(Chhiar peih in awm tak mialin........... Anti-Heroine Zomuani) Tawngna maha ‘a champhai deng’ tih kha a ni a. January thla tir a ni bawk a, Champhai chu vawt tak tur a ni reng a ni. ‘Awmpui phei’an tihah chuan tleirawl chhuak awrh, ngo lam deuh, mit meng fiah kak mai, mizo hmeichhiaah chuan a hleitling pawl tak tur hi hmanhmawh hmel tak hian a kal hlawk hlawk a. Khua a vawt bawk a, a kal zawng chuan a thaw khu laih laih a. A Jumper dum hak, a hmaa ‘New York’ tih chuang chu, ‘a hak tur bika company rawn siam a ni ang e,’ tih mai turin a inhmeh a. Lukhum phiar, chhawhchhi buh pawlh rawng a khum a, navy blue Jeans mar pangin a ha bawk. Converse pheikhawk dum a bun a, rucksack puar tak ak chungin a kal liam ta a. Chutih lai chuan zing tho hma deuh nu thenkhat chuan zingkara an meilum ai tur buaipuiin, zanlama an sikri ai te chu an lo thing fai mek bawk a. Zomuani hi vengkhat tleirawl fel a sawi kha a ni a. Nu leh pa thenkhat chuan an fate zilhnan tak a hming an lam teh fo va. Pawl sawmpahnih (HSSLC) result chhuakah pawh First Division-ah pass-in a sikul kaina, Govt. G.M Higher Secondary School pawh a tihming tha hle nghe nghe a ni. Aizawlah zirna chhunzawm a chak viau na a, an chhungkaw khawsak a awl-ai vak loh avangin tum chiin niin a hre lo va. Rilru chavai ang reng taka a awm lai leh zirna chhunzawm dan tur ngaihtuah a a inkhap a inkhap lai chuan; a vanneih a siamin a nutei te nupain naute thar an neih avanga awmpui tur an duh thu rawn sawiin, College pawh Aizawla kal mai turin an rawn sawm hlauh mai a. A nu, hmeithai chak lo tak leh a nau neih chhun Mazuali, pawl sarih zirlai te kalsanin, kum thum dawn liamta khan Aizawlah a chhuk thla rawih a. A nutei te chhung hi Republic Venga khawsa an ni a. An in atanga hla lo tak Aizawl College-ah; Zomuani chuan zirna a chhunzawm a. Chhangchhe ina awm ngang a ni bawk a, mawngvawmba an sawi ang maiin a tul thin hle mai. Kumin Krismas pawh hi a nutei te nupa chuan Aizawla hmang mai turin an duh viau na a, a nu hriselna a tlak hniam deuh avang leh chhungkaw kima hman an duh avangin Champhai lamah a haw chho ta kha a ni a. February thla tirah exam hmachhawn leh mai tur a nih avangin rei tak cham theih a ni si lo. Krismas leh kumthar hlim taka an hman ho hnuah Aizawl lam pan turin ‘Sumo’ in a lo nghahna Kanaan veng lam pan chuan a chhuk thla hnak hnak a. Motor-in a lo nghahna hmun a zuk thlen chuan, passenger an lo kim tawh bawk a chawl khaw muang lo chuan an chhuak nghal ta mai a.Kawlkulh Hotel-ah tukthuan ei a an chawl tih loh chu chawlh nei mang lovin an tlan a. Vawi hnih khat chu zunram thiar a han din dat chu an nei awm e. An tluang bawk a chawhnu her, dar 1 bawrhah Aizawl an lut fel a Hriat loh karin hun a kal ve zel a. Zomuani pawh kum thum dawn Aizawlah a lo awm ve ta reng mai a. Final exam ber an zo tawh bawk a, zirlai tam zawk tan chuan kawlpui khen thlak ang huaia thawnven thlak a ni ngei ang le. Zomuan ngaihtuahnaah erawh a nu, hmeithai chak lo tak leh a nau neihchhunin a luah fova. Harsa taka a nuin; chawhmeh, anhnah i lo fahran a zawrh nitin avanga heti ti tiat an nih theih dan te a chhut ru fo thin. Chawhmeh zuar an ni na a, chawhmeh nei mang lova chhuan tam pal tlang tawh an nih tih hi a hrechiang ber pathumte zing a mi a ni ngei ang. An dinhmun a hriatchian avang hian a thawhawm tawk hna