City bus conductor nih hi ka hreh loa, ka zak hek lo. Kum 10 liam ta khan ka thianpa Renga (Hualrengpuia), kan tleirawl chhuah hlima kan bialnu te lehkhathawn tur zawng2 phuah a, ziak vek thin kha City Bus Conductor a ni a. Ka thian pakhat Tlanzauva kha city bus pakhat Vincy tih hming pu Driver a ni bawk a. An hnuaiah hna ka dil a, min hmuh sak lem loa, a thlawnin vawi 3 emaw vel ve ve Chanmari leh Treasury inkar min phur thung a. A thlawna min phurh theih avang khan tihtur nei miah lo kha Treasury ah ka chuang phei ngawt thin a. Cowboy bu leh M&B zawng zawng tih mai tur an chhutna hmun, Albany Cyclo Printer neitute fanu Tebawihi te hnathawhna sirah ka thu ni leng a, a changin Y2goal lamah, pu LR sailo te in ah Mamuana kid te ka zuk kawm thin bawk a. Ni e, khatih lai khan City bus conductor nih tumin ka hmanhlel a, ka ni ta loa. ITI lamah training tur ka zawng a, eng trade nge tha tia ka u Rintluanga nen an intructor pakhat kan va rawn a. Ani chuan, zan lamah Pathian te ka lo rawn ange, a ti a. Lawm takin kan haw a. A tukah thurawn kan va lakna pa chu kan va pan leh a. Ani chu internal bleding (zu in nasat vang) vangin damdawi inah an lo admit der mai a. Tih ngaìhna awm hek lo MASON(building construction) lam kan training a. Mipa panga leh hmeichhe pali kan ni a. Kan training chhuaka a thenin thingtlangah pasal an um a, a then thinpui dawrah an thawk a. A thenin sangha dil an siam a. A mumal ber Rinnunga chu an in sak lai a ni a, a thiamna chu hmangin an in sak bang chu thiah leh ngaiin a rem ve hram a. Kei chup Vanglaini chanchinbu lamah pu Sapa remti lo chung ka thawk lui a, a hnu ah min chhawr ta nge nge a. Min duh tan ta tihah zirna ka zawm san ta daih a. ITI a kan training pui pakhat, Thentlang khua Ruatsanga chu city bus conductor ah a tang a, tunah phei chuan city bus driver a ni ta. Nupui te a nei a, fa te pawh a nei ve a. Gas bur te, chi bur te, thutthleng mi pathum lenna te pawh an nei ve biai a. Naupang inkhualtelem ang mai hian an hlim ve em em mai a. Mikhual te an nei ve a, masi pawh an khua Thentlangah an hmang ve thin. A bus khalhah ka chuang fuh thei viau a. Ka chuan duhna hlat zawng hi tunah a fare a to tak hnu pawh hian cheng 3 emaw chauh chawina a ni a. A free a han chuan pawh a zahthlak zawmah a. Ni, ka sawi tum tak chu, nikum leh kumin chhungin city bus ah ka chuang tam lo hle. Hetia tlai tin chhung inkhawm pawh nang hman mumal loa Lalhruaitluanga Chawngte te, Roa Fanai te, u Thatea te, Lalthlamuana Ralte te, Hming Sanga te, Zoa Tlau te, Tonsona te, amah u Thatea tawngkam takin TV presenter lar chho mek Trawmpuia te, mizo zinga mi ti ti kal lai ti tawp hnem ber, a thusawi va sawi pui dawna thil danga kai leh dai Lalmuanpuia Punte te ho nena kan ti ti tak chinah phei chuan City Bus hi ka chuang ta meuh lo. Bakah ka chuan thinna inkar lah hi ka kal pui pa Chawngte tlangval hian chuan loh a duh zel bawk si a. Chu vangin city bus chhungah hian ka ke ka chhep lut khat ta khawp mai. Mak tak maiin ka chuang khat viau e ti lo chuan ka chuan chhunah hian Conductor emaw tia chuan man min pek tuma hnung lam atanga min au te, min kuai ta ngar ngar te hi ka tawng ziah thung a. Tukin ah pawh nu pakhat chuan, kan conductor khiangkawi ipte chu a va nalh ve, a la ti ta fo a!
Posted on: Mon, 20 Oct 2014 07:34:58 +0000
Trending Topics
Recently Viewed Topics
© 2015