Indopui Pahnihna (1939-1945) (Second World War) Myanmar Politician-te an ram chungchang kan chhiar reng rengin Indopui pahnih hi kan sawi tel ve ziah thin. Khang hun lai khan tun dinhmun hi a rawn siam miau avangin, sawi tel a ngai miau si thin a ni. chuvangin, nakin zelah Post dang chhiar huna, indopui pahnihna tih an ziak telin, kan fiah lehzual theih nan, Group Name piah lam thil mah nise, ka rawn post tho ta a ni e. Indopui pakhatna a zawh khan remna thuthlung Treaty of Versailles chu ziah a ni a. Germany chu nasa taka tih mualpho a ni. buaina thenkhat chu chinfel lohin a la awm a, Khawvel hmun hrang hranga sorkar thar piang chuan phuba lak chakna siamin tanghma namen lovin a hai bawk a ni. chutiang ang chuan chhan tam tak avanga indopui thleng nawn leh ta chu a ni a. chung chhan hrang hrangte chu: 1) Treaty of Versailles : Indopui pakhatna ah khan Germany leh a pawlte an chak ta lo a nih kha. inremna ah khan Germany chu a ram territory tam tak laksak leh pawisa chawitir a nih mai bakah pek sen loh tur khawpa tam battir a ni a. chuvangchuan German chu an thinrim hle a, hun remchangah phuba lak an tum reng a ni. 2) Hitler chuan Europe puma ram zawng zawng awp a, German tawng hmantir vek hi a tum a ni. A sipai a tipung a, Allied ram hnena a pawisa bat a pe duh ta lo va, Hitler chuan Rhineland te, Austria te, Sudetenland te leh Czechoslovakia te a awp a.indo a inpeih ta hle a ni. 3) Sipai lak belh vakna (Militarism): France pawhin sipai chu a ram tana himna bulpui ber a nihzia hriain sipai a lak belh teuh mai a. Washington leh Geneva ah sipai tih tlem tur chungchangah Conference neih a ni nachungin, Germany pawhin a zawm duh lo. sipai 1,00,000 chauh neih phalsak a nih laiin sipai 8,00,000 lai a nei lui ta a ni. 4) Indopui pakhatna zawh khan Italy chu economics ah a tluchhe hle a. Chutih lai chuan Fascism sorkar a lo piang ta a. he sorkar hian communism, democracy, socialism te chu a do hle a ni. Fascism sorkar kaihhruaina hian Italy chu khawvel ram hlauhawm ber zinga mi a lo ni ta a ni. Italy, Japan,Germany chuan thawhhona neiin, an hmingah Axis power tih an ni. tichuan ram lak zau belh zel chu an tum si a. chu chu England, France, leh Russia tan a hlauhawm ta hle a ni. 5) Spain ah Lal paihthlain Democratic republic sorkar siam a ni a. 1936 ah liberal leh radical ho chuan sorkar a thunun tlat a. chuvangchuan, nawrhna (strike) nasa tak a thleng a. chutih lai tak chuan, General Franco kaihhruainain sipai chuan hma a la thut a. Germany leh Italy in an pui nghal a. Franco chuan he Spanish civil war ah hian hnehna changin Fascism sorkar a din ta a ni. chutia Democracy sorkar hnuaichhiahna chu England,France leh Russia tan chuan tuar har tak a ni. 6) Japan Ral lian ( Japanese Imperialism): 1902 khan England nen thawkdun thin an ni a. mahse indopui zawhah Japan chu a hausain a chak ta hle a ni. sipai leh Navy a lak belh thut a, China province, Manchuria leh china khawpui tam tak a la a. indopui pahnihnaa a rawn tel tak tak kha chu 1941-a American Base Pearl Harbour a beih kha a ni. 7) Rinna/ngaihdan inanlohna (Ideological Differences): Allied powers ram England, France, USA te chuan Democracy kalphung an duh laiin; Japan, Germany leh