ANGEL-TE DAI NGAM LOH DAITU RUTHI Moab khawpui laitualah a leng vel a, A bahsam thlah chhawl lêng siu siauten, An iang e , Aigupta hriak rimtuia chei, A sakhmelah rangkadartui a luang a , A thinlung sakhat lunghlu tha mi pai si chuan, Val zawng thinlai a hneh, Juda rûn mawi a. Lalte Lal voh Israel fahrinte tan, Baal hmaa thingthi kianga tlai ni lên, A rem lo, thîkna meipui a alh fo va, Naom pawm lai tang, rial tui ang luang ralin, A hrai dawntuaiten thlafâm vangkhua an lawi, Tiandar khawng thei lo, zai hla rem a tawp ta. A chûn nunnemin an vangkhawpui pel a, A pianna ramah lam ang a let ni chuan, Hnutiangah zuiin kirtiang a rel thei lo, Naom lunglawm luatah mittui a luang a, Hrin leh chawi loh fanu pekin a awm ta, Ruthi rinawmna par chhuang lo-in ring suh. Judai khawpui daiah thlawi nelawm an vai, Tîm leh zûm luat vangin rei fâng an tâwi a, Lunglên zûn phur thar leh in khuapui an vel, Luah lumtuten , lâwmna kut bengin lo lawm, Îr chuktuahin an lo fâwp, hlim lawm takin, Muangten riahrun remin ngâm-in an zal ta. Mimam sawmfâng lâwrin Ruthin tuan rel e, A nun duhawm leh sakhmel dar zâm thlirtu, Boaza thinlung tui ang a nêm duai duai, Hmun dang hmun dang tuan rel a ngai lo ve, Zawng zel nang che, in puar in fânna khawp chu, He hmunah hian a awm ngei ang , a lo ti. Zantiang Lalnu chhawrthlapui lo êng zualin, Hruih zawl a ên ta, thawkrim an chawl ta e, Boazan chham ang zal, buh vûm thlir phakin, Hram thiam an ngawi, si-ar an vûl vanzawlah, Rimtui a lêng, zanlalnu a tho ta e, Angel-te dai ngam loh hmatiang chhawn turin. A kianga rimtui lêng, tu nge haider ang, A silh puannem tu nge zawn lo phal ang ni, A ke bula lili pâr mawi thliah lovin, A liam ang maw, rimtui nen, ni lul lo ve, A sakruang lumna thlasik puannuam ang leh, A ngenna aw mawi lairil fântir tu chu. Lalpa malsawm rim nam, tlangval rethei leh, Hausa zui lova a laichinte kiang pawh, Thlahlel thei lova a chûn riang zuitu chuan, Hmâna an hril Judai khawpui Bethlehem, Pa rinrawl rûnah nuthai chu chang ta-in, Lal thlahtu zingah a sakhming a chuang ta.
Posted on: Sat, 23 Aug 2014 11:57:29 +0000
Trending Topics
Recently Viewed Topics
© 2015