A TAWPAH CHUAN ISUA Thu khirh pui pui kan khel thin. A changin van lam chanchin te, Pathian awm leh awm lohte kan chhui bawk a. Ka nun min thlakthleng sak a, sual khur atanga min chhanchhuaktu Isua chanchin hi ka sawi ve zel dawn a ni. ISUA HI MI ZAWNG ZAWNG INTAWM TURA PEK KAN NI. Greek hote chuan mifing leh mi bikte tan chauh chhandamna awmin an ring thin. Judate chuan dan zawm leh mifelte tan chauh chhandamna hi awmin an ring bawk a. (1 kor 1:20). Mahse, Isua thiha thawhlehna hi chu Greek finna leh Judate chhinchhiahnain a pawlh dal loh, mi zawng zawng tan a ni. Lk.2:10 ah khan mitin ta tur chanchintha pek a nih thu kan hmu a. He chanchintha Isua hi mi zawng zawng, Misual leh mihnuaihnung berte tan pawha chan theih, khawvelin kan intawm theih CHANCHINTHA a ni. Tumkhat chu Aizawl tlak lama veng pakhatah hian Addict, a sual lutuk avanga a pa ngeiin a damlo enkawl a phal tawh loh, a farnute hnenah a thih huna a tuamna tur puan a leilawk tir thu min rawn hrilh a. Kan hriat veleh chuan Taxi-in kan zuk hruai ta nghal a. Damdawiin-ah kan dah lut a, zai a nih hnuah kan bulah a khawsa zui ta a. Chumi ngei chu Isuan a lo duh em em a, a nun kha thlakthleng a lo nita mai a. Isua-ah hian thil zawng zawng a tawp a, thil zawng zawng a intan bawk a. Vai a tawp a, Mizo, sap etc a tawp a. Aw hnam zawng zawng leh chitin tawng tin hi, vanlal nau ang a tahna valvari-ah an dang chuang love, an tih kha. Mipa a tawp a, hmeichhia a tawp a. Misual a tawp a, mifel a tawp bawk a. 1 kor 5: 17 ah Mi tupawh krista-a a awm chuan thil siamthar a lo ni a. Thil hluite chu a ral ta a, ngaiteh a lo thar ta, a ti hmiah mai a ni. Hrilhfiahtu pakhat phei chuan, Nimina nawhchizuar pawh vawiina Isua a rin chuan Pathian ngaihah nula virgin a ni, a ti tawp mai a ni. He Isua hi hausa leh rethei, dam leh dam lo, misual leh mifel leh hnam zawng zawngin kan intawm atana lokal a ni. ka nun hlui leh sulhnu a chhui ve lo NGAIHNAWM TAWP THEI LO CHU ISUA CHANCHIN HI A NI Lehkhabu ngaihnawm tak emaw, Thawnthu ngaihnawm tak emaw kan tih pawh hi vawi 4 vawi 5 han chhiar emaw, han ngaihthlak chuan a ngaihnawm hlei thei tawh lo. Vawi 20 chhiara ngaihnawm kan la tih ngawih ngawih lehkhabu hi avang khawp ang.Isua chanchin erawh hi chu a ngaihnawm reng mai a ni.Hla phuahtun, sawi nawn leh rawh min hrilh leh rawh, Isua ka tan a tuarna kha..kalvari ka damna chanchin, thinlaiah a ngaihnawm bang lo a tih ang mai kha a ni Kan veng ami, ka thianpa ni bawk hi damdawiinah a awm a, a pum a chhiat vek tawh avangin Doctor te an beidawng tawh. A natna chu a thihpui dawn a ni tih an hrilh hreh avangin keiman ka hrilh ta a. Thianpa, i natna hi tihdam chi a ni lo, i damchhuak dawn lo tia ka hrilh ve leh chuan ka banah min chelh a,Isua chanchin min hrilh rawh a ti. Thihna kotlanga mi a dah tak tak chuan, Politics, pawisa leh thildang kha a tan a ngaihnawm thei lo. A thih dawna a hriat duh chu Isua