Italy chuan mimal Lalna (dictatorship) kalphung chauh an duh a ni. hmun hnihah khawvel chu a inthen leh ta a. inrinhlelhna te, inerna te, leh phuba lak chaknate avangin indo chu pumpelh theih a ni ta lo a ni. 8) Poland run thu (Invasion of Poland): Germany chuan Poland ram leh Danzing a run ta thut a ni. Treaty of Versailles thuthlung khan Poland chuan Danzing hmun hi a awp theih thu a ziak tel a ni. Mahse, Germany hian Danzing a duh chhan chu East Prussia awlsam taka lak leh kalpawh theih nan te leh Danzing-a mipui tam zawkte hi German an nih vang a ni. Germany chu England chuan vau in Poland a beih vaih chuan a do nghal tur thu a puang a. mahse, Hitler chuan depde takin Russia a thurualpui tlat vangin, ngaihtha leh hlauhna nei miah lovin Poland chu september ni 1,1939-ah a run ta thut a ni. England chuan in withdraw turin a vau nachungin, Germany in engah mah a ngaih loh avangin England chuan Germany do a puang a.France leh a thawhpui ram ten england an pui nghal a, indopui pahnihna chu a intan ta a ni. Indo dan leh indo hunchhung (Course of the War) He indona hian khawvel hmun hrang hranga ram chu engtikawng zawng emaw talin a nghawng vek a ni. kum 4 chhung zet indona hian a awh a ni. Poland chu chhak lam atangin Russia in a run a, thlang lam atangin Germany in a run bawk. Poland chu hneh niin, Germany leh Russia in an inphel a ni ber. 1939 tawp lamah Russia in Finland a bei a, a chhan chu Russia hian Germany a ring zo lova, Germany in a rawn beih thut huna tanhmun tha tak neih nan Finland hi lak a tum a ni. Tichuan, Finland, Esthonia, Latvia, Lithuania te chu a la ta vek a ni. 1940 ah Germany chuan Denmark leh Norway a la a, a hnu ah Holland leh Belgium la leh bawk a ni. Heta tang hian German sipaite chuan France chu awlsam takin an bei thei ta a . France chuan do zo lovin a tlawm ta a ni. British sorkar pawh a hnungtawlh ta duai duai mai a ni. France tlawm hnu chuan Italy pawhin Germany lamah tangin indona ah chuan a tel ve tan ta a. Mussolini-a chuan France sorkar atangin heng ram; Nice, Savoy, Corsica te hi a phut a. hetih lai hian Italy leh British ho chu North Africa-ah an inhmachhawn ve ta thut mai bawk a ni. chutih rualin Italy in Greece a run a, mahse italy zawk chaklo ah a tang thung a ni. A hnu ah Germany in Greece leh Crete a hneh a. British sipaite chu egypt lamah a um bawk a ni. Dunkrik ah British an chakloh hnu chuan ram tam takin England pawh Germany in a hneh dawn a nih hi an lo ti rilru hlawm a. Mahse British Prime minister, Winston Churchill chuan ,Boruakah leh Tuifinriatah te chuan kan hmelmate chu an bei zel dawn, a senso chu engtia tam pawh nise, kan tlawm ngai dawn lo a ni a ti hmiah a ni. Chu chuan english ho mipui rilru ah phurna leh huaisenna a thlen nasa hle a.tichuan indo turin an inpuahchah thar leh a. Battle of Britain tih indona ah chuan British in German thlawhna tam tak a kap thla a, German pawhin London leh khawpui dang leh english ho Lawng a kap chhe nasa hle bawk a ni. An inthianthatna ngai pawimawh lovin 1941 ah Hitler chuan Russia a bei thut a, A tir lamah chuan German ho an chak chho zel a. mahse England chuan a sipai hmangin Russia a pui ta a, Russia chuan Germany a hneh thei ta a ni. Russia