Chumi lai chuan Petera a lo kal a, a hnenah, Lalpa, ka unauvin vawi engzat nge ka chungah thil tisual sela ka ngaihdam tur? Vawsarih thlengin em ni ang? a ti a. Isuan a hnenah, Vawisarih thlengin ka ti lova che, vawisarih hmuh sawmsarih thlengin ka ti zawk che a ni. Matt.18:21-22 Petera hi chuan limit chin neiin vawisarih ngaihdam tur niin a ngai a, vawisarih chu number-ah pawh completion, perfection anga ngaih a ni. A awmzia chu vawi tam tak chu a ngaidam dawn a, mahsela limit a la nei a ni. Mihringin a tlin theih sang ber, A tawk tawh em em e a tih hma zawng sawina a ni mai. Amaherawhchu Isua erawh chuan mihringin a theih chin sang ber hmun sawmsarih belh leh turin a ti a ni. A awmzia chu ngaihda theih loh chin a awm tur a ni lo tihna a ni. Isua hian Petera tih tur atana a tuksak chauh a ni lo va, Pathian thinlunga ngaihdamna thuk a pho lanna a ni zawk. Mi tam tak ten kan thil lo tihsual tawh te chu a pawi em avangin Pathian pawhin min ngaidam duh tawh lo vang tih ngaihtuahna kan nei fo mai, Pathianin a ngaihdam theih tur chin lo bituksak tur kan ni lo va, ngaihdam theih loh a nei lo zawk a ni tih entir nan Isua nunna a rawn hlan zawk a ni. Bible chuan Amah leh amah a inphat thei si lo va a lo ti a, Pathian ziaah hian theih loh tawp a awm a, amah leh amah inphatsan hi a ni. Nimahsela min hmangaih avangin nang leh kei, kan sual avanga chatuana phatsan hlena kan awm ai chuan Kraws lerah khan Pa leh a Fapa mal neih chhun te chu an lo inphatsan hial a ni. Pathian chuan kan sual avanga phatsantlak lek nang leh kei-a aiah a Fapa a dintir a, a Fapa mal neihchhun a lo kalsan a, nang leh kei erawh chu min lo pawm ta hlauh thung a ni. Vawisarih hmun sawmsarih ngaidam tura a tih Petera kha vawi thum phatsantua kha a ni lawi a, Isua khan a sawi lawk tawh a nih kha, ar an khuan meuh chuan a inhre chhuak zawk ve ngei ang. Khati khawpa phatsan loh tumtu kha a ni si a, ar khuang khan a Lalpa thusawi a hriat chhuahtir a, Isua a va en chu anin a lo en ve bawk a, phatsantu mit leh hmangaihtu mit a intawng meuh kha chu Petera tan khan a va na dawn em! Tui baw hnu a ruh theih tawh loh angin koh kir a theih tawh si loh; Isua an man tawh a, an khengbet tawh a, Isuan a lo hrilh lawk angin zan a lo thleng ta mek a ni. Eng a chuai a, dam lo dam hriat tur a awm tawh lo va, mitthi kaihthawh a awm tawh lo. Nguina hlir, mahni inhuaa lungngaihna chuan zirtirte kha a chhun tluk tluk ngei ang. Man chhuah ve nih hlauvin pindan chhungril an thlang chawt tawh a ni. Petera a tho thut a, a chhuak nul nul a, khawiah nge a kal dawn tih an zawh chuan sangha man a tum a nih kha. Dilah kalin len deng mahse engmah a ti tui tawh lo vang. Isua phatin hawi kirin khawvelah tlan leh mah ila nun nei tak tak tawhte hi chu e, a tui theih tak tak tawh loh asin. Chutia mahni chauhva khawhar taka a awm lai chuan, lo chik rawh aw, phatsantuin phatsanin dil ralah tlanchhe mah se, hmangaihtu chuan a tlanchhiatsanna chen zeta hlaah a rawn pan leh asin. A va ropui em! I bona ramah, i tlanchhiatna hmunah leh i tlak luhna khurah pawh ni se, ani chuan a rawn zawng zel ang che. Peter, hengte ai hian nangin kei min hmangaih em tih zawhna kha vawi thum a zawt a ni. Lo ngaihtuah leh rawh, a phatsan tuma Ka hre lo vawithum a tihna ngeiah khan vawithum Ka hmangaih che a tih lehna turin chance a va hawn leh asin. Vawisarih a chunga lo tisual tawh mah la, Isua erawh chuan vawisarih hmun sawmsarihin a la ngaidam duh che a ni. Thahnemngai takin Lal Isuan min ko va...a ko che misual haw rawh
Posted on: Fri, 29 Aug 2014 05:39:41 +0000
Trending Topics
Recently Viewed Topics
© 2015