Vettel-an champion a la kham lo Formula One world champion Red Bull driver Sebastian Vettel chuan, world champion a nih vawi lina thleng mah se, champion belh zel duha a tuihalna a la reh tak tak loh thu a sawi a, a hna hi nuam a tih thu leh chak chhunzawm zel a tum thu a sawi. Red Bull driver chuan, Tun hnaia ka hlawhtlinna lam hi ka ngaihtuah em em ngai miah lo a, ka ngaihtuah vak lo pawh hi ka lawm zawk. Hetiang em ema ka lo hlawhtling ve ta mai hi a lawm chu ka lawm khawp mai a, mahse season thar a lo inher chhuah leh hi chuan engkim a thar a ni leh vek tawh a, chona thar nen kal leh a ṭul ṭhin a, ka phurna pawh a la tlahniam lo, a ti. Ni 10 vel liamta khan Vettel hi Indian Grand Prix-ah a zawna a vawi lina atan world champion a ni a, a champion hnua an interview-naah eng nge a goal leh tur tih an zawhna chhang in, Ka goal leh tur chu kan intlansiak leh hmasak ber tur hi a ni mai. Thui deuh thlir vak ka duh lo a, hun kal tawh thlir kir vak vak pawh ka tum lo. Hun hlimawm tak tak kan tawng tawh a, mahse ka nuna hun hlimawm ber chu ka hmaah a lo la thleng dawnin ka hria a, theihtawp chhuahin ka beih chhunzawm zel ang a, tun aia sang hi ka la thleng zel thei turah ka ngai.
Posted on: Fri, 08 Nov 2013 05:14:07 +0000
Trending Topics
Recently Viewed Topics
© 2015