ENGE GREEN ECONOMY Ramin kawng hrang hranga a thil dehchhuahna lama environment siamtha zawnga hma a lakna hi “Green economy” sawifiahna pakhat a ni a. Green economy chu hmasawnna tlo (sustainable development) leh ecological economics-a innghat a tih theih bawk ang. Kum 2012-a United Nations Conference on Sustainable Development (Rio+20) atanga rawn lâr zual a ni. Green economy chuan mihring hmasawnna sâng tak nei chunga ram leilung hausakna (natural resources) lama nghawng tlem tak neihtir hi a tum bulpui ber a ni a. Sorkar leh sorkar lo atanga hlawkna uma sum hmanna (investments) reng reng boruak bawlhhlawh siam lo zawng te, ram leilung pianken hausakna renchem leh tangkai zawka hman te leh thilnung tinreng (biodiversity) kiam zel tur ven te hi a tum langsar tak a ni bawk. “Green” tih hrim hrim hi environment tan symbol-a hman a nih laiin sustainable development tan emblem-a hman a ni thung. Chuvangin, Green economy chu “economy of the environment” pawh a tih theih tho awm e. Mihring, kan lei leh hmasawn tura kut kan thlakna te hi inkungkaih kual vek an nih avangin heng lungthu pathumte hian “Nunna” rual tha taka an khaidin theihna turin inchen thapa an din a ngai a ni. Tin, ram rohlu (natural assets) luangral lo zawnga economic development kalpui leh retheihna umbo kawngah te hian Green economy hi kan khawvel upa tawh tak hian a mamawh tulh tulh dawn bawk a ni.
Posted on: Sun, 03 Aug 2014 15:13:09 +0000
Trending Topics
Recently Viewed Topics
© 2015