hi a melh ru reng thin a. Sorkar hna pawh a dil phak chin chu a dil ve fova. A hmuh hi a har em mai pawh a. Exam an chawlh chhung pawh hian inhlawhna tur remchang a hmu hlauh mai a. An chhangchhiat zualpui a reh tawh bawk a, a nutei te nupain an remtih tho avangin Aizawla Musical Instrument zawrhna dawr lian ber leh changtlung ber tih ngam ‘Mezzo forte’ dawr a nghak nitin ta a ni. A thawhchhuah ve ang ang te chu ‘ka nu te tan’ tiin a tam zawk hi a thawn thin a. A nutei te nupa lahin, ‘Pawisa faia intanpui thei dinhmunah kan ding si lo, i thawh chhuah ang ang i thawn hi a tha ber,” an ti miau si a! A nutei te nupa a chunga an that em avang hian inthlahrun ruk chang erawh a ngah thin hle a ni. June thla tir a ni a, chawhma lam chu khua a thiang hle mai. Zomuani pawh dawr bungrua rem felin a tul hle mai a. Kolkatta atanga dawr bungrua an chah a rawn thlen ni a nih avangin a thawhpui hmeichhe pahnih leh Assistant Manager Sawmtea te chu Lengpui Airport lam panin an inkhalh chhuak a. Dawr neitu Pu Mawia fapa, Zuala nen chauh dawr an nghak a. Pu Mawia hi a kum a lo tam ve deuh tawh avangin a fapa neihchhun Zuala kutah an sumdawnna pawh kumin kumtir atang khan a dah ta a ni.Zuala hi BBA zo hlim a ni a. High sikul kai rual a nih atanga Delhi leh Kolkatta tih bawra awm bo vang vang kha a ni a. ‘Vairamah krismas a nuam zawk,’ ti a haw tha duh meuh lo kha a ni thin bawk a, ‘Vanram kawng ai Vairam kawng’ inkhawh hmuh tir tlak zawk a ni awm e. Heti ang mi a nih avang hian Pathianni chawhmaa ‘awm’ tih thin ai chuan Tuirial Airfield hluia Bike intlansiakte, chawhnu lama arpa insualtir a, pawisa inthapna hmun, veng keltil deuhva tawlh tawlh te hi a nuam tih zawng a ni tlat pawh hi a mawh lo ve. Tlangval hawklak hmel tak a ni na a sumdawnna kawngah erawh chuan a pa atanga an ze chhawm a ni ngei ang an firin an fet peih hle. A sawi uar deuh phei chuan , “An ruang bulah pawh chengkhat thir thlauh i la, an phu leh uih thei ang,” tiin an chhungkaw chanchin an sawi hial thin reng a ni. Chawhma lama khua a that teh lul nen chawhnu lam khua chu a nuam lo viau mai a. Ruah baw hawk avangin khawlaiah mihring veivak leh lirthei tlan pawh an tlem pharh mai. Kawl a dul duk ruih a.Tiau chhum a tawlh dul dul bawk a. Thli nen a rawn thawk a nih avangin chhunglam atangin dawr an pawt khar fur mai a. Dawra chuangkai an awm lem loh avangin Zomuani te pawh chuan dawr chu chhung lam atangin an khar a. Chutih lai chuan Manager room-a Landline Telephone a rawn ri ral ral a. ‘Aw hello,’ “ U Zual, chhum a zing nasa deuhva Pilot a rawn tum ngam lo eng tin nge ni dawn?,” “A nih tak chu mawle, khuain a zir lo em a ni.Sawmte, naktuk lamah in kal tha leh mai dawn nia. Dawrah chuan rawn let duh tawh lo mai rawh u. In rawn thlen chhoh meuh chuan haw a hun a ni mai dawn a.” “A nih motor hi engtin nge ni ang, ka rawn dah mai dawn em ni,”? “Tete-i leh Sangtei kha thlah kawi la, i hawn mai dawn nia” “Aw le, aw le,” Haw nan chuan a la hma deuh si a. Khua a vawh deuh avangin Zuala chuan coffee in a rawt a. Dawr chhung kil khat, hlam bial lek hi Vending Machine (Coffee leh Nestea bur) dah nan an ping dang a. Chu lam pan chuan Zomuani chu a kal ta nghal a. Zuala hian Zomuani hi a ngaizawng ru viau a. Zomuani hi nula fel tak, nelawm zuamawm si loh, a kum phu lova puitling thlarh mai a nih avang leh