TUOLSUNG CHANCHIN Vol.8. Issue No.22 26 Aug- 1 Sept,2013 ** 29th Aug/13 (Ningani) khan HPC(D) Assam Region chun inrawn tlangna inkhawm a ko a, hi hunser pawimaw hmangpui ding hin hnam thuoitu, khawtlang thuoitu, sakhaw thuoitu le sawrkar thawtu thahnem tawk tak fekhawm a nih. HPC(D) Assam region thu khaw chang le sawrkar thlungpui le inbieknahai a bul a’nthawa tuchena hmadawm le hmasawn pei dan chipchier takin Secretary David L. Joute le Chairman Elvis Lungtau hai chun hrilna an nei. Sawrkar thlungpui le inbiekna 1st Tripartite talks 8th Aug/13 New Delhi hmuna an neina thu khaw chang hin fekhawmtuhai a suk phur hle el. Oct.2013 lailung vel hin Gawahati ah 2nd Tripartite Talks hi nei ning a tih. Central le State palaihai le inbiekna nei huna palaia thang hlak dingin fekhawmtuhai chun mi un taktak pali hai an thlang nghal, chuonghai chu : Rev. Dr. Hrilrokhum Thiek, Dr. & Elder Vanlaltluonga Babpui, Rev. Kawlthanglien Infiamte, Mr. Nicholas T. Thiek. Assam rama Hmarhaiin sirbi ding ram le tui nei theina dinga inthuruol le in sawmdawl tawn a tulziehai fekhawmtuhai chun an hril our hle. Ei chengna State ngeiah Hmarram hung pieng ding ruongam le hmathlir insangtak nei theia a hang um el tak hi lawm a um khelah, ei demand fepui mek hi permanent solution ding anih ti theinghil lovin in khuongruol taka beipui thlak hun anih ti hai, Centre in ami ko ta hin chu, ‘Separate Entity’ govt. in ami pekna a ni tlat, chuleiin khawdur khelah khaw-eng hung inlang ding hi thlira lungruol le inkhuongruol taka thang la seng ding le nasataka Pathien kuoma tawngtainaa hre dinga infui tawnnin hi inrawntawnna inkhawm hi khawplo taka khar a nih. Zantieng fekhawmtuhai ruoi inhniktak kiltlangna nei a ni a, chun hi huna hin Agape palai khawm fiela um angin a thang ve. ** Muolhoi ICI KTP chun tulaia Model suok thar pawltak Generator (Honda 4E3KV (Petrol) Rs. 82,000/- man chu kohran rama a tulna naa hmang dingin an inchawk thar. **August 31 (Inrinni) hin Dinthar EFCI Biekin ah Joint Local Churches Committee Muolhoi huoihawtna hnuoiah Setanic pawl nia hriet tleirawl paruk hai ta dingin tawngtaina programme hmang a nih. August thla bul lai khan Muolhoi le a se vela Setanic rawngbawlna nei hlak tleirawl paruk mansuok an nia, Muolhoi, Huonveng le Khongsai Joint VDP chun an chungthu hi Joint Local Churches Committee kutah a pek sawngna le inzawma hi programme hi rawt a nih. ** Tarik 29-8-2013 (Ningani) 11:00 khan Hmar Inpui N. C. Hills & Karbi Anglong Region hnuoia affiliated organisations hai chu PMS High School, Muolhoi ah Joint Meeting an nei. ** Tarik 27/8/13 khan Fiangpui PCI hai chun tulaia naupang sakhuona thua enkawl dan thu One Day Seminar nei a ni a, nu le pa tamtak thangin an hlawtling hle ti thu dawng a nih. ** Tuta kar sung khan Rev. Lalnghaksang AEAL chun Saron EFCI Biekinah rawngbawlna hun a nei. ** Hebron, Umrangso EFCI Biekin thar bawl lai mek chu tukum October thla sung ngei zo fel hman tumin tulai hin nasatakin beipui an tlak a, induthaw takin sin an thaw tlut tlut a nih. Biekin mawitak el an nei vat ei nuompuiin tawngtaina’n lo san ei tiu. ** Tuta kar sung khan Pu Immanuel Darngawn khawmin Discover bike 125cc a thar hlawk an chawk. Pu Lalrokhawm Joute khawmin tuta thla sung khan Vespa a lo inchawk thar nawk tah. Pu Lalremmawi Ralsun khawmin Computer (Desktop) thar lam hlawk el a lo inchawk ve tah. Thilthar neihai Agape Ed. Board chun a lawmpui hle cheu a, in thilthar neihai hi a tangkaina taka hmang seng dingin ditsakna insangtak inhlan sa in ni bawk. ** Zirtawpzan khan Muolhoi-ah ISF le IWF hmalaknain ‘Mobilization programme’ nei a ni a, abiktakin Hmar hnam bik ta dinga hi program hi buotsai a nih. ** Tarik 26-08-13 (Thawtanni) a Muolhoi EFCI K|P in Ramthar rawngbawlna dinga ‘One day Mess’ a buotsai chu mi tlawmngai thenkhat zar chau in a hlawk tam tawk tak hmu a nih. Ruoi kiltuhai popo kuomah lawmthu a hril mawl mawl. Chun, Dinthar EFCI khawmin Thawleni khan Muolhoi Public Ground-ah “One Day Mess” a buotsai a, Zirtawpni khan RPC Kohran khawmin an buotsai bawk a, Lalrama mi tlawmngai tamtakhai zarin a hlawk tamtak an hmu senga hriet a nih. **HSA Haflong Govt. College Unit in Fund Raising na dinga Lucky Gift Coupon a buotsai chu tarik 30-8-13 zantieng dar 4:30 khan C.H.Khawthlang Memorial Hall ah prize draw na an nei a, a hnuoia No. hai hi lawmman dawngtu hai an nih. 1st Prize - 10683, 2nd Prize - 12589, 3rd Prize - 13364 Consolation Prizes - 13436, 14302, 14772, 13943, 13469. **Thawtanni khan Uttarapan Market, Maniktala Civic Centre, Kankurgachi, Kolkata hmun ah CEM Debojeet Thaosen in North Cachar Hills Tribal Regional Handloom Weavers’ Cooperative Society Ltd. chu hawngna a nei. Hi huna hin Ranu Langthasa, EM i/c Handloom & Textiles, DHAC, E.V.Patil, Chief Manager, National Handloom Development Corporation Ltd., Govt. of India le mi pawimaw dang dang hai khawm an thangsa. State dang ah eini N.C.Hills a tlangmi hai hnam puon hai in entirna le zawrdawk na dinga hmang tangkai a ni ngei ei beisei. ** Tuta kar ningazan khan Upa T.K.Thanga, Umrangso-a khawsa chun chatuon ram tieng a mi lo inlawisan tah. A ruong hi zirtawpni khan vuiliem a nih. Ama hi UPC(NEI) Kohran upa a nih. Lusun tuok sungkuohai ei tuorpui hle.
Posted on: Mon, 02 Sep 2013 16:49:19 +0000
Recently Viewed Topics
© 2015