Abangan, Bannawag, Agosto 4, 2016: TIKBOY Tacuboy ti pudno a nagan ni Tikboy Tacuboy. Saan ketdin a kasla birngas laeng? Nupay kasta, maibagay met iti pisikal a langana: kulot a buok; napudaw a lumabanag a kudil; nauuneg a mata; atitiddog a kurimatmat; natundiris nga agong, a positibo koma a talugading ta umarngi ken ni Richard Gutierrez, ngem gapu ta naibuyog iti abbaba a gurong ken takiag, aglanglanga la ket ngaruden a nataengan a Sto. Niño. Sa nasinggit pay ti timekna, piman! Ngem nasaysayaat la ngarud koman no Niño ti naganna. Kasla koma ngay Niño Muhlach a mabalin met ta ad-adda a kaar-arngina pay. Ngem sipud adda puot wenno nakemko, Tikboy daytan a timmulang. Pandek ken “boy.” Tikboy. Ita, naammuak a pudno a naganna dayta idi binaonnak a mapan mangala iti Birth Certificate-na idiay munisipio. Medio naibayagak ta Rodrigo Tabaco Tacuboy, Jr. ti imbagak a nagan iti municipal civil registrar maibasar iti sumagmamanon a daras a panagpaw-itna iti donasionna iti simbaan a kas koma iti “Thanksgiving Mass offered by Rodrigo Tabaco Tacuboy, Jr. and Family.” Ngem dayta met Tikboy Tacuboy ti adda a nailanad a nayanak iti Marso 28, 1962 ken anak da Rodrigo Tacuboy ken Vicenta Tabaco a kakaisuna nga adingen ni lilongko a tatang ni tatangko (wen, angkelko ni Tikboy). Anian a paggaak ti loko a municipal civil registrar iti naduktalanna. Ngem kinusilapak isu a nagsardeng. Mabalin a nagaripapa ta malaksid a kabagian ni inangko ti mayor, agpapaayak a Head Teacher ti eskuela iti bariomi a Villa ken agarup agkalanglanga ken agkabagbagikami iti daytay boksingero a ni Ruslan Provodnikov a nangkabkabil ken ni Timothy Bradley a nangagaw iti korona ni Manny Pacquiao. Sabagay, maawatak met ketdi daytoy municipal civil registrar, ken ti asino man a mabalin nga iti mabiit ket makaammo a ti Tikboy Tacuboy ket pudno a nagan a saan laeng a birngas. Ta ti balikas a tikboy iti lugarmi, kadua iti listaan dagiti dadduma pay a mapagkakatawaan a birngas a kas iti kir-is para iti nangisit a kulot ti buokna, sakang wenno apon iti kusipet, mongoloid wenno gammel iti special child, gusing-gusab iti adda diperensia ti bibigna, budiding iti bakla, tsitae iti nakuttong a nalaad ti langana, zorayda no nalaad a babai, ken dadduma pay a panguyaw a balikas. Iti ababa a pannao, no tikboy ti awagda kenka, pandekka wenno umarngika iti ansisit wenno kada Ungga ken Dagul. (Paset ti sarita a Tikboy Tacuboy daytoy numo)
Posted on: Wed, 23 Jul 2014 02:14:27 +0000
Trending Topics
Recently Viewed Topics
© 2015