Tamacahut “Yemma Xliğa tukrift”..! Amacahu Rebbi ad tt-yesselhu, ad tiɣzif anect n usaru: Llan zik kra n ṭṭelba bɣan ad ruḥen ad ẓuren “Yemma Xliğa tukrift”, leḥḥun deg ubrid, yenṭeq yiwen yenna-as: “amek nekkni neɣra, nefhem ad nruḥ ad d-nẓur taderwict am tinna, ur neɣri ula d lḥerf di leεmer-is?”. Yenna-as wayeḍ: “la qqaren tesεa sin n yiqelwacen d akniwen, qqaren-as-d acu ara yeḍrun”. Wis kraḍ yenna: “ad as-nini, ad aɣ-tezlu yiwen”, meḥsub s tḥerci ay ruḥen ad ẓuren. Wwḍen ufan-tt ɣer tssirt teẓẓaḍ ur d-terfid allen-is ɣur-sen, yenṭeq yiwen yenna-yas: “nusa-d ɣur-m si lebεid, seg yigawawen ẓẓyara, kemm hata ur d-telhiḍ ara yid-neɣ, la teẓẓadeḍ”. Terra-asen-d: Ttxilwet a ssyadi lεulama Tawim abrid mi tessnem Ğğet Rebbi di ccɣel-is Ad yeg yes-s yesteḥsen Netta d aḥnin d rraḥim Lḥila yexzen, yessen Yenṭeq ṭṭaleb yenna-as: Ayemma Xliğa Tukrift Aqlaɣ nusa-d akk ɣur-m Γas ḥesbaɣ seg warraw-im Akniwen ad teẓluḍ yiwen Terra-asen-d: A Rebbi efk-d ameččim Deg yigenni ad yeg iεlawen Ad tergel tizi n Kwilal I seg ṭṭilin yigawawen Tamussni-nsen d aɣilif Lemḥibba-nsen d asawen Ma tewwim-d azal n sin Σeddit ad tezlum yiwen Tamacahut-iw lwad lwad ! sawleɣ-tt-id i warraw n lejwad ! Uccanen ad ten-yeqdu Ṛebbi ! ma d nekni ad aɣ-yeɛfu Ṛebbi ! ad necc irden n ukufi ! ma d wid n teylewt ur ten-nufi !
Posted on: Thu, 07 Nov 2013 22:42:05 +0000