THIRD VERY SHORT STORY IN THE TYPHOON SERIES BY PETER NERY: TRYING TO FIND MEANING IN THE FACE OF A NATIONAL TRAGEDY Tungod indi magtulo ang iya mga luha sa pagkamatay ni Lola Deling, ginkuha ni Pirot ang lapis sa iya bag kag nagsulat sa mabasa pa nga papel. Ginsaysay niya ang natabu: kon paano sila nga duha nagdalagan sa daan nga balay sang tigulang samtang nagamadlus ang panahon. Daw sa kahinali lang sang tanan. Nagdulum ang kalangitan mga alas tres sang hapon. Dayon, nagbaskog ang hangin, nagpanaguob, nagpangilat, kag nagbundak ang mabaskog nga ulan. Pi-ang si Lola Deling gani indi mahapus ang pagdalagan para sa iya, apang nakalab-ut gid man sila sa balay bag-o nagtupa ang wala-patawad nga ulan. Wala sang pagtahud ang ulan sa bisan kay sin-o man. Ginbalbal sini ang tuktukon nga atup sang balay bag-o gintaban ang atup sang mabaskog nga hangin. Halin sa nag-awas nga suba, nagtaas ang tubi. Madasig nga nagdaguso ang baha tubtub nga nakalab-ut ini sa liug sang mal-am. “Sige na, Pirot. Baya-i na ako diri. Luwasa ang imo kaugalingon,” mandu sa iya sang tigulang. Indi makahangop si Pirot. Nagasimbog ang iya mga luha sa tubi sang baha kag ulan, “Indi ko ikaw pagbayaan, Lola. Ikaw lang ang matuod nga nagpalangga sa akon.” Apang gintikwang sia sang mal-am palayo. Dayon, ginpugutan sang ulo sang nagalupad nga sin halin sa atup sang kaingod nga balay ang tigulang. Nagsulod ang tubi sa baba ni Pirot. Didto sia nasalam-ukan kag namuragmuragan. Nagsinggit sia apang padayon lang nga nagataas ang tubi kag nagasulod sa iya baba. Sadto nga mga tinion, luyag na lang kuntani niya nga malumos sa baha. [251 words]
Posted on: Fri, 15 Nov 2013 23:41:45 +0000
Trending Topics
Recently Viewed Topics
© 2015