a phak tawk a Kohhran bel tlat mi a nih avang hian a hrechiang apiangin an fak a. Sum leh pai hi zahawmna tehfung atan leh tehkhawng atana hmang thin Zuala meuh paw’n, a nungchang leh hmel hmaiah hian hmuh a nei a ni chek a niang chu, an dawra inhlawh nimah se, nula dang a khawsak kawihsawih pui ang ngawt chuan khawsak pui a tum ngam lo. A chanchin erawh a ngaihven ru reng a. ‘Zomuani hi zawng i fel bawk a, Pro-Pastor nupui i la ni mai dawn e,” ti a an fiamna te pawh a hria a. A ta a ni dawn lo tih chu a hre chiang thawkhat viauna a, remchanga han theh thal a chakna erawh a reh thei tak tak lo. Zuala chuan hun remchang a chang chhuak taah a ngai hial a. Hnathawktu dang a haw tir tawh a, khuain a zir a, tumah dawra rawn chuangkai an awm loh ni a ni bawk nen, a ngaihtuahna tenawm tak tihpuitlin tum chuan a han zi mar uan uan a. Chutih lai chuan coffee no hnih kengin Zomuani chuan a rawn pan mek a. Zuala chuan, “Khawvawh ni hi chuan Coffee hian min tilum a, nestea ai chuan a tihchi phian,” a han ti a. “U Zual, kei chu Nestea hi rimtui ka ti lova, ka in meuh lo a sin,” Coffee no pek pah chuan heater an ai lai chu a rawn kil chhunzawm ve lehta nghal a.“Ngawiteh, ka room-ah sawn va lut la, dawhkan hnuai ‘drawer’-a cigarette leh kuhva hring kha min va lak lawk teh,”.Zomuani chuan a coffee no kalsanin Manager room lam a pan a. Zuala pawh chuan a Jacket chhunglama a damdawi ah chu a phawrh zal zal a. Heti ang damdawi hmang hian Vairama lehkhazira an awm laiin, hnamdang nula vawihnih khat lo khuaikhem zauh a nei tawh nghe nghe a ni. Mihring taksa a tinguaia, mutchhuakin a zem a, minute 15 hnuah nikhawhre lo in an awm hial thin. Rim leh rawng a nei lova, a phut a nih avangin thingpui leh cold drinks vela han pawlh a remchang hle a ni. Zomuani coffee-ah chuan tlem a han pawlh ru zauhva. Eng helh nei awm lo tak hian a cell-phone a khal zui nuap nuap a. Zomuani chu kuhva leh cigarette hum pawlh chungin a rawn zai phei rat rat a. ‘Aw Zoram min nghilh bik suh ang che. Dawn changin zoram kan ngai vawng vawng,’ U Zual he hla hi a lunglen thlak i ti ve em? Mizoram pawna vawi khat em pawh la chhuak lo kei ni ang lung a tihlen theih chuan, a kum a kum vairama awm, nangni phei chuan in sa nasa thin ngawt ang a,”? “Mawi ka tihve vak hleinem, a thu hrimah vairama kan awmlai khan mizoram hian ka lung a tihlen pawh ka hre ngai lo. Inkhawm a tam si, kan eizawnna hmunah ringtu kan nihna hmuh tur a tam lehsi lo,” A rin loh dan deuhva chhanna a dawn avangin Zomuani chu sawi tur hre lovin a ngawi rauh rauh a. Coffee chu ngawi rengin an in dun a. Ngaihtuah neih hmel loh zet hian Zuala chu a thu awn duaina a, Zomuani chu a rukin a mit sir leh zauh thin a. Coffee an in zawh atanga rei vak lohvah chuan Zomuani chuan a mut a chhuah thu te, a hma zana a mut tam loh thu te leh a nutei fapa dam sam loh vang a nih thute a sawi niah niah a. Zuala chuan, ‘Customer rawn kal tur pawh an awm loh hi thuthlengseiah khan tluzal mai mai rawh, nakin deuhvah kan haw dawn nia. Tunkara kan inhralh dan ‘file’ kan enfel ang e,’’ a ti zung zung a. Khua a vawt ruih bawk si a, Zomuani chuan shawl a la chhuak a, thuthlengseiah chuan a tlu zal ta a. Zuala chuan a sana an en zauhva, minute sawmhnih vel a mu tawh tih a hriat chuan damdawi paw’n a hneh tawh hle ang tih a ring a. Zomuani chu a pawm nawlh