Boletin Informativo Blanku-Pretu-Kòrá: Centro Dominguito pa di dos aña konsekutivo, KAMPION di kampionato regular Dominguito. Djasabra 10 di ougùstùs 2013 Centro Dominguito a hunga su di 16 wega válido pa e kampionato regular di Federashon Futbòl Kòrsou 2012/2013. E espektativa pa e wega aki tabata hopi grandi komo ku e Trikolornan di Jong Holland tabata e kontrinkante. Tur hende ta kòrdá e insidentenan di dia 3 di mei último. Pero tur e kosnan negativo aki pa Centro Dominguito ta tras di lomba, loke a keda demonstrá tambe ayera promé, durante i despues di wega pa nos organisashon. Mané fanatikada di Centro Dominguito ta kanta “NADA NI NIUN HENDE NO POR KIBRA NOS”. P’esei Centro Dominguito no ta komprondé dikon kada bes ku menshoná nos nòmber, ainda hopi hende ku mester sa mihó i sigur duna e bon ehèmpel, ta pensa kada biaha atrobe riba 3 di mei i dikon e Komishon di Apelashon di FFK ta tardando asina tantu pa duna veredikto final den e kaso aki. Centro Dominguito den e kaso aki a presentá dokumentá i ku prueba su ponensha ku e kastigunan imponé ta desproporshonal i ilegal. Desproporshonal paso ta parse ku e kastigunan mas pió ta imponé solamente riba nos ekipo, a kastigá diferente hungadó ku a kometé mesun infrakshon diferente i no a tene kuenta ku tur aspektonan konserní. Fayonan di Federashon, di kuerpo di seguridat etc a keda aseptá pero no konsiderá. E suspenshonnan ta ilegal paso no a duna nos miembronan un proseso hustu i imparsial, no a duna ningun rapòrt i ta parse ku Direktiva FFK a bini pa “shoot to kill” Centro Dominguito , posiblemente sirbiendo no e interes di futbòl. Pa loke ta trata e wega mes, Centro Dominguito un bes mas a demonstrá profeshonalismo, hungando un wega na serio sin preokupá su mes ku ni provokashon di kontrinkante ni desishonnan parsial di e árbitro. Un bon públiko por a mira un wega sigur hopi deportivo i bistoso, kaminda Centro Dominguito a demonstrá bon futbòl, ku toke rápido i di profundidat. Den e wega Centro Dominguito a dominá e Trikolornan di Jong Holland kompletamente i a krea komo 10 oportunidat klave di gol 100%, pero e punteria i suerte no tabata na nos banda. Di tur manera na un manera profeshonal i ku golnan di Ivanny Calvenhoven (Pinalti) i Mirco Colina jr, Centro a sa di gana fásilmente di e Trikolornan di Jong Holland. Ku e viktoria aki Centro Dominguito, ainda faltando dos wega, ta titulá KAMPION di kampionato regular i ta yega na 39 punto den 16 wega, ku 41 gol na fabor i 12 kontra. E próksimo wega di Centro Dominguito, kontrali na e skemanan publiká anteriormente, ta djadumingu 18 di ougùstùs 2013 pa 5:00’or di atardi na Stadion Ergilio Hato (SDK) kontra di e Kolegialnan di FC SITHOC. Esaki ta e di tres biaha den e último kuater temporadanan ku Centro Dominguito ta titulá kampion di kampionato regular.
Posted on: Sun, 11 Aug 2013 16:50:49 +0000
Trending Topics
Recently Viewed Topics
© 2015