THIHNA KAWNG/ NUNNA KAWNG Thufingte 14:12 Mi ngaiha kawng dik ni awm taka lang A tawp chu thihna kawng ni si a awm. Thil engkimah hian a tha a awm chuan a chhia a awm ve zela, chutiang bawkin thihna kawng a awm chuan nunna kawng pawh a awm ve ngei ngei thin a ni. Thihna leh nunna chu kan hriat vek tawh angin, he khawvelah hian khualzin mekte kan ni a, vanram lam pana kal mekte kan ni. Chu kan van panna kawngah chuan nunna kawng ni awmtaka lang si atawpa thihna/ boralna(meidil) min thlentu hi alo awm ve reng mai a. Chu nunna kawng ni awmtaka lang thihna kawng chu mihring thluak hian a ngaihtuah thiamin a hre pha hauh si lo va, hrepha ni sela nunna kawng chauh kan zawh vek mai tur. Mahse kan hriat phak miau loh avangin Bible hmangin Pathianin thihna kawng leh nunna kawng chu min lo hrilh fiah ta zawk a ni. He thihna leh nunna a sawi hi thlarau lam atangin thlir dawn teh ang. 1. Kawngdik, nunna kawng chu:: Lal Isuan John 14:6 Keimah hi kawng leh thutak leh nunna ka ni; keimaha kal lo chu tumah Pa hnenah an thleng ngai lo min lo ti a. Lal Isua sawi atanga kan chhui chuan NUNNA kawng chu Krista chauh hi a ni a, Krista kal tlanga Pathian kan dawr chauhvin NUNNA kawng zawhtu kan ni anga, vanram chu kan kal ve thei dawn ta a ni. (a) Krista kal tlanga NUNNA kawng zawh dan? OT lam atanga kan thlir chuan Israel mipuite khan ngaihdamna an lo chan theih nan ran thisen an hmang thin a ( Lev.4), ran thisen kal tlangin Pathian hnen ata ngaihdamna an lo chang thin a ni. Chu ran thisen chuan Israel mipui zawng zawngte nunna a entira (Lev.17:11 Tisa nunna chu thisenah a awm), Rom.6:23 Sual man chu thihna a ni, alo tih angin, ran thisen Pathian hnena an hlan khan An sualman thihna an pe fel tawh tih a entir a ni. Ran thisen rinna in/kal tlang in ngaihdamna NUNNA chu an lo chang ta a ni. Ran thisen ringtu an nih chauhvin nunna kawng an lo zawh ta a ni. Chutiang bawkin keini pawh Krista thisen kaltlangin ngaihdamna chu kan chang ve a (Heb 9:22,11-12 Nimahsela, Krista chu thil tha, lo awm turahte Puithiam Lalbera lo kalin, biak buk, kuta sak loh, (chu chu heng thil siam zinga mi a ni lo tihna a ni,) ropui leh famkim zawk kal tlangin,kan tan chatuana tlanna hmu tawhin kelte leh bawng note thisen vang ni lovin, ama thisen vang zawkin Hmun Thianghlimah chuan vawi khatah a lo lut tlingtla ta nghal a). Israel ten ran Thisen kaltlanga(rinnaa) ngaihdam an nih angin, Kei ni pawh Krista thisen kaltlangin(rinna) in ngaihdamna changtu kan lo ni ve a ni. Krista hlanna chu chatuan atan a nih avangin chatuan ngaihdamna NUNNA CHU KAN LO CHANG THEI TA A NI. Krista ringtu kan nih chauhvin nunna kawng zawhtu kan ni ta zawk a ni. Kristan keimah atang lovin tumah Pa hnen an thleng lo vang alo tih ang khan, Krista ringa kaltute chauh hi kawngdik zawhtute kan ni. 2. Kawngdik lo, thihna kawng chu:: Mite ngaiha kawngdik ang taka lang, a tawpa thihna ni leh si chu hei hi a ni, Krista kal tlang lo va, mahni thiltih that te chhuanga(ringa) vanram Pathian hnena thlen tumna hi a ni (John.14:6,Ephe.2:8-9). Tin Krista tran lohna zirtirna hrim hrim hi a tawpa thihna zirtirna diklo chu a ni (1John 4:3 Thlarau engpawh Isua tan lo chu Pathian laka mi a ni lo ve; chu chu Krista dodaltu thlarau, lo kal tur in hriata kha a ni e; tunah pawh khawvelah a awm tawh reng a ni). Krista zirtirna thu khuma zirtirna kengtu reng rengin Krista chu an nei lo a ti hmak a, mipui kan fimkhur a ngai hle (2John.1:9). Heng mite hian an sawi thiam hle a, hmanlai hun pawh khan Krista rin hi kan vankaina atan a tawk zo lo ve, kan thiltihte a tel ve loh chuan tiin an dan thiltihte chu van kai nan hman an lo tum thin bawka, chungte chuan Krista chu an tran tawh lo va, mahni thiltihna te chu ringin vankai an tum tawh zawk a ni. Chu chu mite ngaiha kawngdik ni awm tak si a, atawpa, thihna, meidil tlakna a ni. Isuan Nangni misualte u ka hre ngai lo va che u ala tih turte an ni. Tunlaiah pawh kan tam hle! Ilo ni ve hial lo maw?? Awle, nunna kawng chu Krista kal tlanga Pathian kan biak chauhvin kan nei thei a, Krista nilo, mahni thiltihte kal tlanga Pathian kan be dawn a nih chuan dam chhung chuan nunna emaw ti mah ila, atawpah thihna/ meidil tlakna ala ni ang. I kawng zawh mek hi infiah nawn leh rawh le. Krista kal tlanga van kai tum nge i nih a, nangmah kal tlanga vankai tum? Lalpan malsawm che rawh se! Amen!
Posted on: Sat, 16 Nov 2013 06:55:37 +0000
Trending Topics
Recently Viewed Topics
© 2015