DECLARASAUN POLITICA BANKADA FRETILIN LORON 24 de SETENBRU de 2013 Nai Presidente Parlamento Nacional Ex.Cias Deputado sira hanesan membro Parlamento nacional no representante Povo nia, iha dever hodi haburas, no hamentin uma fukun ne’e nia knaar, hodi tatoli Povu nia preocupação ba Governo, no sai Povu nia lian, Povu nia isin, no materializa povo nia mehi hodi haburas no hametin ita nia independência. Hau nudar Deputado hussi bancada FRETILIN iha knaar no iha competência tomak atu tatoli Povu nia lian no hussu ba Governo, tuir art. 9°, alinea h, no artigos 137° e 138° Rejimento uma fukun nia rasik. Hau halo requerimento ida ne’e hau hakarak hussu ba Governo atu bele hatan resposta ho escrito tuir Konstituição da República artigo 101° no. 2 e artigo 107°. Atu nune’e ita hotu bele hakruk ka halo tuir lei nebe iha. Declaração Politica. ► Bancada Fretilin halo declaração Politica ida ne’e atu hussu lalaok tomak actividades Agência Desenvolvimento Nacional ho Ministerios Relevantes ba Projectos físicos hussi fundo infraestruturas ho Previsão Orçamento Geral do Estado Multi Anual. Declaração política oin nia, ami hakarak koalia dala ida tan especificamente kona ba Construção Ponte Comoro 2 ho Ponte Comoro 1 nebe halo dadaun hela demolição. Representante Povo iha Uma Fukun ne’e halerik lori povo nia lian maibe ema ida lakohi hakarak rona. Ita hotu contente tamba construção Ponte Comoro 2, remata tiha ona, parabéns ba kontrator nebe halo ponte ne’e tamba halo duni ho kualidade. Iha Livro 6 (fundos especiais) aloka orçamento no montante de $ 7’200’000.- iha ano fiscal de 2012 hafoin hetan Roll Over ba ano fiscal 2013. Iha ano Fiscal 2014, aloka tan verba ida ho montante $ 2’000’000.- Iha loron 13 fulan Setembro 2013, hau simu relatório de execução Orçamento do Segundo Trimestre. Hafoin simu tiha relatório ne’e, halo analise klean, no observa katak Governo ida ne’e laiha sensibilidade halo relatório ida nebe los, tuir ita hotu nia hakarak. Pelo contrário relatório de execução orçamental especificamente ba construção ponte comoro 1 no ponte comoro 2 la iha. Ho ida ne’e ita hotu lahatene osan hira mak executa tiha ona no hira mak precisa tan ba construção Ponte refere. Tamba ne’e mak hamosu duvida boot. Fretilin hanoin, decisão política halo plano sobu no halo construção Ponte Comoro 1, hanesan la dun los, tamba ponte refere nia condição sei diak no sei bele usa to’o tinan tolu nulu resin. Fretilin hakarak buka tuir Autor Intelektual nebe halo conceito ne’e, nebe nakonu ho interesse. Ami hanoin Autor Intelektual ne’e laiha sensibilidade Nacionalismo no Patriotismo, tamba conceito refere hanesan inventa deit tuir nia vontade no la tetu factores importantes seluk nebe reflecte ba sentido Nacionalismo Estado no Nação. Iha ema balu nia argumento hatete katak, ponte comoro 1 precisa sobu tamba deit razão técnica “Estética”. Ami hakarak hatete, katak Ponte comoro 1 iha tiha ona hafoin halo ponte comoro 2. Lo los, ponte comoro 2 tenke halo hanesan ponte comoro 1 atu nune’e evita questão técnica Estética refere no mos bele poupa orçamento hodi halo fali infraestruturas seluk nebe prioridade no importante. Nain Presidente Parlamento Nacional no distintos deputados sira. Memorias hussi processos tomak ukun rasik an, hanesan valores importantes nebe ita tenke hussik hela ba ita nia geração vindouras. Timor oan tomak nia responsabilidade tenke conserva Objectos Memoriais hussi ita nia maun alin sira Estado Português no Estado Indonesia nebe hussik hela, ho nune’e ita hotu bele tane as no hamosu Valores Historicos no Culturais iha ita nia Nação Doben ida ne’e. Ponte comoro 1, hanesan memória ida nebe iha nia valor história rasik, tamba processo luta ukun rasik an la fácil no lori tempo nebe naruk. Tamba ne’e, dala ida tan Fretilin hussu atu lalika ona sobu ponte comoro 1. No hussu atu instituição competente bele buka tuir no investiga Autor Intelektual nebe halo conceito ne’e. Mai ita rona malu atu Desenvolvimento ne’e bele lao kapas liu tan tuir partido ida idak nia Slogan. Katak: Hamutuk ita bele, Fiar An lao ba Oin, Hari’i hussi Base no Hatama Mudança lao ba oin. Ba ita boot sira nia atenção ami hato’o obrigado barak. Inacio Freitas Moreira Deputado Fretilin
Posted on: Thu, 26 Sep 2013 00:24:08 +0000
Trending Topics
Recently Viewed Topics
© 2015