الكائن المصري اللي بيتخانق خناقة كبيرة مع شريكة حياته على أسباب تافهة و يقولها ( كرامتي .. محدش ييجي على كرامتي ) حضرتك مش شايف إن الموضوع مضحك ؟ . يا أخينا أنت مصري ، مقهور اجتماعياً و اقتصادياً و سياسياً و دينياً و الناس بتف عليك في الشارع و عايش في صندوق زبالة كبير و ممكن تبيع نفسك عشان عشرين جنيه و مديرك بيشيلك مج النسكافيه لحد ما يخلص هرش في راسه ، و جاي عند الإنسانة اللي بتحبك و بتحبها و بتحاول معاك إنها تنسى العشوائية في حياتها و راضية بيك بكل تقرحاتك البشرية و تقولها كرامتي !! ، الموضوع أبسط من كده صدقني ، أنصحك أنك تخليها تقضي معاك يوم كامل من بدايته عشان تشوف قد إيه بتاخد على قفاك يمكن ساعتها تشيل من مفرداتك كلمة ( كرامة ) و لو محتاجها أوي و لامؤاخذة بتنقح عليك ابقى ارمي مج النسكافيه في وش مديرك الأول .
Posted on: Mon, 18 Nov 2013 00:12:45 +0000
Trending Topics
Recently Viewed Topics
© 2015