“ZNP sorkar hun a lo inher chhuah ngei ka beisei” - K.Liantlinga MLA Vawiin dt. 1/11/2013 (Friday) a ZNP Gen.Hqrs chhung inkhawmah K.Liantlinga ZNP Vice President chuan thusawiin, “Pathianin mi tha tak tak min pe zel a, heng avang hian Pathian hnenah lawmthu kan sawi mawlh mawlh tur a ni. Hengte hi keimahni tih nilovin, Pathian remruatna a ni a. Kan ramah hian kum 40 chhung harsatna kan tawk tawh a, tactic leh game leh propaganda hmangin sorkarna an lo siam tawh a, inbumna politics hi Pathianin titawp turin a ruahman mek a, ZNP sorkar hun a lo inher chhuah ngei ka beisei a ni” a ti. Pu Tlinga chuan, “Sem policy hi kum 30 chhung kan ramah kalpui a lo ni tawh thin a, sem policy hian mipuite rilru puthmang thalo-ah min hruai lut mek a ni. Kan ram hruaitu ten ‘Mizo te hi kutdawh hnam kan ni, hnam thatchhia kan ni’ an ti a, mahse ram hrang hranga Mizo nula leh tlangval hnathawk-a awm tam takte hian hnam taima kan nih zia an tichiang hle. ZNP kan sorkar chuan Thalaite hnathawh tur ruahmanna hi hna hmasa berah kan neih dawn a, rinawm leh taima takin thalai ten hna an thawk ang a, kan ram economic pawh a lo tha thuai dawn a ni” a ti bawk. ZNP rawn zawm thar, Lalmuanpuia Punte chuan ZNP a rawn zawm chhan sawiin, “Mizoram District hrang hrang te Autonomous District Council-a dah tura party policy nei awmchhun a, theih ang tawka ram leh hnam tana thawk turin vawiin ni-ah he party hi ka rawn zawm ta a ni” a ti. Thusawitu dang MZP President Lalhmachhuana chuan, “Mizo Zirlai Pawl-in kan tuipui em em Zofate insuihkhawm theihna kawnga hmalatu Pu Lalmuanpuia Punte hian he party (ZNP) kaltlangin hma la chhunzawm zel turin duhsakna kan hlan a ni” a ti bawk. He inkhawmah hian ZNP Vice President Pu K.Liantlinga’n Pu Lalmuanpuia Punte leh mi 93 ZNP ah a lawmlut a ni. Dt.4.11.2013 (Monday) hian tun MLA Election atana ZNP Official Candidate turte Vanapa Hall-ah puan a ni ang.
Posted on: Fri, 01 Nov 2013 08:23:58 +0000
Trending Topics
Recently Viewed Topics
© 2015