chuan Poland leh East Germany a awp nghal a ni. USA indona a a tel ve dan: USA chuan european buaina ah ngaiin rei tak a inrawlh duh lova. mahni ngaihtuahna thar a rawn piang ta a, England hi hneh a nih chuan Germany chuan a dawt lehah USA hi a rawn bei mai ang a tih hlauhthawnna a awm ta a ni. Tichuan US chuan Navy ralthuam 50 lai chu 1941 khan England a thawn a ni. Germany leh Italy dotu zawng zawngte chu US hian chaw leh ralthuam a supply ta vak zel a ni. Chutih lai 1941 chuan, Japan in US lawng chawlh hmunpui Hawaii island-a Pearl Harbour chu thlawhna in a bei thut a. mi tam tak an thih bakah, ralthuam a chhe nasa em em a. chuvangchuan, USA chu awm hle hle duh ta bik lovin England leh Russia lamah a tang nghet ta bur mai a ni. Japan chuan reilote chhungin South east Asia chu a la a, Hongkong te, philippine, Malaya, Singapore,Burma,New Guinea hmun thenkhat, French Indo-China, Dutch east indies(indonesia) te chu a hneh nghal vek a ni. India leh Ceylon pawh a rawn luh tan laiin a tanrualpui Germany leh Italy an tlawm tak avangin a inhnukdawk leh hnahnawh a ni. 1941-1943 inkar hian North Africa ah indona a hluar hle a. Ethiopia chu Italy in a la a, Germany leh Italy Libya la in, Egypt beih an rel nghal a ni. Egypt hi england awp mek a ni. mahse, General Montgomery kaihhruaina in Desert Rat chuan Germany leh Italy chu Africa atangin a umchhuak ta a ni. chutih lai chuan Italy ah helna a chhuak a, Fascism hruaitu Mussolili chu man a ni a. tlachhuakin Germany ah a tlanchhia a, 1945 ah an man nawn leh a. kahhlum a ni ta a ni. British leh American te chuan Germany khua hrang hrangte chu thlawhtheihna hmanga thawngin bomb an thlak vak a. Tichuan 1944 ah French rama german ho chu an umchhuak ta a. Holland leh Belgium pawh an chhuhsak a. chutih laiin Russia in chhak lam atangin a lo bei ve reng bawk a. Hmun hnih atanga an beih avang chuan Germany chu 1945 ah a tlawm a. Hitler erawh chu amah leh amah a inthat a ni. German khawpui ber Betlin chu awp a ni a. German official ho pawh man vek an ni. Japan chiah beih rawn a ngaih takah chuan Allied power te chu an thawveng huai a. Japan sorkar hnenah i in surrender (inpek) loh chuan i chhe vek ang tiin an vau a. a tlawm duh si lova, US chuan August ni 6,1945 khan Japan khawpui pakhat, Hiroshima ah Atom Bomb an thlak ta a. mi tam tak thi leh hliam an awm a. mahse Japanese sorkar a la tlawm duh chuang loh avangin August ni 9,1945 khan Nagasaki khawpuiah Atom Bomb a thlak nawn leh ta a ni. indo hun chhung zawnga la hman ngai loh Bomb chak leh rapthlak lutukin an khawpui pahnih a sawi chhiat vek avang chuan Japan sorkar chu August ni 14 ,1945 ah a tlawm ta a. Tichuan, indopui pahnihna chu a tawp zui nghal ta a ni. Atom bomb hnathawh hi a rapthlakin a eng hle a, a puak lai lo hmutute chuan an hmuh rualin an mit a del nghal a ni. Bomb puak hian a hnu ah thlipui na tak a thlen a, leh Acid rain (Acid ruah) a sur a ni. Bomb zungzam boruaka leng vel hip avangchuan, naupiang tam zawk chu zeng, piangsual, mi ang lo te an ni. thenkhat hahni a thi vak zel bawk. chutih laiin a then erawhin fa an nei thei lova, an ching ta thin a ni.
Posted on: Fri, 18 Jul 2014 20:24:35 +0000
Recently Viewed Topics
© 2015