a, dawr hnunglama store room ruakah chuan a pawm lut ta a. A thawmhnaw hak lai zawng zawng a phelh sak a, mipat hmeichhiatna a hmanpui ta a. Duhtawk a ngah hnu chuan a thawmhnaw a hak that tir leh a, a hmaa a mutnaah bawk chuan Zomuani chu a mut tir lehta a Tlai lam dar 4 a ri tep a. Prevention of Parents to Child Transmission Centre (PPTCTC) kawtah Pastor Rinawma te nupa chu rilru bet lo ang reng takin an awm a. An inneih atanga thla hnih lekah nau an-ah tak mai avangin; Doctor-in tih tur a sawi leh tul a tih te an tinghal zung zung a.A nupui hming leh an chenna veng a rawn lam tak lauhah chuan; an nu thisen test result lam turin in chhung lamah chuan an lut ta a. Nu te lam, hmai bial lek lek hian uluk takin a lo en a. “He lamah hian lo thu rawh u, In nu pa in a ni maw in rawn kal”? “Aw ni e,” “ A that hlauh chu.Naupai lai hi chuan inenkawl uluk a ngai viau a nia, in nu pawh hi duat viau a ngai dawn a nih hi,” Chuti ang thu dik tlawng-awl leh mi pangngai tana hriat thar tul em em lo an sawi kher chuan Rinawma ngaih chu a titha zan lo. A hmaa ding, nu lian vak lo, la naupan hmel tak chu a han thlek a. Chu nu hmel, mitmeng leh hawiher chuan eng emaw titakin a tizam a ni.Raipuar tan thisen test hi tihngei tur a nih thu te, HIV natna laka inven hi kan tihtur a nih thu te, nu naupaiin a fa paiah a kai theih dan leh inenkawl dan te, positive te hi mi pangngai, natna hrik pakhat avanga damlo mai an nih thu te, taksa sawizawi that leh mut tam a pawimawh tlukin thei leh thlai ei tam a that zia te a sawi siam siam a. Inenkawl that chuan hrisel takin rei tak a dam theih thu te,kawppui pakhat zawkin a lo kai palh a nih pawhin ‘Condom’ hman mai tur tih te a sawi hnu chuan, “Ka pu, hei hi in result chu a ni a, Doctor in rawn leh hunah in keng dawn nia. ART ah khian a thlawnin damdawi a lak theih a. Harsatna inneih chuan in rawn kal zel dawn nia,”. An nu damdawi lehkha-a ‘Serology report’ - Retroviral antibodies : Positive tih lo inziak kalh mai chuan Rinawma chu a tiphu chiang kher mai. A mitvai nih ringin a mit an nuai ngial a, a mitvai awzawng a lo ni si lo.A taksa a rawn lum pup a, thlan tuiin a rawn bual a, eng emaw sawi tumin a ka a han ang zuau takna a, a kha a chih tlat avangin engmah a sawi thei lo. Mual veng Pastor Quarters chu a reh ruih mai a. Zomuani chuan a hun kal tawhte chhui letin bathlar thlanglamah a thu ngawi reng a. Kum hnih liam ta a, vanduaina a tawh dan te chu nimina thleng ang maiin a thinlungah fiah em emin a rawn lang zut zut a. Kha mi ni a a tawhsual tawh khan rilru leh taksa nasa takin a nghawng a. Kha vanduaina khan hlimthla ang maiin a zui ta reng a nih hi.Vengkhat nula chhuanvawr leh sakhaw mi, Pastor meuhvin nupui atana a thlan chat khan vawikhat tawhsual tawhah HIV a kai phah ta a ni. Hmeithai fa, chhuan tur eng mah nei ve lo tan Aizawl mihlun leh sumdawng hausa han khin kha a zuam ngang lo kha a ni a. Rorelna dawhkanah an thubuai chhawp chhuah pawh nise, lamtang an inneih hraw hleih dawn si a. A tawpa thiam lo zawk (Scapegoat) a nih dan tur a hmu tlang reng mai a. Ani tan lah mualpho na zakhua a thleng thei tih a hriat chian em avangin a ngawih bo pui ta kha a ni a. A hmangaih em em, tuna a pasal ni ta hnenah pawh hun eng emaw chen a zep a nih kha. A pasal tan chauhva a thianghlimna hlan a tum laia tawhsual a tawh