“IN MI HRIET ZING NA DINGIN HI HI THAW HLAK RO” Luka 22:19 - R.C.Varte September 28, 2014 Pathienni inkhawm chu Beiruol intuokkhawm–a hmanga Testimony hrilna bakah Lalpa zan bu-Sacrament semna nei dinga Local Committee in a rawt angin Sacrament Semna Rawngbawlna nei ding chun kan buotsai taha. “In mihriet zingna dingin” ti hi tuta tum chu nidanga angnaw takin a thawk ve thlat el chu tie! Lalpa zan bu Sacrament thaw zata lungrila lientak hlak chu Isu tuorna le a thina hriet zingna tieng hi ani deu tak hlaka. Chu chu kei khawma ka lo hril uortak hlak le mi khawm chu tieng pang ngaituona chu pe seng dinga ka fielna hlak alo nih. Chu chu a subject tak khawm ani renga, an dik bawk anih. Amiruokchu, tuta tuma ngaituona ka nei thar chu Chu tieng pang chau chu nilovin, Isu nina pumpui el hi theinghil phal ding chi ani naw zie, a reng el hin hriet zinga hriet thar pei tum ding alo nizie le a lo that zie chu anih. Pathien, suolna nei derlo ni si Mihriem-a a hung inchang nuom el na thu (incarnation) dam, a pieng dan dam, an thanglien dan, a baptisma chang dan, a rawngbawl dan, a thilmak thaw, an chuktir dan, a taimak dan, a tuorsel dan, a ringumna, a huoisenna, a zai daw theina , a hmangaina, a thina, a tho nawkna, vana a lawn dan le a hung nawk dan ding chen hi theinghil derlova hriet zinga ngaituo ngaituo hlak ding ani ziehai hi tuta tum chu a min ngaituo tir tlat el. Chuleiin, A tuorna leia a lungsiet umzie tieng pang nek hmanin A nina ropui zie le a zara ei chan ropui zie le ei la ropui pei ding zie tieng ngaituona le hriet tharna tiengin a thawk lema. “Aw Hlim in Lawm rawh, ka thla inrieng, In hmangna inthuk sien khawm Paradis an tlun ta che, Aw hlataka hung zawngtu che khan.ti hla chu kan sak ta lema an hawi kher el. Ei Sandamtu Isu Chanchin hi Nitina sui khawp, ngaituo khawp le ngaituo nghawk umlo, hriet zo tah ti um theilo ding khawpa Chanchin mak chu alo ni ngei el! Hla siemtu E.E.Hewitt. in :More more about Jesus” ti hla a lo siem, Hmar tawngin- 1. Isu Chanchin Hrezuol ka tih, A lungsietna mitin hrilin; A sandamna hmuzuol ka tih Ka ta dinga thi ani si. Isu hrezuol ka tih (2) A sandamna famkim ka hmu, Ka ta dinga thi anih si. 2. Isu chanchin min chuktir sien, A thienghlimna hmu zuol ka tih, Thlarau ka zirtirtu nisien; Ktista thil chu min entirin. A sap tawngin “More of His saving fullness see, More of His love who died for me” tia “More” ti a hang hmang uorna tak hi tha ka ti zuola. Isu sandamna, a hmangaina le a thina hai khawm hmu nawk zuol pei, hriet nawk zuol pei achak zie! A hausaknahai, a Lal-thungpha le Lalram indin dinga Lal anga a la hung nawk dinghai chen chu hriet zuol pei nuoma “More” ti thumal deu ngawt hmanga hla tha em em a lo siem el dam hi chu ava hang tha em em deh aw! . “In mi hriet zingna dingin “ a lo ti ang hrim hin Isu hi a tuorna le a thina subject a chau nilovin a chunga ei suklang ta ang khin ama chanchin tho vah subject dang dang khawma nitina hriet zing thlak le hriet zing dinga tha chu a lo vahei ni ngei deh! Ti chu tuta tuma Sacrament rawngbawlna ka neina-a mi suklawm thar em em tu chu anih. Lalpa chu inpakin um sienla, “IN MI HRIET ZINGNA DINGIN” a ti angin theinghil lovin hre zing hlak ei tiu khai.
Posted on: Mon, 29 Sep 2014 09:38:02 +0000
Trending Topics
Recently Viewed Topics
© 2015