ලංකාවේ ඔන්ඩච්චිගෙ ඉංග්‍රීසි රෝගියා The English Patient එය අහසේ හිමිකාරිත්වය සදා හිමිකරගෙන සිටි පක්‌ෂීන්ට අභියෝගයක්‌ වන සේ, යුද අහස්‌ යානා යුරෝපයේ නිල් අහස අරා කරක්‌ ගැසූ දෙවැනි ලෝක සංග්‍රාමයේ අවසාන සමයයි. එමෙන්ම පහළ බිම්හි පිහිටි ගොඩනැඟිලි හා ජීවිත දවමින් ඉහලට ඇදුණු දුම් රොටු නිල් අහසේ සළුව, අවාසනාවන්ත අළු පාටින් පොඟවා තිබුණි. මේ අතරම කෙමෙන් වියරුවේ විනාශකාරී සෙවණැල්ලට හසු වී යටවූ මිනිස්‌ ජීවිත හුස්‌ම ගැනීමට ඉසිඹුවක්‌ ලබමින් සිටි අවධිය උදා විය. නව හිරු අළු පැහැ අහස්‌ වියන සිදුරු කරමින් ලොවට වැටෙන අවස්‌ථාවක ඉතාලියේ දැවුණු සමතලා වුණු සුන්බුන් අතරින් හිස ඔසවන එකට ගැට ගැසුණු නමුත් වෙනස්‌ම ජීවිත හතරක්‌ වටා අපූරු කතාවක්‌ ඉන්ග්ලිෂ් පේෂන්ට්‌ [English Patient] නමින් ප්‍රබන්ධ කර ඇත්තේ මයිකල් ඔන්ඩච්චි Michael Ondaatje නම් උපතින් ශ්‍රී ලාංකික නමුදු පසුව කැනඩාවට සංක්‍රමණය වූ ලේඛකයාය . නවකතාව ගොඩනැඟී ඇත්තේ ගුවන් යානා අනතුරකින් දරුණු ලෙස පිළිස්‌සුම් තුවාල ලබා තමන්ගේ අනන්‍යතාව හඳුනාගැනීමට නොහැකි ලෙස මතකය නැතිවූ අල්මාසි නම් හංගේරියානු ජාතිකයා හා ඔහුට යාබඳ තවත් චරිත කීපයක්‌ වටාය. ඔහු උතුරු අප්‍රිකාවේ ගවේෂණ කටයුතුවල යෙදුණු ගවේෂකයකු හා සිතියම් නිර්මාණය කරන්නෙකි. අල්මාසි, අප්‍රිකානු කාන්තාර ප්‍රදේශයක ලෙනක්‌ තුළ සිතුවම් කර තිබූ ජලාශයක පිහිනන මිනිසුන් කිහිප දෙනෙකුගේ සිතුවම් සහිත පිහිනුම්කරුවන්ගේ ගුහාව [curve of swimers] නම් ලෙන් ආශ්‍රිතව ගවේෂණයක යෙදී සිටිද්දී, ඔහුට කැතරින් නම් කුලීන රූමත් කතක්‌ මුණගැසෙයි. තම ස්‌වාමියා වූ බ්‍රිතාන්‍ය රජයට සම්බන්ධ රහස්‌ කටයුතුවල නියුතු ජෙෆ්රි සමඟ විවාහයෙන් අනතුරුව කාන්තාරයේ සංචාරයකට පැමිණි ඇය, අල්මාසි හා අහඹු ලෙස කෙටි කාලීන නමුත් බරපතල ආදර සම්බන්ධතාවයක්‌ ඇතිකර ගනියි. එය ජෙෆ්රිට ඉව වැටීමත් සමඟම ඔවුන්ගේ ජිවිත අන් තැනකට ඇද වැටෙන්නේ කැතරින්ට හා ජෙෆ්රිට තම ජීවිතවලින්ද වන්දි ගෙවීමට සලස්‌වමිනි. ගුවන් අනතුරකට ලක්‌වන අල්මාසි ද රෝගියෙකු බවට