KORSOU: Emmabrùg nominá pa premio “8th Wonder of the World” di websait VirtualTourist. Kòrsou por ta orguyoso di su Emmabrùg (brùg di Ponton) kual a risibí nominashon pa premio ‘’8th Wonder of the World” di VirtualTourist. Mas ku 300 monumento rònt mundu ta den kompetensia pa bai ku e título máksimo di “8th Wonder of the World”. Emmabrùg ta un herensia ku nos por ta hopi orguyoso di dje; konstruí dor di kònsel norteamerikano Leonard Burlington Smith na aña 1888. E ta wòrdu konsiderá un brùg úniko den su sorto na mundu. Un i tur ku bishitá nos sentro di suidat ta keda altamente fasiná na momentu ku e brùg ku ta konektá e dos partinan di Willemstad, Punda i Otrobanda ku otro ta habri pa un boto òf un bapor drenta nos haf. Emmabrùg, Swinging old lady, Pontjesbrug òf brùg di Ponton ta i lo keda un di e instrumentonan vital pa tantu nos haf i nos sentro di suidat. E aña aki selebrando su di 125 aniversario, nos Emmabrùg a sa di konbertí su mes den e imágen prinsipal pa promové Kòrsou komo destinashon turístiko, internashonalmente. Pa Emmabrùg por konkistá e título máksimo den e kompetensia di “8th Wonder of the World”, ta invitá pueblo di Kòrsou pa bishitá e wèpsait di virtualtourist/8thwonder i vota awe mes. Ta bon pa menshoná ku kada persona por vota un bes pa dia i dia 30 di sèptèmber 2013 lo sera e votashon. E monumento ku risibí mas voto no únikamente lo risibí e premio máksimo di “8th Wonder of the World” sino lo paresé tambe den un segmento di un programa di televishon na Merka i lo risibí promoshon masivo via di VirtualTourist. Sigui BC; ami a depositá mi voto kaba.
Posted on: Wed, 26 Jun 2013 22:35:06 +0000
Trending Topics
Recently Viewed Topics
© 2015