nei lo inti si a, kum 2009 October thla a Rs. Nuai 305 an invest thei tlat leh hemi atana General Fund (Restricted Fund ni lo) atanga Rs.70 lac lai Term Deposit a dah a ni tlat mai te hi a dik lo kan ti a. Hei vang hian Income & Expenditure Statement satliah mai ni lo Bank a sum an khawih chet dan leh Detailed Receipts & payments kan dil a, mahse in hriat ve tur a awm lo tiin vawiin ni thlengin min pe duh ta lo a ni. Core banking hi 100% in hman tangkai ila, Corps te hian DHQ-ah sum(cash) thehlut loin Bank kaltlang vekin THQ-ah direct in chhung se la, ti a kan rawtna te pawh chu an ti hlawhtling duh lo a ni. Thuneihna leh sum leh pai chan ai chuan an mite chan pawh pawisa loin hma an la a, SA chu buai lo thei lo a lo ni ta a ni. Part –III : Kohhran Thar ‘Salvation Church’ Zia Rang Tur Chu Kohhran dintu leh hmuchhuaktu chu Isua Krista a ni a. Chhandamna Kohhran-ah chuan Isua a lal ber ang a, Thlarau Thianghlim kaihhruaiin a kal ang. Chanchin Tha hril No.1-ah dahin, midangte rawngbawlsak leh Kohhran member-te mi puitling ni tura chherchhuah chu a thil tum a ni. He Kohhranah tharah hian Thlarau lam rawngbawlna (Pastoral Ministry ) leh inrelbawlna (administration) hi then hran a ni ang. General leh Commander kan nei tawh lo anga, mipuiin ro an rel anga, Pastor ten administration leh finance khawih loin Thlarau lam rawngbawlna leh puithiam hna chauh an thawk tawh ang. A ruat a ruat Local Officer(Upa) nei tawh loin mipui thlan Upa kan nei tawh ang a. Kohhran tinin Bible-a kan hmuh angin Upa 7 aia tlemlo an nei thei ang. Member 200 chunglamah chuan Upa 7 bakah member 100 zelah pakhat an neih belh thei ang. Pastor ang thoin serh leh sang an khawih thei ang. Inrelbawlna hrang hranga puipate chu mipui thlan vek an ni ang. Full member (Permanent leh Temporary), Junior member leh Associate member an awm ang a. Kohhran dang member ni chung pawhin Associate member a nih theih ang. Kohhran member nihna atangin tumah Chhandamna Kohhran hian a hnawtchhuak ve lo ang. Baptisma (a thlawr/hnim) leh Lalpa zanriah Kohhran thar chuan a hmang ang a, mahse miin a duhthlanna a hman tul a tih loh chuan baptisma chan hi compulsory a ni lo ang. Chanchin Tha hril(evangelism) leh Harhna (revivalism) chu ngaih pawimawh ber a ni ang. Kohhran chu belhchian dawl, lairil leh tak nei tura buatsaih a ni ang. Kohhran chu mipui rorelna, rorelna sang ber thlenga kohhran mal palai tirh theihna, tualchhung pawh chhungtinte aiawh rorel khawl (Assembly) awmna a ni ang. Pathian thu zirna (theological education) dah pawimawh kohhran a ni ang. Kohhran dangte an nihna ang ang zah thiamsakin Ram leh khawtlang tan theih tawp a chhuah thin ang. Part-IV: Ngenna ‘The Salvation Church’ chu ‘Krista lungpui chunga innghat, Thlarau Thianghlim chenna, Hmangaihnain a phuar khawm, Chhandamna Chanchin Tha hril Kohhran’ ni tura buatsaih a nih ang ngeiin Krista lungpui chunga innghat Kohhran thar hi Thlarau lama tuihal apiangte tan hmun awl zau tak a awm a ni tih hriain lo lut zel turin kan sawm che u a, hmangaihna hrui khat vuanin midangte tana malsawmna nih theuh I tum ang u. Diabola chu sakeibaknei rum thin angin a ei theih tur zawngin phi ruai thin mahse, zam hauh loin hmachhawn ila, a buaina siam zawng emaw, a tharum thawh zawng emaw a biakin khar zawng emaw a hma la hauh loh turin SAC (The Salvation Church)/Chhandamna Kohhran memberte chu kan in ngen nawn mawlh mawlh a ni. Isuan, “Biang leh lama bengtu che chu lehlam pawh dawh rawh”, a tih kha i hre reng ang u. Hetih rual hian SA Hrqs. in Support Team siam a, Salvation Church hmalakna tithuanawp zawnga a ke penna hi Lalpa duhdan a ni lo a ni tih hriain Member atana an ruatte pawhin pawm lo ngam a, mahni ringtu puite zinga inthenna leh inhuatna chi tuh tura fehchhuak ve lo turin Kohhran leh Kohhranho hmangaihtu an nihna angin kan ngen a ni. “Thenkhatin tawlailirte an ring a, thenkhatin sakawrte an ring. Keini erawh chuan LALPA kan Pathian hming chu kan lam zawk ang”(Sam 20:7). ______________________________________________________________________________________________________________________________________________________________________________________________ ISSUED BY CORE COMMITTEE OF TERRITORIAL ACSAL HQRS: AIZAWL, MIZORAM, INDIA (Mobile Phone:- Chairman- 9436151579; Secretary -9436150398)
Posted on: Fri, 31 Oct 2014 13:48:38 +0000
Trending Topics
Recently Viewed Topics
© 2015