dan; a huaisenna zawng zawng sawmkhawm chunga a hrilh zan te kha a ngaihtuah kir a. “Kei chu ka thianghlim tawh lo, min kal san mai rawh,” a tih lai a, “Virginity hi thinlung lam atangin a ni ka teh zawk ni, ka tan i thianghlim tawk e,” tih tawngkamte kha a bengah a rawn ri thar leh iar iar a. Thla thum emaw chauh an la innei na a, an ni aia nupa hlim an awm chuang lovang tih tur khawpin an hlimna chuan a chim sang a. Mit khap kar lekah chung an hlimna te chu lungngaihna chhum dumin a rawn hliah khuh ta a ni. Dr.Faktea ward fang zo chu Civil Hospital Canteen-ah a inhnawh puar a. Message tone rawn ri kauh chuan a cell-phone a chut tir vat a. A thianpa Rinawma message a lo ni reng a. ‘Kan tha vak lo, min rawn tlawh hawn hman chuan ka lawm ngawt ang,’ tih zawng hi a lo ni a. Rinawma nen hian naupan lai atanga inkawm leh sikul khata kai ho thin an ni a. Eizawnna kawng in ang lo tak zawhin hun eng emaw chen an in hmu meuh lo va.Vanneihthlak takin kan ti dawn nge khaw hmun khatah dah dun an han ni hlauh mai a. Khaw khata awm ta chu Pastor Rinawma te nupa pawhin dam mawh hritlana an biak rawn ber leh nau an han pai takah pawh an pan ber a ni ta a ni. Dr Faktea hi rual kawm thiam leh fiamthu duh tak a ni bawk a. Rinawma te nupa boruak rit tak pawh chu a chawh zan dan a thiam khawp mai. Titi eng eng emaw vawrhin darkar chanve tha lam an inkawm khawm hnuah chuan, “Anti- retroviral therapy leh CD4 test te kan han ti ang a, tluang takin naute chu in nei ang, ultrasound-a ka en pawh khan engmah sawiselna tur a awm loh kha. Mizo te hian HIV hi natna danglam bikah kan ngai a, virus pakhat avanga natna awm ve mai a ni a, kei Cancer te hi a nia buaipui awm ka tih chu,” a han ti a. Rinawma chuan, “I han sawi takah chuan, Cancer natna hian mizote hi min suat hnem hle mai a, cancer tih kan han inhriat atanga kum khatah hi chuan kan invui liam hman zel chu a ni mai a,” a lo ti ve bauh a Pathianni zan dar 6:30 a ni a. Biakin dar ri a inchhawn tluar tluar a. Pastor Rinawma thusawi zan a nih avangin Kohhran mipui inkhawm pawh an thahnem hle mai a. Hun rei tak Pastor upa lam in an lo uap tawh, Mual veng Pastor bial chuan Pastor la naupang tak leh thu thiam tak an nei chu nihlawh an inti hle nghe nghe a ni. 1Korinth 3:21 thu “..Engkim hi inta a nivek si a..” tih thupui thlansa sawi tur chuan Pastor Rinawma chu a rawn ding chhuak a. Thupui thlansa chu a rawn chhiar chhunzawm a. “...Nunna emaw, thihna emaw, thil awmsa emaw thil lo la awm tur emaw, a zavaiin in ta vek a ni,”. Mihringte’n kan beisei loh leh duh loh te thlenga kan ta a nih theih dan sawiin; chawlhkar hnih liamta a, an nupui thisen result an lam nia an boruak tawn te, an nu nena an inngaihzawn laia vanduaina a tawh dan zawng zawng a sawi ta a. ‘Hriau pawh thlauh palh ila, a ri ring ngawt ang,’ tih mai turin Biakin chhung chu a reh duk a! A sawi thiam bawk a, maicham veilama thu, nu ho chuan an puan hmawrin an mittui an hru ru zauh zauh a. Chu mi zan inkhawm bang chu mitthi vui haw lam ang maiin an haw ngui nghiai mai a ni. “Kan Pastor te nupa kha aw, an va han lainat-awm tak em! HIV postive te hi endawnga thinhrik ngawt tur an lo ni lo,” tiin Mual veng mipuite chuan, kum eng emaw zat a ral hnuah pawh Pastor Rinawma leh a nupui Zomuani an lainat thu an sawi leh thin.
Posted on: Tue, 18 Feb 2014 13:47:00 +0000