chanchin a ni. Damdawiin khumah chuan Isua nen an intawk ta a. A boral dawn zan chuan Damdawiin khumah, thei leh thei lova ding chhuak chungin Isua chanchin a sawi a, thlamuang em emin a kal ta. A tawpah chuan ISUA hi a ni ngaihnawm thin chu ni. Rev. Vanlalzuata thusawi ka hrereng thin. A thianpa, mumbaia cancer natna avanga awmin a thusawi a tih kha,Cancer natna vei, kan damchhuak tawh dawn lo a ni tih hrereng mai ten Pathian fakna hla kan han sa chu, a phuahtute ai pawhin kan sa tak zawk ang. Isua faka lam kan chak a, taksa chak loh vanga ban phar thei tawh lote chu a chak deuh ten kan inchawi kan sak a tia a sawi kha.Paulan, kan pawn lam taksa hi lo awngrawp telh telh mah sela, kan chhungril taksa chu nitin siamtharin a awm zawk a ni. tia a sawite kha a chang ve lo tan chuan hriatthiam rual a ni lo. Heng vangte hi a ni ang.Hriatchian lehzual che hi ka va duh em, an lo tih ngawih ngawih ni. Kan veng ami bawk (a hming chu sawi lo mai ang. kan veng mi kan awn ve nuala, kan hre theuh awm e). A naupan lai atangin thil tha lam a tih thu sawi tur a nei ngai lo. YMA ten thil a ruk vangin an man a, a ni inti pa vel kha tukverhah a zuangchhuak ta mai a. a hnungzang ruh a sawh chhia a, damdawiinah an dah a. A damchhuak dawn lo tih ka hriat vangin ka han tlawh ve a. A hma zawnga Pathian lam hawi duh ngai reng reng lo khan a ngaihthlak chak ber chu Isua chanchin bawk a ni. Midang thahnemngai ten an kan fo bawk a. Onesima chanchin hi ka hrilh ve a, ngaihnawm a ti em em mai a ni. A tawpah chuan thlamuang takin ISUA nen khawvel a chhuahsan ta a ni. Peter Bohler-an Lei sangkhat Isua fak nana neih a chak thu a sawi thin a. Charles Wesley- an a lo hriat chuan, Aw mi sang tam tak zaite chu tih hla hi a phuah ta a. Lal Isua hming hlutzia sawi nan... Lal Isua hming min muantu hi, Kan lungngaih tikiangtu; Misual tan pawh rimawi a ni, Min thlamuantu ber hi tiin a puang chhuak a nih kha. John Newton-a ten Isua hlutzia hriain, Isua hming hi a va tha em tiin hla an lo phuah thlawt bawk a. Hming hlu tak, ka innghahna leh ka phaw kha, an ti. Isacc Watts-a ten, khawvel aw mawi zawng zawng hian hming hlu an fak a..... an lo ti mawlh mawlh bawk a. Nekchepna karah pawh, Pathian Isua a hming ka hria, a hming chauh ka ring a.... an la tizel thei a. Bernerd-a leh a thianpa pakhat chu khawpui pakhatah an kal a. Rimawi chitin reng a ri chuah chuah a, a thianpa chuan, khang rimawite kha i hre ve em, a mawi a ni tiraw? tiin a zawt a. Ani chuan Isua aia rimawi dang a hriat loh thu a hrilh mai a ni Khawvel aw mawi zawng zawngah hian, rimawi tinreng zingah; mihring chhandamtu i hming hi, thawm mawi ber a ni fo an lo ti daih mai a ni Nun awmziate leh thil chi hrang hrang kan zir zawng zawng hian, a tawpah Isua a zawng a ni. Heng zawng zawng hi a changtute chuan an nei mai a ni.
Posted on: Sat, 18 Oct 2014 03:59:07 +0000
Trending Topics
Recently Viewed Topics
© 2015