පත්වෙයි. ගුවන් අනතුරින් හිමි වූ දරුණු පිළිස්‌සුම් තුවාල සමඟ අල්මාසි ඉතාලියේ කලින් රෝහලක්‌ව පැවති අතහැර දැමූ බංගලාවක හැනා නම් පියා අහිමි කැනේඩියානු රූමත් හෙදියගේ රෝගියෙක්‌ බවට පත් වෙයි. ඔහුට උවැටන් කිරීම සහ බංගලාවේ ඇති පියානෝව වාදනය තම ජීවිතය කර ගත් තරුණ හෙදියට තම කීප් සිංග් නම් සික්‌ ජාතික බෝම්බ නිෂ්ක්‍රීය භටයා මුණගැසෙන්නේ ඇගේ දිවියට නැවුම් බවක්‌ ගෙන දෙමිනි. කතුවර ඔන්ඩච්චි මේ තිදෙනාට අමතරව තම කෘතියේ ඉඩක්‌ ලබා දෙන අනෙකුත් ප්‍රධාන භූමිකාවක්‌ වන්නේ ඩේවිඩ් කරවගියෝ [David Caravaggio] නම් කැනේඩියානු සොර දෙටුවාටය. ඔත්තුකරුවෙකු ලෙස සේවය කරද්දී ඉතාලියානු කතකට අයත් භාණ්‌ඩ සොරකමක්‌ හේතුවෙන් ඔහුගේ දෑතේ ඇඟිලි අහිමි කරගෙන ඇති අතර වෙළුම් පටිවලින් වෙලන ලද දෑත් සමඟම ඔහුව හැනා ගේ බංගලාවේ සාමාජිකයකු කිරීමට කතුවර මයිකල් ඔන්ඩච්චි තීරණය කර ඇත්තේ තම නවකතාවේ ත්‍රිමාන ස්‌වරූපය සිවුමාණ කරමිනි. ප්‍රධාන වශයෙන් ඉංග්‍රීසි රෝගියාගේ දෘෂ්ටි කෝණය තුළින් ඔහුගේ වැළලී ගිය අතීතය පාදා ගන්නා අතරතුරදීම සමාන අවස්‌ථා අනෙක්‌ තිදෙනාගේ දෘෂ්ටියටද හිමි කර දීමට කතුවරයා ක්‍රියා කර ඇත්තේය. ඒ සමඟින් ප්‍රබන්ධය ලිහා ගැනීමට අපහසු තුන් තේරවිල්ලක්‌ බවට පත්වී ඇති නමුත් කියවන්නාගේ දෑස වෙනතක නොයන බව ඔහු සහතික කරන්නේ තම නවකතාව ගෙත්තම් කරන ලද සිනිඳු භාෂාමය උපමා රූපක, සේද තන්තු කෙරෙහි ඔහුගේ ඇති විශ්වාසය නිසාවෙනි. විටෙක එය සුරංගනා සිද්ධීන් මුසු වූ අභව්‍ය ගතියක්‌ ඉසිලුවද, ඒ හරහා විවරණය කරන ජීවිත පැතිකඩයන් සුරඟනන් ගේ නොව මිනිසුන්ගේමය. ආදරය, සැකය, පාවාදීම්, ලාලසාව, වියරුව ආදී මිනිස්‌ ගති සිරිත් සියුම් ලෙස කතුවරයා කාව්‍යමය ආඛ්‍යානයකින් පිරිමැද විදාරණය කර ඇත. 1992 වසරේදී ප්‍රබන්ධකරණයේ නියුතුවූවන්ගේ ඔටුන්න බඳු වූ, නොබෙල් ත්‍යාගයට පමණක්‌ දෙවැනි වන බුකර් ත්‍යාගයද [Booker Prize] හිමි කර ගැනීමට මයිකල් ඔන්ඩච්චිට මෙම ආදර ෙ€දාන්තය නිසා හැකි විය. එවර බුකර් සම්මාන ඉතිහාසයේ නිර්මාණ දෙකකට එකවර සම සම්මාන ලැබුණු දෙවැනි අවස්‌ථාවයි. ඉන්ග්ලිෂ් පේෂන්ට්‌ මෙන්ම බැරි අන්ස්‌වොර්ත් ගේ [Barry Unsworth] සැක්‌රඩ් හන්ගර් [Sacred Hunger ] ද හොඳම කෘතිය වීමට සම්මාන සැදෑවේ කරට කර තරගයක නියෑළුණේa සහභාගි වුවන්ගේ රාත්‍රී ආහාරය සහ මධුපාන උත්සවය ප්‍රමාද කරමිනි. අවසානයේදී මෙම කෘති ද්විත්වයම සම සම්මාන හිමි කර ගත් නමුත් බොහෝ විචාරකයන්ට අනුව නම් ඔන්ඩච්චිගේ ඉංග්‍රීසි රෝගියා මේ අතරින් පියවර කිහිපයක්‌ ඉදිරියෙන් ඇත. ඔවුන් පවසන්නේ සැක්‌රඩ් හන්ගර්ට සම්මාන හිමි වීම අහඹුවක්‌ ලෙසයි. ඉන්ග්ලිෂ් පේෂන්ට්‌ විවිධ විචාරක හා පාඨක සම්භාවනාවට පත් වූයේද. එහි අන්තර්ගතය හා නිර්මාණශීලී භාෂා ආකෘතිය කරණ කොටගෙනය. නමුත් පශ්චාත් නූතනවාදී බොහෝ විචාරකයන්ට ඉංග්‍රීසි රෝගියා සම්බන්ධව බොහෝ විවේචන තිබුණි. ඒ අතර ගුස්‌ටාව් ජන්ග් [Gustav Jung] රෝලන්ඩ් බාර්ත්ස්‌ [Roland Barthes] නෝත්රොප් ෆ්‍ර යි [Northrop Frye] හා බෘස්‌ ලින්කන් [Bruce Lincoln] වැනි ඉහළ පෙලේ දාර්ශනිකයන් සිටිති. ඔන්ඩච්චිගේ අනෙකුත් නිර්මාණ අතර වන ඉන් ද ස්‌කින් ඔµa ලයන් [In the skin of Lion] , අනිල්ස්‌ ගෝස්‌ට්‌ [ Anilzs Ghost] හා ද කැට්‌ස්‌ ටේබල් [ The Catzs table] ආදී කෘතීන්ට ද ඉංග්‍රීසි රෝගියා හා සම විය නොහැකි බව ඔවුන්ගේ මතයයි. ශ්‍රී ලංකාවේ ඉංග්‍රීසියෙන් සාහිත්‍ය නිර්මාණකරණයේ යෙදෙන්නන් උදෙසා පිදෙන ගේ්‍රෂන් සම්මානයේ නිර්මාපකයා වන්නේද ඔන්ඩච්චිය. ඔහු තමාට බුකර් ත්‍යාගයෙන් ලැබුණු මුදල් යොදවා ගේ්‍රෂන් සම්මානය තම මවුබිම වෙනුවෙන් ඇති කළේය. ඉංග්‍රීසි රෝගියා පාදක කොටගෙන බ්‍රිතාන්‍ය සිනමා අධ්‍යක්‌ෂ අන්තෝනියෝ මින්ගෙල්ලා [ Anthony Minghella], ඔස්‌කාර් සම්මාන රාක්‌කයක්‌ පිරෙන්න හිමි කර ගත් සිනමා පටයක්‌ බවට පත් කළ ද, ඔන්ඩච්චිගේ කාව්‍යමය ලිවීම අතික්‍රමණයට තබා සමමිතික වීමට හෝ එයට නොහැකි වූයේ දියමන්තියක්‌සේ ඔප දමා කැටයම් කපන ලද මයිකල් ඔන්ඩච්චි ගද්‍ය රචනා විලාසය නිසාවෙනි. ප්‍රවීණ සේනාධීර. දිවයින ඉරිදා සංග්‍රහය 28 12 2014
Posted on: Sun, 28 Dec 2014 13:28:33 +0000
Trending Topics
Recently Viewed Topics
© 2015