ဝင်းသူဇာတင်ဒါ နစ်နာသူများ ရှိနေ Friday, September 20, 2013 စက်မှုဝန်ကြီးဌာနမှ ၀င်းသူဇာ အရောင်းဆိုင်များအား ပုဂ္ဂလိက အရောင်းဆိုင်အဖြစ် ငှားရမ်းရန် တင်ဒါခေါ်ယူမှုသည် ယခုလက်ရှိ လုပ်ကိုင်လျက်ရှိသည့် ပုဂ္ဂလိက ကိုယ်စားလှယ်များအပေါ် နစ်နာမှု များစွာဖြစ်ပေါ်လျက် ရှိသည်။ စက်မှုဝန်ကြီးဌာနမှ ၀င်းသူဇာ အရောင်းဆိုင်များအား ၂၀၀၉ ခုနှစ်မှစ၍ ပုဂ္ဂလိက ကိုယ်စားလှယ်များထံ တစ်လလျှင် ကျပ် ၁၀ သိန်းဖြင့် တစ်နှစ်တစ်ခါ စာချုပ်ချုပ်ဆိုကာ ငှားရမ်းလုပ်ကိုင်ခွင့် ပေးခဲ့ကြောင်း၊ ၀င်းသူဇာ အရောင်းဆိုင် များအား ငှားရမ်းလုပ်ကိုင်ရာတွင် ဆိုင်ရှိ လက်ကျန် ကုန်ပစ္စည်းများ၏ တန်ဖိုးကျပ် သိန်း ၇၀၀ နီးပါးခန့် စက်မှု ၀န်ကြီးဌာန သို့ ပေးချေ ခဲ့ရသည့်အပြင် ဆိုင်ခန်းအတွက် ပစ္စည်းအာမခံအဖြစ် အိမ်ဂရန်များကိုပါ အပေါင်သဘောဖြင့် စရန် တင်ထားရကြောင်း၊ ၀င်းသူဇာ ဆိုင်အတွင်း ၌ စက်မှုဝန်ကြီးဌာန ထုတ်ကုန်မှအပ အခြားသောကုန် ပစ်္စည်းများ ရောင်းချခွင့်မရှိသော်လည်း ဆိုင်အတွက် အမှန်တကယ် အမြတ်ရနိုင်သော ပစ္စည်းများ၏ လိုအပ်သော ပမာဏအတိုင်း ဌာနမှ ထုတ်ပေးနိုင်ခြင်း မရှိသဖြင့်… ပြင်ပဈေးများမှ ၀ယ်ယူ ရောင်းချကြောင်း၊ ကိုယ်စားလှယ်များအနေဖြင့် ပစ္စည်းများ ရောင်းချမှုမှာ လစဉ်သိန်းချီ၍ အရှုံးခံ လုပ်ကိုင် နေရသော်လည်း ပိုလျှံနေသော ၀င်းသူဇာမြေနေရာ၌ အခြားသောဆိုင်ခန်းများ ဖွင့်လှစ် လုပ်ကိုင်ခွင့် ရရှိမှုကြောင့်သာ လုပ်ငန်း၌ အရှုံးနှင့်အမြတ် ညီမျှနေခြင်း ဖြစ်ကြောင်း၊ ရေရှည်ကာလဖြင့် ဆက်လက် ရောင်းချမှသာ လုပ်ငန်း၌ အမြတ်ရရှိလာမည် ဖြစ်သဖြင့် ယခုလုပ်ကိုင်လျက်ရှိသော ပုဂ္ဂလိက ကိုယ်စားလှယ်ဟောင်းများအား ဆက်လက် ငှားရမ်းခွင့်မရဘဲ ပုဂ္ဂလိက ကိုယ်စားလှယ်သစ်များအား တင်ဒါခေါ်ယူခြင်းသည် ပုဂ္ဂလိက ကိုယ်စားလှယ်ဟောင်းများအနေဖြင့် နစ်နာမှုရှိကြောင်း ပုဂ္ဂလိက ကိုယ်စားလှယ်များက ပြောကြားသည်။ “ဦးတို့ကို စငှားကတည်းက ကိုယ်စားလှယ်တွေ ဆက်မလုပ်တော့ဘူးဆိုမှ စာချုပ်ရပ်နားမယ်လို့ ပြောထားတယ်။ အခုလို တင်ဒါခေါ်တော့ ဦးတို့အတွက် အရမ်းနစ်နာတယ်။ ဦးတို့ ရင်းနှီးထားတဲ့ငွေတွေ အတွက် ရေရှည်ဆက်လုပ်မှ အမြတ်ရမှာလေ။ ဦးတို့ကိုပဲ ဆိုင်ခန်း ဆက်ငှားစေချင်တယ်။ ဆိုင်ခန်းငှားခ ထပ်တိုးမယ်ဆိုလည်း တိုးပေါ့။ တင်ဒါစပေါ်ငွေက အစက သိန်း ၅၀၊ အခု သိန်း ၅၀၀ သွင်းရမယ်လို့ ပြင်လိုက်တော့ ကုမ္ပဏီကြီးတွေနဲ့ အပြိုင် လေလံလည်း မဆွဲနိုင်ဘူး။ ဒီကိစ္စကို သမ္မတကြီးနဲ့ စက်မှုဝန်ကြီး ဌာနတွေကို ပုဂ္ဂလိက ကိုယ်စားလှယ်တွေ စုပြီး အသနား ခံစာတင်ထားတယ်” ဟူ၍ ၀င်းသူဇာ ပုဂ္ဂလိက ကိုယ်စားလှယ်တစ်ဦးက ပြောသည်။ အဆိုပါ တင်ဒါခေါ်ယူခြင်းနှင့် စပ်လျဉ်း၍ စက်မှုညွှန်ကြားဦးစီးဌာနမှ ညွှန်ကြားရေးမှူး ဦးသိန်းဆွေက ၀င်းသူဇာဆိုင်ခန်းများ ငှားရမ်းရန် တင်ဒါခေါ်ယူမှုသည် ယခင် စက်မှုဝန်ကြီးလက်အောက် ၀င်းသူဇာ စနစ်ဟောင်းမှ ပုဂ္ဂလိကစနစ်သစ်သို့ ပြောင်းလဲရန်ဖြစ်ကြောင်း၊ တင်ဒါပြိုင်မည့်သူများအား စားသောက်ဆိုင်များ၊ အနှိပ်ခန်းများ၊ စင်တင်တေးဂီတများ ဖွင့်လှစ်ခွင့် မပြုဟု တားမြစ်ထားသော်လည်း အခြားသော တားမြစ်ချက် တစ်စုံ တစ်ရာမရှိကြောင်း၊ တင်ဒါအောင် မြင်သူများအား ဌာနမှတစ်နှစ်စာချုပ် ချုပ်ဆိုကာ သက်တမ်းတိုးမြှင့် ဈေးညှိနှိုင်း၍ စုစုပေါင်း ၁၀ နှစ် ငှားရမ်း လုပ်ကိုင်ခွင့် ပြုမည်ဖြစ်ပြီး ယခင် ကိုယ်စားလှယ်ဟောင်းများကဲ့သို့ ပစ္စည်းများ လက်လွှဲယူရခြင်း၊ အိမ်ဂရန်များ အပေါင်သဘောဖြင့် စပေါ်တင်ရခြင်းများ မရှိကြောင်း၊ နစ်နာသူ ပုဂ္ဂလိက ကိုယ်စားလှယ်ဟောင်းများအား အထက်လူကြီးများအနေဖြင့် တစ်စုံတစ်ရာ ညှိနှိုင်းပေးရန် စီစဉ်လျက်ရှိကြောင်း ရှင်းလင်း ပြောကြားခဲ့သည်။ စက်မှုဝန်ကြီးဌာနမှ ၀င်းသူဇာ အရောင်းဆိုင်များအား ပုဂ္ဂလိက အရောင်းဆိုင်အဖြစ် ငှားရမ်းရန် ရန်ကုန် တိုင်းဒေသကြီး၌ ကျပ်သိန်း ၅၀၀ နှင့် ကျန်တိုင်းဒေသကြီးနှင့် ပြည်နယ်များ၌ ကျပ်သိန်း ၅၀ စသဖြင့် တင်ဒါ စပေါ်ငွေကို စက်တင်ဘာ ၁၇ ရက် နံနက် ၉ နာရီတွင် ပေးသွင်း၍ နံနက် ၁၀နာရီတွင် တင်ဒါပွဲကျင်းပခဲ့ပြီး ပဏာမ တင်ဒါ အောင်မြင်ပြီးသူများ လုပ်ကိုင်မည့် လုပ်ငန်းထဲတွင် ကုန်စုံဆိုင်၊ စတိုးဆိုင်၊ အထည်ဆိုင်၊ ဖုန်းအပိုပစ္စည်းဆိုင်၊ လျှပ်စစ်ပစ္စည်းဆိုင်၊ စက်သုံးဆီနှင့် ကုန်ပစ္စည်းအရောင်းဆိုင်၊ City Mart, Mini Mart, Super Market, Show Room, Bank ကျောက်မျက်လုပ်ငန်း၊ ဆောက်လုပ်ရေးနှင့် တည်းခိုခန်းလုပ်ငန်းစသဖြင့် ပါရှိ၍ မရမ်းကုန်း ၀င်းသူဇာဆိုင်အား ဦးနေရွှေသွေးအောင်က Super Market ဖွင့်လှစ်ရန် တစ်လလျှင် ကျပ် ၅,၅၀၀,၀၀၀ ဖြင့် ပဏာမ တင်ဒါ အောင်မြင်ခဲ့သည်။ မြန်မာသံတော်ဆင့်
Posted on: Fri, 20 Sep 2013 12:36:22 +0000