“BEIDAWNG SAWRKAR, MIZO NATIONALISM DOTU” TLU CHHE MEK MNF President, Pu Zoramthanga chuan Presidential Address a sawiin, ‘Bei dawng sorkar, Mizo Nationalism dotu a tlu chhe mek’ a ti. President chuan, MNF party chu chhungkaw buaina leh harsatna te, sawrkar pui nen kum 20 chhung indona te, a belh kungpui (East Pakistan) tlu chhia te leh remna neih hnua Politics-a sawisakna chi hrang hrang kum 53 chhung a lo pal tlang tawh thu a sawi a, heng harsatna chi hrang hrang kara chhanchhuak zeltu Pathian hian kawng chanveah kalsan lovin, hlawhtlinna tlangah a hruai chhuak ngei dawn a ni. Pu Rama chuan, “kan ram, kan Hnam leh Sakhua te hi ram lian pathum - India, Burma leh Bangladesh te kar cheha awm, mihring maktaduai sang chuangin a hual vel a nih vangin venhim a ngai em em a. Mizo Hnam Thinlung (Mizo Nationalism) hi a venhimna hmanraw tha ber a ni tih hriain mi sang tam nunna hlanin kum sawmhnih chhung thisena Baptisma Training-na Pathianin min neihtir,” a ti a. Chu chu hriain a tir atangin Congress hian a do ngar ngar thu a sawi a. “Remna leh muanna awm theih nan vai lem changin an Party (Congress) chu din mai chauh an nih thuin bul an tan a. A rei tulh tulh a, an huangtauin an zia an thup lo tulh tulh a. A tawpah phei chuan kawr nghawng chip, Bhavan, Mahila leh Seva Dal nen ‘Vai buhfai ei theuh theuh’ an ti a. Kum tam min awp chhungin development tak tak tel lovin a rethei sum it tawk chiahin min dah a, chutih lai tak chuan a sum sema kan sahuat laia an thal alh theia kapin kan Nationalism chu NLUP te, thinlung tichhe chi sum sem chi hrang hrang nen thiam takin an rawn bei ta a ni,” Pu Rama chuan a ti MNF President chuan Congress Prsident, Pi Sonia Gandhi pawh Kristian Roman Catholic ni chungin Tirupathi Hindu Temple -ah ‘In pathian Lord Venkataswaran hi ka ring e’ tia Lalpa Pathian phatsanin a fapa Rahula tan malsawmna dilin a tawngtai ta hial thin niin a sawi a. Chutih lai chuan Mizorama an hotute pawhin Coconut sawhkeh a, chal hnawih senin ban sawm nei hmaah an puja ve ta hial a. Kohhran rawn ngai kan ti lo va, kan rawn dawn hek lo tiin zu an zawrh khum dawn ta a nih hi. Amaherawhchu Delhi lamah an tlachhe vek a, hetah pawh an hotupa berin a beidawn thu a aupui ta a. He “BEIDAWNG SAWRKAR, MIZO NATIONALISM DOTU” hi a tluchhe mek zel, niin a sawi bawk.
Posted on: Sat, 15 Nov 2014 01:31:29 +0000
Trending Topics
Recently Viewed Topics
© 2015