By.Rev. Biak Chhunga Vawiin August 6, 2013 tana Pathian thu—Genesis 15:1-6 1Chûng thil hnuah chuan, “Abram, hlau suh, kei hi i phaw leh i lâwmman nasa tak mai ka ni asin,” tiin, Lalpa thu chu Abrama hnênah mumang angin a lo thleng a. 2Tin, Abrama chuan, “Aw Lalpa PATHIAN, eng nge mi pêk ang, fa nei lovin ka awm hlen dâwn a, ka ro khâwmtu tûr chu Damaska khuaa mi Eliezera hi a ni si a?” a ti a. 3Tin, Abrama vêkin, “Ngai teh, chi rêng rêng mi thlahtîr si lo va; en teh, ka ina piang hi ka ro luahtu tûr a ni,” a ti a. 4Tin, ngai teh, “Kha mi kha i ro luahtu tûr a ni lo vang; nangma rîla lo la rah tûr ngei chu i ro luahtu tûr a ni zâwk ang,” tiin Lalpa thu chu a hnênah a lo thleng a. 5Tin, ani chu pâwnah a hruai chhuak a, “Vân lam khi en la, arsite khi i chhiar theih chuan chhiar teh khai,” a ti a. Tin, amah vêkin a hnênah, “I thlahte chu khiti zât khi an la ni ang,” a ti a. 6Tin, ani chuan Lalpa chu a ring a; tichuan, ani chuan chu chu a felnaah a ruat ta a. Ngaihtuahzawm atan Pathianin Abrama chu hmelma lakah a phaw nia venghim turin a tiam a. Mahse, Abrama chuan chu mai chu tawk a ti lo va, fa nei thei lova a awm hlen tur chu a ngaingam thei thlawt lo. Chu veleh Pathianin Abrama chu van lam a entir a, vana arsite chu a chhiartir ta. A thlahte chu vana arsi zat an la nih tur thu a hrilh ta. Vana arste chu chhiarsen rual an ni lo. Chuti ang bawkin kan tana Pathian thilphalna hi kan chhiar seng lo. Engtik khan nge van lam i en hnuhun ber a, chhiar sen loh Pathian thilsiam chungchang i ngaihtuah hnuhnun ber? Tawngtaina Thil mak chhui sen loh kan Pathian, i thilsiamte chu a makin a ropui a, hriat thiam rual leh hriat phak rual an ni lo. Chung lama arsi chhiar sen lohte inkhak buai lova lungrual taka an len zaho theih ang khian keini lei mihringte pawh hi intina tawn lova lungrual taka leng zaho ve thei turin min pui ang che. Amen.
Posted on: Tue, 06 Aug 2013 14:43:01 +0000
Trending Topics
Recently Viewed Topics
© 2015