UID HI SAKAWLH NAMBAR A NI EM? By Upa Dr PC Biaksiama 1. UID ah chuan mimal tinin mahni taksaa chhinchhiahna kan neihsa (e.g. khuavang chhinchhiah) lak chhuah a ni a; tichuan, mimal tinin kan neih sa, ding leh veia kutzungṭang 10 nemkai (finger print) leh mitnaute (iris) thlalak a ni. Mitnaute hi kutzia aia ID ṭha zawk mah a ni tih hi kum 20 vel lek kaltaa scientistten an hmuh chhuah a ni a, an hmang ṭangkai sawt hle. Sakawlh chhinchhiahna erawh a dang daih. Grik ṭawngin kharagma (sign or label) an ti a. Eng ang chhinchhiahna ‘kharagma’ nge a rawn put dawn tih hi tuman an hre lo, amah pawh lo la lang lo napui chuan. Eng tika lo chhuak tur nge tih pawh hriat a ni bawk hek lo. Kan hriat chian theih chin chu - sakawlh nambar chu 666 (digit pathum) a ni a; UID erawh chu nambar tam tak, 12-digits lai a ni. UID-ah chuan mitin ID leh nambar a danglam vek ang a, mi pahnih ID inang ta se, siam ṭhat leh a ngai ang. Sakawlh-ah erawh chuan chhinchhiahna chi khat chauh hman tur a ni a, a nambar a inang vek a, a hming pawh a inang vek bawk ang. Company-in an thilsiam chhinchhiahna (label) an chhu kai a, ranvulhtuten ran pangtia a neitu hming an nemkai (tattoo) ang deuh hian. 2. Kan thu hnar ber Thupuan Bu sawi danin, sakawlh lo chhuah tak tak hunah tuma hai rual a ni lo vang. Kum 3 leh a chanve chhungin khawvel pum a hneh ang a; lei mihringten chhuang takin an zui dul dul ang. Khawvel puma lal ber (dictator) nih chu duhtawk lovin, Setana puihnain Pathian angah insiamin, lei mihringten Pathian angin amah leh hmun thianghlim tina a lim an din, ṭawng thei, thaw thei leh mi tihlum thei (Thup. 13:15) chu an bia ang a, chibai an buk dual dual ang. A lamṭang leh a hnungzui an nih chhinchhiah nan, phur em emin an kutah leh an chalah sakawlh chhinchhiahna an pu tawh ang. Intihluihna ang chu ni mahse, pu ve duh tlat lo an awm ang - mahse lu chhum ban chhum huama tih a ngai thung ang. Chutih huna martar tam turzia chu mak tak a ni (Thup. 6:9; 7:14; 20:4); mi thianghlimte a do leh a hneh Pathianin a phalsak dawn si a (Thup. 13:7) 3. Eng nge a nih hre reng chungin, mahni duhthlanna ngeiin sakawlh chhinchhiahna hi an la pu dawn tih a lan chianna chu, Pathianin thinur taka a hrem let leh dawn vang a ni. Sakawlh lo chhuah huna lo ngaisang a, lo zui a, Pathian anga biaa, chibai buk a, a chhinchhiahna an put chuan Pathian nung hnawla Setana lamṭanga insiamna a nih avangin, chutiang titute chunga Pathian thungrulhna chu mei leh kata kang meidila paih luh tur an ni reng a ni (Thup. 14:9; 19:20; 20:12-25). Chutianga hrem chu an phu bawk reng a ni. Chuvangin mi ṭhenkhatin hlauhthawn thil avanga UID te, census a hming inziahtir loh te, ration card thlenga lo inhrek vel hi, Isua Krista an ṭan em vang emaw ni tak tak le? 4. Sakawlh anga puh hi hmasang aṭangin an lo tam tawh a. Antiochus Ephiphanes-a (B.C. 168) te, Nero Kaisara (AD 68) te, Mohammed-a te, Napoleon-a te, Pope te, Hitler-a te, Obama te, tunah UID, etc te a ni a; a dang pawh a lo la kal zel ang, an pawh a ang sawt khawpin a hriat, a tak a lo la lang rih lo mai a ni. RALKHEL DAR: Sakawlh chungchangah hian ralkhel dar a ri zing ta hle a. Tuna UID hian kohhran hrang hranga rawngbawltu tam tak a chhaih buai ve tlat hi a ni. Kan chhinchhiahna tur chu kan innghahna ber Thupuan 13:8 hian Sakawlh chibai buk turte chu leilung pian tirha talh tawh Beramno Nunna Bua hming ziak loh hote an ni ang tih a sawi. Heta ṭang hian mi piangthar, Krista rin mai duhtawk lova, himna dang daptute hnathawh a ang thei zawk. Tuna UID-Sakhawlh buaipuitu tam ber hi chuan piantharna leh Krista Chanchin Țha hril an ngaihsak lo reng reng a, Krista rin vanga chhandamna aia thiltiha chhandamna chi dang - englo dang ringte an ni. SAKAWLH LAKA RINGTUTE HIMNA THURUK: Sakawlh laka ringtute himna thuruk kan neih chu, sakawlh lo chhuah hma lawk hian Mi Thianghlim Lawr a lo awm ang a, Krista chuan a Kohhran mi a mo thianghlim (ringtu piangthar) te chu ama hnenah vanah a hruai chho vek dawn tih thutiam kan nei (Joh. 14:1-3; I Thess. 4:13-17; I Kor. 15:51-54). A nung chunga vana lakchhoh (rapture) thurin hi Paula chuan, “...Keini nunga lo la awm renga te hi, boruakah Lalpa hmuak turin... chhum zingah te khian lak chhohvin kan awm ang,” tiin a puang (I Thess. 