Djarason 14 di ougùstùs 2013, alrededor di 00.13’or, Sentral di Polis a dirigí un patruya na Weg naar Welgelegen na altura di un panaderia na unda un outo a bòltu. Na yegada di e patruya na e sitio nan a konstatá ku e shofùr, un mucha muhé nasé na Repúblika Dominikana di 17 aña di edat, tabata for di su konosementu i pegá bou di e outo. For di un investigashon preliminar na e sitio a resultá ku e shofùr, ku no tin reibeweis i tabata kore sin faha di seguridat bistí, tabata kore riba Weg naar Welgelegen direkshon Pater Eeuwensweg. Pa un motibu ku te na e momentunan aki ta den investigashon e shofùr - ku probablemente tabata kore ku velosidat hopi haltu - a pèrdè kontròl riba e stür, kita bai na man drechi i dal den palu di tamarein pa despues bai dal den un labadó i bòltu. Dor di e impakto e shofùr a keda saka parsialmente for di e outo. E víktima sufri múltiple leshon na su kurpa prinsipalmente na su kabes i garganta. Ku yudansa di personal di Brantwer a logra di saka e víktima for di e posishon ku e tabata i a transport’é ku urgensia pa Poliklínika di Hospital St. Elisabeth na unda despues di tratamentu el a keda interná den e departamento di Kuido Intensivo. Su situashon ta di preokupashon. Departamentu di Tráfiko ta kontinuá ku e investigashon. Tep: polis ta hasi un súplika na kualke persona ku por a presensia e aksidente aki òf ku tin informashon kon e aksidente aki a sosodé pa tuma kontakto ku Departamentu di Tráfiko na telefon 8666-134, 8666-136 òf 8666-137. Yama Bo Kuerpo Polisial ku Konfiansa!
Posted on: Wed, 14 Aug 2013 23:34:24 +0000
Trending Topics
Recently Viewed Topics
© 2015