US Nurse Pin Ah A Dang Pakhat Ah Ebola A Kai ==================================== DALLAS, USA — Texas Health Presbyterian Hospital i Ebola miza thloptu a dang pakhat zong, a hrik a kai tiah Texas Department of State Health Services nih October 15 ah a thanh. A thi cangmi Thomas Eric Duncan thloptu health worker a si, a min le aho a si chim an siang rih lo. U.S. Centers for Disease Control and Prevention nih a chek rih lai i, a fehter lai, Reuters nih a tial. October 14 ah Ebola an chek hnu ah a hrik an hmuh. Ngannaklei nawlngeitu nih cu health worker cu midang he tak tawnghnak, asiloah, tak kan i tawng rua timi kong bia an hal colh i, tak ai tawng timi minung cu cawnghhramh an si lai tiah Texas Department nih cathluan in a ti. Texas Health Presbyterian Hospital, Dallas ah a pa hnihnak health worker, Ebola hrik an hmuhmi cu, a dang in chiah colh a si. Texas Nurse Kha Ebola Kong A Hngalmi A Si Ko Mizaw thlopnak in Ebola hrik a kaimi Nina Pham, kum 26 kha Ebola zawtnak tih a nunning kong a hngalfiangmi a si, September 29 ah Ebola thuam ai hruknak cakil (record) a um lo, AP nih a tial. Vietnam ramkhel ralzam pa fanu Pham hi Texas Christian University, Fort Worth khua ah microbiology le zawtnak hrik khamnak kong a cawngmi a si. Ebola kong dikthlir a cawngmi le kum 1994 i manh bikmi cauk The Hot Zone - Ebola ai semnak kong a relmi a si tiah a sianginn kai hawi nih a ti. Kum 2010 ah degree a la; Ebola nih United States a phanh hlan ah mizaw zual thlopnak kong training a kai fawn. Texas Health Presbyterian Hospital, Dallas khua ah luhlinh in nurse a tuanmi a si. Ebola mizaw Thomas Eric Duncan a thlop thawng Pham nu nih a theih tik ah a thin a phang. Pham nih, Nu, a si lo. Ka kong ah na thinphang hlah, a ti tiah chungkhar naihniam hawikom Christina Tran nih The Associated Press ah a chim. Relchap: globalchinnews.org/world/america-a-europe/nina.html Nina Pham caah thla an campiak.
Posted on: Wed, 15 Oct 2014 11:30:08 +0000
Trending Topics
Recently Viewed Topics
© 2015