البرص كمان وكمان :)) بغض النظر إني بحكم العيشة في دول إستوائية بقيت متخصص في الزواحف الصغيرة وقربت آخد دكتوراه في "البرص"، ورغم إني شرحت قبل كده كل وسائل الخداع الإستراتيجي اللي بيقوم بيها الكائن المتطفل السخيف ده لفرض أمر واقع عليك بداية من تسحبه لجوة بيتك من غير إذنك والسماح لنفسه إنه يشاركك في كل خصوصياتك ثم بسرعة مذهلة يبدأ في الدفاع عن مكتسبات سكوتك عليه وغضك الطرف عن تركه يعمل ما بداله في غرفتك وأنت نائم، وحتى اللحظة التاريخية التي تعلن فيها ثورتك عليه وتحاول إقصاؤه من حياتك بضربة شبشب واحدة وحاسمة، وساعتها يرميلك ذيله عشان تنشغل بيه أو يعملك ميت فتصدقه !! بغض النظر عن كل ده، يظل الدرس الإنساني الأكبر وراء هذه التجربة الحياتية هو إنك بعد ما بتقرر الثورة على "البرص" وتنجح في السيطرة عليه وتقوم واخده على الجاروف وراميه في التواليت (أو لا مؤاخذة الكبانيه)، إذ تفاجأ وإنت بتلقي نظرة الوداع الأخيرة عليه إنه بدأ يصعب عليك فعلاً، لكن بعد ما يرجع بيك شريط الزمن وتبدأ تتخيل حياتك معاه من تاني، تلاقيك بتضرب نفسك قلم محترم على وشك عشان تفوق، وتلاقي نفسك لا شعورياً بتشد عليه السيفون بسرعة، وبدون ذرة شفقة أو إنسانية !!
Posted on: Sat, 03 Aug 2013 18:14:51 +0000
Trending Topics
Recently Viewed Topics
© 2015