Zaipawl zai ka en a. Orissa-a Kristiante an sawisakna video clip tlem a lo lang a. Vai pa pakhat cher ve tak, kamis trial ha an vuak tluk, kawng laia thisen nena let reng kha ka hmu a. An invuak chhawk mawlh mawlh a, ani chu a chechang reng reng lo a. Ka ngaihtuah ta a. Ka thih hnuah Isua lal thutthleng panin ka thlarau leh kha vai pa thlarau kha kan lo kal dun a. Vai pa chuan Isua an khenbehna kuta ser chu va vawnsakin heti hian a sawi ta a. Lalpa, kei mi rethei hi khawvela ka awm laiin Hindu sakhaw betute tamna hmuna cheng ka ni a. Kan khuaah chuan kristian-te min en hrangin kawng hrang hrangin kei leh ka chhungte chu min deusawhin min tiduhdah thin. Nangmah be tura inkhawmte, inpawlhote hi kan chakin kan thlahlel ve ngawih ngawih thin a, i hming faka zaia lamte, i chanchintha sawite pawh. Nimahse ualau takin chutiang chu kan ti ngam lo a, hlau chung chunga kan intawhkhawm ve changte hian ringlo mite chuan tiang leh chem nen min rawn hual leh thut thin a. Vawi tam tak min sawisa a min um darh thin. Kan thian thenkhatte phei chu an lute, an kut leh kete an tansak a, kei hi a dam rei pawl ka ni ta zawk a. I tana tuar tlaka min siam avangin Lalpa ka lawm e. a ti a, a mittui a tla a. Chutia a sawi lai mek chuan a ban a han lek chhuak a, Lalpa en teh, ka ban ruh hi hmun hnihah an vaw tliak a, ka malpui ruh pakhat hi a tliak bawk a, ka awm leh dulah hian min chhir a min trum bawk a. tih pahin a hnungzang an vuak duk cher chur leh a lu an vuakna hliamte chu Isua chu a entir a Lalpa i kiangah ka awm ve thei angem? tiin a zawt a. Chutah Isua chuan, Ka fapa, i tawrhna zawng zawngte kha ka hria a, ka tana i rinawmzia pawh ka hria asin. Khawvelah khan nasa takin i tuar a, tunah chuan natna leh hreawmna, retheihna leh riltam awm tawh reng reng lohna hmun, ka vanramah kumkhuain i chawl tawh dawn alawm, thlamuang takin awm rawh. a ti a, a kuah ta hle hle a. Kei erawh chu Enge ka sawi ve dawn tak le? ti a inngaihtuahin, lungngai takin ka lo ding ngawi reng a.
Posted on: Fri, 25 Oct 2013 19:35:08 +0000
Recently Viewed Topics
© 2015