Tichuan unaute u World Cup chu game 4 chiah a awm ta maw, a va huphurhawm ve, game 60 chu ka thlir ve tawh kha maw, a va uihawm dawn em!!! Tin heti hian kan thluk teh ang, Netherlands hi 1974 leh 1978 khan Total Football khelin an va ropui tak em. Final ah a thlengtu ram te ve ve tumin an vanduai ka ti thin hle. Sap hovin The greatest team that never won the World Cup an ti em kha? Ruud Gullit-a te, Frank Rijkaard-a te, Van Breukelen-a te hun lai khan ka va tan ve thin em....1998 a manager ka ngaihsan em em Guus Hiddinkan a ho khan khami World Cup a anni aia game khel tha leh ropui kha an awmin kan hre lo ve ngawt a. Hun a lo kal zel a 2010 final a Nigel De Jongan ka chuam Xabi Alonso-a awma a tlawh dawt khan ka tan lo tan a. Kumin hian tactical discipline an nei tha ka ti a, Clockwork Orange tia an sawi fo pawh hi inhmeh ka ti mahse ka sawi fo tawh angin hmai phih hul chi hmatawngah an dah a, ka tan der lo mai, tute emawni club a khel a ni bawk nen(Football hi ka ngaina tawk lo emawni???) Germany hi an va ropui em, Semi-Final khel hnem ber, thleng zing ber an ni em kha? An va nep lo tak em!!! Kan naupan laiin naupang te te atanga football khelh an zirtir thin Bangladesh TV(Liverpool FC khel ka hmuh hmasak berna) a ka pan min enpui te kha ka la hre reng. An kalphung hi a va fuh bik tak em. Kan Protestant kulhpui an lo ni bawk nen, (ka Catholic thiante kha ka ngaina reng che u ania) thinlung atanga paihbo hi chu an har viau reng, kan tan em em ngailo a, ka tan lo viau ngai hek lo. Chuti chung chuan kumin hian Champion se ka ti lo. Anni pawh hi an asylum policy hi a tha viau a ni ang e, hmai phih hul chi an rawn hruai ve leh ta nual mai, football an thiam mahse ka tan lehpek hlawm lo(Football hi ka ngaina tawk lo emawni???) Argentina hi 1986 a Diego Maradona a chet vak atang khan ka hmelhriat tan ve. Quarter Final a England nena an innuai dawn a, a hma lawka Falkland Islands inchuha an indo chanchin ka pa ten an sawi kha ka la hre reng. Peter Shilton-a pawhin hand of God kha a hriatchhuah fo tawh bik loh thu a sawi kha maw. Player ropui tak tak an nei reng. 2006 a Jose Pekerman-a, kumina an chak em avanga FIFA in an rinhleh vel Costa Rica beisei aia thlen san puitu in a hrual khan anni aia khel hmuhnawm an awm emawni le? Attacking football quarter final a a thlengtu ram Germany nena an khelh tuma an chawlhsan deuh chiah khan an tlakhniam phah ta niin ka lo hre ve ngawt, penalty shoot-out ah an chak ta lo anih kha. Kumin hian mi inngaitlawm em em a ka hriat Lionel Messi-a ho hian Champion se ka lawmpui ka ring. Football larpui ber mai Brazil hi, tun tum chu an tel ve lo tih tur la awm map lo awmchhun an ni a, boruak an nei reng. Anni hi ka tan chiam ngai lo a, tan map lo erawh ka ni ngai em em lo. An khelhpui te tan zawk tum chu ka ngah mai. Hmanni lawk pawh khan Colombia kha Rene Higuita te, Carlos Valderrama te, Faryd Mondragon-a te leh Andreas Escobar-a te vang pawh niloin, ka tan zawk. Khel ve thei hrih lo Thiago Silva-a leh a ho te, an game hmasaber atang khan ka lo thlir ve dauh dauh a, an game hi a ropui lo ve viau chuan ka hria. Second Round a Chile nena an inkhelh phei kha chuan tihdan tur kha an haihchham chu a ni ber lawm ni? An coach Luis Felipe Scolari-a hi a hmel leh chezia vel hi ka ngainat zawng an ni ve ringawt thung a. Pentecostal lam an luh tam hnu hian an kohhran te a nung em em a, prosperity gospel hi an uar viau bawk a ni awm e. 2002 final tluka ringtu te tana World Cup hmuhnawm leh thlamuanthlak kha a awm dawn emni le ka ti? Kumin pawh hian Kan Pa Vana Mi khian amah chawimawi duhtu te hi chawimawi a tum em ni aw? ka ti deuh. Game tha em em loin heti thleng hi an thleng ta. South America a khelh ani bawk a, anni lam hian kan no ropui chu han chawi rup mai sela ka ti viau. Awle an tan ta tep e, i lo thlir leh phawt mai ang. Zaninah tutenge ropuina ram hnaihin ke pen zel dawn tih kan hriat leh dawn kha; naktuk lam chu suakbak leh deuh mai ang!
Posted on: Tue, 08 Jul 2014 19:36:03 +0000
Trending Topics
Recently Viewed Topics
© 2015