1:16); thawklehkhata tihdanglama (van taksa pu a) Lalpan min lak chhoh tur thu hi Paula’n ‘thuruk’ a tih chu a ni (I Kor. 15:52). He thurin hi khawvel puma evangilical kohhran (liberal ni lo) tam zawk leh fundamentalist kohhran tam berten an ṭawmpui. Pawlchhuak-ho tam ber hian an pawm lo thung. An sawi danin, mi thianghlim lawra ringtute lak chhoh vek an nihin sakawlhin tute nge a rawn tihduhdah tur ‘mi thianghlim’ te kha tute nge ni ta ang? an ti a. Hei hian sakawlh rorel chhunga ringthar lo la awm tur an chhut tel loh vang a ni. Lawr bang khawvela sakawlh tihduhdahna hun thim (Tribulation) a mipui tam berin sakawlh chibai buk a, a chhinchhiahna an pu fer fur laia pu ve duh lo, martar huama Isua ringtu ‘mi thianghlimte’ an lo awm theihna chhan ṭha fe fe a awm: Pakhatna, khatih hun lai khan van lam mi thuhretu pahnih, tuma tihnat theih loh khawpa thiltithei kum thum leh a chanve chhung saiip puan sinin thu an hril ang (Thup. 11:3-6). Pahnihna, Israel hnam 12 aṭangin mi chhinchhiah bik 144,000 ten Pathian tan leh Beramno tan rawng an bawl ang (Thup. 7&14). Pathumna, khatih laia van boruakah hian vantirhkoh pathumte chu thlawk kualin, chatuan chanchin tah an hril ang a, Pathian rorel hun a hnaih tawh avanga hlauva, amah chawimawi tur tein an hrilh ang; warning pein, sakawlh leh a lim chibai buk a, an chalah leh an kuta chhinchhiahna neite chu Pathian thinurna uain an in fai kelh ang a, mei leh kata chatuana nghaisaka an awm tur thu an puang reng bawk a (Thup. 14:6-11). Mathaia chuan, “He ram Chanchin Țha hi hnam zawng zawng hriattir turin khawvel zawng zawngah hrilhin a awm ang; chumi zawhah tawpna chu a lo thleng ang,” (Thup. 24:13,14) tih a sawi nghe nghe. Khing pathum zinga pakhat avang chauh pawh khian mi tam takin sakawlh chibaia, a chhinchhiahna put ai chuan, chatuan nunna nei tura engpawh huama Isua ṭan tlat an thlang zawk ang. Mahse chutih huna ringtute chu ‘kohhran’ hming pu thei tawh lovin ‘mi thianghlimte’ tia sawi an ni tawh zawk ang. I DINHMUN ENG NGE NI VE LE? Tichuan, sakawlh rorelna hunthim lo thlen hmaa mi thianghlim lawr (pre-tribulation rapture) in a hmakhalh dawn avangin sakawlh nen kan intawklawi dawn a, engto tur a awm ve lo. Mahse “ringtute pawhin Sakawlh hun thimm kan paltlang vek dawn, chumi zawhah ‘rapture’ a awm chauh ang” titu ‘post-tribulation rapture’ dinhmun hi lo dik zawk mial pawh ni se, keini Krista neitu, Thlarau Thianghlim chenchilh, chatuan nunna neitute hian sakawlh chhinchhiahna la lo turin chhel takin, lu chhum ban chhum huamin, a tawp thlengin Krista tan kan ṭangral raih zawk ang a, kan thih phah a nih pawhin martarte lawmman changin, Lalpan chatuanin min chawimawi ve thung dawn a ni. Tun hma aṭanga rinthua lo ralkhel chiam chiam, engmah ni leh ta mang si lo a tam tawh avang hian, sakawlh leh a chhinchhiahna 666 chungchangah hian fimkhur taka inzirtir a ngai ta hle mai. Mi pakhat chuan, “UID hi thlarau lam milian Lalpa aw hre ho hian tih loh tur, an ti deuh zet a, nangin eng nge i hmuh dan?” ti ang deuhin min zawt a. Thlarau milain hovin engtin nge an hriat bik a, Sakawlh nambar anga an puh theih tak mai tih hi kei chuan ka hre pha ve lo. Tute emaw suangtuahna nena chhuizawm a, chinghne awm hlei lo ‘chinghnia, chianghnia’ tiin, dawt nge thutak tih hre chiang lovin mite ralkhel turin au aw ka chhuah ve ngam bawk hek lo. Theih ang tawka Bible hrilhlawkna leh tun hmaa miten sakawlh anga an puh tam tak ka lo zir ve aṭang erawh chuan, he UID hi inralkhelna chikhat zawng a nih ve hi, a aitechhinna pawh ni fahmiang, tiin ka sawi ngam chauh a ni. Thupuan Buin a chhut thiamin chhut tura a tih ni si, a chhut thiam lovin an chhut hian mi an tichiai ṭhin a. Engtikah nge sakawlh a lo chhuah dawn tih tuman kan hre si lo va. Engtikah nge khawngaihna hun hi a tawp ang a, engtikah nge sakawlh lo chhuak rih lo tura, tuna ‘Khaptu leh Daltu’ (2 Thess. 2:6-8) hi lakkian a nih ang? tih pawh Pa chauh lo chuan tuman an hre lo. Sakawlh engto luat avanga Krista Chhandamna Chanchin Țha pawh engmah lo anga ngai hialtuten sakawlh laka himna awmchhun, Krista chhandamna chan loh i hlau zawk ang u. Chuvangin ‘Thil engpawh lo thleng se ka him a ni’ ti thei turin ringtuten Krista Lungpui nghet hi belin, i thlamuanpui zawk ang u.
Posted on: Tue, 23 Dec 2014 06:14:33 +0000
Trending Topics
Recently Viewed Topics
© 2015